અમરેલીમાં SOGએ નકલી ખાતર બનાવતી ફેક્ટરી ઝડપી પાડી છે. એ નકલી કંપનીનું નામ નિરીમા એગ્રી પ્રોડક્ટ્સ છે, જે અમરેલીના મોટા કડિયા અને પીપલક રોડ પર આવેલી છે. SOGએ નિરીમા એગ્રી પ્રોડક્ટ્સ નામ નકલી ખાતર બનાવતી કંપનીમાંથી નબળી ગુણવત્તાવાળું એમોનિયમ સલ્ફેટ ખાતર ભરેલી 50 કિલોની 502 બેગ (કિંમત 4,46,900 રૂપિયા), POLYHALITE IPL ખાતર ભરેલી 25 કિલોની 720 બેગ (કિંમત 6,84,000 રૂપિયા) જપ્ત કરવામાં આવી હતી. ફેક્ટરીમાંથી સરોવર સરદાર ઇમ્પોર્ટેડ બાય ગુજરાત સરદાર ફર્ટિલાઇઝર કોર્પોરેશન લખેલી 5600 ખાલી પ્લાસ્ટિક બેગ (કિંમત 14,000 રૂપિયા) અને ખાતર બનાવવા તથા ભરવા માટે ઉપયોગમાં લેવાતી 3 મશીનરી (કિંમત 5,00,000 રૂપિયા) સહિત કુલ મળીને કુલ 16,74,900 રૂપિયાનો મુદ્દામાલ જપ્ત કરીને કાયદેસરની કાર્યવાહી હાથ ધરી છે.
અમરેલી જિલ્લાના ફર્ટિલાઈઝર અધિકારી પિનલ ખૂંટને નકલી ખાતરની ફેક્ટરી બાબતે જાણ થતા તેમણે SOGને જાણ કરી હતી. ત્યારબાદ સંયુક્ત રેડ કરવામાં આવી હતી અને તમામ મુદ્દા માલ જપ્ત કર્યો હતો. પિનલ ખૂંટેએ આ બાબતની ફરિયાદ ફેક્ટરી માલિક ભરત ધાનાણી વિરુદ્ધ અમરેલી તાલુકા પોલીસ સ્ટેશનમાં ફરિયાદ નોંધાવી છે. આ સમગ્ર ઘટનાની વિસ્તૃત માહિતી અમરેલીના SP સંજય ખરાતે આપી હતી.
આ કાર્યવાહી અગાઉ બાબરા પોલીસ સ્ટેશનમાં નોંધાયેલા એક ગુનાની તપાસના ભાગરૂપે કરવામાં આવી છે. એક મહિના અગાઉ બાબરા તાલુકાના ખભાળા ગામ નજીક ફર્ટિલાઇઝર એગ્રોના વિક્રેતા પાસેથી બનાવટી IFCO કંપનીના માર્કાવાળી પ્લાસ્ટિક બેગમાં હલકી ગુણવત્તાવાળું ખાતર વેચવા બદલ આવશ્યક ચીજવસ્તુ ધારો 1955ની કલમ 7 હેઠળ ગુનો નોંધાયો હતો.
અમરેલી SOGએ અને ખેતીવાડી કચેરીની ટીમે આ બનાવટી ખાતરની ફેક્ટરી ઝડપી પાડવામાં સફળતા મેળવી હતી આ કેસમાં મુખ્ય આરોપી અને લાલાવદરના રહેવાસી ભરત ચીમનભાઈ ધાનાણીની ધરપકડ કરવા અમરેલી પોલીસે ચક્રો ગતિમાન કર્યા છે. અમરેલી જિલ્લામાં ખેડૂતો સાથે છેતરપિંડી કરતા નકલી ખાતર બનાવવાની ફેક્ટરીમાં નકલી ખાતરનું ઉત્પાદન કરી વધુ પૈસા કમાવાની લાલચે આ ગેરકાયદેસર કામ કરનાર સામે પોલીસે કાર્યવાહી કરી છે. આ ફેક્ટરી કેટલા સમયથી ચાલતી હતી? ક્યાં-ક્યાં ખાતરનું વેચાણ કરવામાં આવ્યું હતું તે દિશામાં પોલીસે તપાસ હાથ ધરી છે.
18.jpg)
