ઉત્તર પ્રદેશના બિજનૌર જિલ્લાનો એક વીડિયો હાલમાં સોશિયલ મીડિયા પર વાયરલ થઈ રહ્યો છે. વીડિયોમાં એક પોલીસ ઇન્સ્પેક્ટર એક યુવાનને મારતો જોવા મળે છે. તેણે કથિત રીતે તેને માત્ર 12 સેકન્ડમાં જ 6 વખત થપ્પડ અને મુક્કા માર્યા હતા. માર મારવામાં આવેલા યુવાન પર દુકાનમાંથી સામાન ચોરી કરવાનો આરોપ હતો. વીડિયો પોલીસ સુધી પહોંચ્યા પછી, તપાસનો આદેશ આપવામાં આવ્યો હતો.
મીડિયા સૂત્રોના અહેવાલ મુજબ, આ ઘટના માંડાવલી પોલીસ સ્ટેશન વિસ્તારના ભાગુવાલા ચોકીમાં બની હતી. સબ-ઇન્સ્પેક્ટર સંજય કુમાર યાદવ આ ચોકીના ઇન્ચાર્જ છે. વીડિયોમાં, સંજય યાદવ કથિત રીતે યુવાનને મારતા જોવા મળે છે. આ વીડિયો થોડા મહિના જૂનો હોવાનું કહેવાય છે, પરંતુ હાલમાં જ વાયરલ થયો છે.
આ વીડિયો ફક્ત 12 સેકન્ડનો જ છે, જેમાં ઇન્સ્પેક્ટર યુવાનને સતત 6 વખત થપ્પડ મારતા જોઈ શકાય છે. યુવાન ચૂપચાપ ઉભો છે, જ્યારે આજુબાજુમાં બીજા લોકો પણ જોવા મળે છે. ઘટનાસ્થળે હાજર કોઈ વ્યક્તિએ તેમના મોબાઇલ ફોન પર વીડિયો રેકોર્ડ કર્યો હતો, જે હવે વાયરલ થઈ ગયો છે. KHABARCHHE.COM આ વીડિયોની પુષ્ટિ કરતુ નથી.
જોકે વીડિયોમાં યુવકનો ચહેરો સ્પષ્ટ દેખાતો નથી, પરંતુ પોલીસ અધિકારીઓએ આ મામલાને ગંભીરતાથી લીધો છે. સોશિયલ મીડિયા પોસ્ટના જવાબમાં, બિજનોર પોલીસે જણાવ્યું કે, સર્કલ ઓફિસર (CO) નગીનાને આ મામલાની તપાસ કરવાનો નિર્દેશ આપવામાં આવ્યો છે અને રિપોર્ટ માંગવામાં આવ્યો છે.
અહેવાલો અનુસાર, આ વીડિયો થોડા મહિના જૂનો હોવાનું કહેવાય છે. તે સમયે, ઇન્સ્પેક્ટર સંજય કુમાર યાદવ તેમના વિસ્તારના એક ગામની મુલાકાત લઈ રહ્યા હતા. એક યુવક પર સ્થાનિક દુકાનમાંથી સામાન ચોરી કરવાનો આરોપ હતો. એવો આરોપ છે કે, ઇન્સ્પેક્ટરે ગામલોકોની સામે જ યુવકને માર માર્યો હતો.
વિડીયો સામે આવ્યા પછી, જિલ્લામાં ચર્ચાઓ શરૂ થઈ ગઈ. સોશિયલ મીડિયા પર ઘણા લોકો પોલીસના વર્તન પ્રત્યે નારાજગી વ્યક્ત કરી રહ્યા છે. કેટલાક લોકો આ મામલાની સંપૂર્ણ સત્યતા જાહેર કરવાની પણ માંગ કરી રહ્યા છે. પોલીસનું કહેવું છે કે તપાસ પૂર્ણ થયા પછી સત્ય બહાર આવશે.
5.jpg)
