નોટબંધીના નવ વર્ષ પછી, રાજધાની દિલ્હીમાં જૂની 500 અને 1000 રૂપિયાની નોટોથી ભરેલી ઘણી બેગ મળી આવી છે. તેમની કુલ કિંમત રૂ. 3.60 કરોડ હોવાનો અંદાજ મુકવામાં આવે છે. પોલીસે ઉત્તર દિલ્હીના વઝીરપુર વિસ્તારમાં શાલીમાર મેટ્રો સ્ટેશન નજીકથી આ મોટી માત્રામાં જૂની નોટો જપ્ત કરી છે. તેની સાથે પોલીસે ચાર લોકોની ધરપકડ પણ કરી છે.
મીડિયા સૂત્રોના એક અહેવાલ મુજબ, આરોપીઓએ પૂછપરછ દરમિયાન ખુલાસો કર્યો હતો કે, તેમને કમિશનની લાલચ આપવામાં આવી હતી. બે યુવાનો, તરુણ અને આશિષ, તેમને જૂની નોટો પૂરી પાડતા હતા. પોલીસ હાલમાં તરુણ અને આશિષની પણ શોધ કરી રહી છે. પોલીસના જણાવ્યા અનુસાર, તેમને એક સૂચના મળી હતી, જેના આધારે વઝીરપુર વિસ્તારમાં દરોડો પાડવામાં આવ્યો હતો. દરોડા દરમિયાન, જૂની 500 રૂપિયા અને 1000 રૂપિયાની નોટોથી ભરેલી ઘણી બેગ મળી આવી હતી. ચિંતાજનક વાત એ છે કે, આટલી બધી મોટી માત્રામાં મળી આવેલી ચલણી નોટ 2016માં અમાન્ય જાહેર કરવામાં આવી હતી.
હાલમાં, પોલીસની પ્રાથમિક તપાસમાં સૌપ્રથમ એ નક્કી કરવાનું છે કે, આ નાણાંના સ્ત્રોત અને આ નેટવર્કમાં કોણ કોણ સામેલ છે. મીડિયા સૂત્રો સાથે વાત કરતા, એક પોલીસ અધિકારીએ જણાવ્યું હતું કે, 'અમે જે લોકોની અટકાયત કરી છે, તેમની પૂછપરછ કરી રહ્યા છીએ. રોકડ ક્યાંથી આવી અને આ નેટવર્કમાં કેટલા લોકો સામેલ છે તેની માહિતી અમે એકત્રિત કરી રહ્યા છીએ.'
આ કેસમાં પોલીસે જે ચાર માણસોની ધરપકડ કરી છે તે લોકોએ આ જૂની 500 અને 1000 રૂપિયાની નોટો ઓછી કિંમતે વેચવાનું કાવતરું ઘડ્યું હતું. આરોપીઓએ દાવો કર્યો હતો કે, આ જૂની નોટો હજુ પણ રિઝર્વ બેંક ઓફ ઇન્ડિયામાં બદલી શકાય છે.
એક અંગ્રેજી અખબારે તેના અહેવાલમાં કહ્યું હતું કે, એક મોટી ગેંગ ઓછી કિંમતે જૂની નોટો બદલવાનું વચન આપીને લોકોને છેતરતી હતી. ગેંગે દાવો કર્યો હતો કે, RBIમાં તેમનું આધાર કાર્ડ બતાવીને જૂની નોટો બદલી શકાય છે. તપાસમાં એ પણ બહાર આવ્યું છે કે, બધા આરોપીઓ ઝડપી અને ગેરકાયદેસર પૈસા કમાવવા માંગતા હતા. આ કારણોસર, તેઓએ આ નેટવર્ક ઉભું કર્યું અને જૂની 500-1000 રૂપિયાની નોટો બદલવાની રમત શરૂ કરી દીધી.
પોલીસના જણાવ્યા અનુસાર, તરુણ અને આશિષે તેમને નોટો બદલવા માટે 20 ટકા કમિશન આપતા હતા. બધા વ્યવહારો અને સંદેશાવ્યવહાર મોબાઇલ ફોન દ્વારા કરવામાં આવતા હતા. પોલીસ હાલમાં તરુણ અને આશિષ બંનેને શોધી રહી છે.
15.jpg)
