પશ્ચિમ બંગાળના ઉત્તર 24 પરગણા જિલ્લામાં એક ખાનગી શાળામાંથી 1.77 કરોડ રૂપિયા રોકડા જપ્ત કરવામાં આવ્યા છે. આટલી મોટી રોકડ રકમની સાથે સાથે શાળામાંથી દારૂની બોટલો અને કોન્ડોમ પણ મળી આવ્યા છે. આનાથી રાજકીય વિવાદ વધી ગયો છે. ઉત્તર 24 પરગણા જિલ્લાના કાંચરાપાડામાં આવેલી હાર્નેટ ઇંગ્લિશ મીડિયમ સ્કૂલમાં મોટી રકમની રોકડ જપ્તી થઈ છે. બુધવારે રાત્રે (10 જૂન, 2026) શરૂ થયેલું સર્ચ ઓપરેશન ગુરુવારે વહેલી સવારે લગભગ 4 વાગ્યા સુધી ચાલુ રહ્યું. આ મામલાએ ત્યારે ગંભીર વળાંક લીધો જ્યારે પૈસાની સાથે સાથે શાળાની અંદરથી વાંધાજનક વસ્તુઓ પણ મળી આવી.
શાળામાંથી ચલણી નોટો મળી આવવા અંગે પશ્ચિમ બંગાળના મંત્રી અર્જુન સિંહે કહ્યું, '... જે રીતનો ભ્રષ્ટાચાર જોવા મળી રહ્યો છે, તે જોતા શાળાઓને પણ વૈભવી સ્થળોમાં રૂપાંતરિત કરી દેવી જોઈએ, પછી ભલે તે સુરેન્દ્રનાથ કોલેજ હોય કે હોર્નેટ સ્કૂલ. હોર્નેટ સ્કૂલ વિશે પ્રશ્નો ઉભા થયા હતા, અને આજે સાબિત થઇ ગયું છે કે શાળામાં ઓછામાં ઓછા 50 કરોડ રૂપિયા હતા. છેલ્લા દસ દિવસથી ત્યાંથી પૈસા બહાર મોકલવામાં આવી રહ્યા હતા...'
એવા અહેવાલ છે કે, બીજાપુરના ધારાસભ્ય સુદિપ્ત દાસ તેમના મતવિસ્તારમાં શૈક્ષણિક સંસ્થાઓનો 'ડેટા બેંક' બનાવી રહ્યા છે. આ પ્રયાસના ભાગ રૂપે, ધારાસભ્યના પ્રતિનિધિઓને આ શાળા વિશે જાણવા મળ્યું. ત્યારપછી, સુદિપ્ત દાસ બુધવારે રાત્રે શાળામાં પહોંચ્યા અને પોલીસને ફોન કર્યો. તપાસ દરમિયાન રોકડ રકમ મળી આવી હતી, અને તે જ રાત્રે શાળામાં નોટ ગણવાનું મશીન પણ લાવવામાં આવ્યું હતું. ત્યાર પછી, મોટી માત્રામાં રોકડ રકમ હોવાને કારણે વધુ મશીનો મંગાવવામાં આવ્યા હતા.
સુદિપ્ત દાસે કહ્યું, 'ભૂતપૂર્વ રાજ્ય મંત્રી પાર્થ ચેટર્જીના ઘરેથી પૈસા મળી આવ્યા હતા. હવે, શાળામાંથી રોકડ મળી આવી છે. અહીં ગેરરીતિના આરોપો લાગ્યા છે. ત્યાર પછી આજે આ મામલો પ્રકાશમાં આવ્યો છે.' ધારાસભ્યએ એમ પણ કહ્યું, 'આ પૈસા શાળાના નથી. આ કમલ અધિકારી, સુબોધ અધિકારી અને પાર્થ ભૌમિક, જે તમામ તૃણમૂલ કોંગ્રેસના નેતાઓ છે તેનું આ કાળું નાણું છે. શું તેમણે ED અને CBIના દરોડાના ડરથી આ શાળામાં આટલા પૈસા છુપાવ્યા હતા?'
ધારાસભ્યએ દાવો કર્યો હતો કે, કાંચરાપારા નગરપાલિકાના ભૂતપૂર્વ અધ્યક્ષ કમલ શાળાની વ્યવસ્થાપન સમિતિના અધ્યક્ષ હતા. જોકે, આ બાબતે કમલ, સુબોધ કે પાર્થ તરફથી કોઈ સત્તાવાર પ્રતિભાવ મળ્યો નથી.
https://twitter.com/PTI_News/status/2064965704106012861
શાળાના આચાર્ય વિકાસ ચંદ્ર પાલે દાવો કર્યો હતો કે, પ્રાપ્ત થયેલી રોકડ પ્રવેશ ફીની હતી. આચાર્યએ એવો પણ દાવો કર્યો હતો કે, તેમને ખબર નથી કે કોન્ડોમ શાળાના 'સિક રૂમમાં' કેવી રીતે પહોંચ્યા. તેમણે કહ્યું, 'પ્રવેશ માટે મળેલા પૈસા એપ્રિલ મહિનાથી એકઠા થઈ રહ્યા હતા. આ પૈસા બેંકમાં મોકલવાના હતા. એકાઉન્ટ્સ વિભાગ આ પૈસાના હિસાબની તપાસ કરશે.'
પોલીસના જણાવ્યા અનુસાર, વસૂલવામાં આવેલા પૈસાના સ્ત્રોત અને આટલી મોટી રકમ શાળામાં કેવી રીતે આવી તે શોધવા માટે તપાસ ચાલી રહી છે. વહીવટીતંત્ર માને છે કે તપાસ રિપોર્ટ જાહેર થયા પછી આ બાબત સ્પષ્ટ થશે.
સૂત્રોના જણાવ્યા અનુસાર, પૈસા મળ્યા પછી, પૂછપરછ દરમિયાન તેમના નિવેદનોમાં વિસંગતતાઓ મળી આવતા પોલીસે શાળાના કેશિયર અભિક નાથ અને સહાયક એકાઉન્ટન્ટ સયાન ઘોષની ધરપકડ કરી હતી. કોલકાતાની સુરેન્દ્રનાથ કોલેજમાં વિદ્યાર્થી સંઘ રૂમમાં એક કબાટમાંથી ઉધઈ ખાઈ ગયેલી ચલણી નોટોથી ભરેલી સુટકેસ મળી આવ્યાના એક અઠવાડિયા પછી આ ઘટના બની છે. તે સમયે, શસ્ત્રો અને ગર્ભનિરોધક ગોળીઓના પેકેટ પણ મળી આવ્યા હતા.
