અલીગઢમાં એક કિસ્સો એવી વાર્તા બની ગઈ છે જેણે સમગ્ર વિસ્તારમાં ચર્ચા જગાવી છે. એક મહિલા, તેની પુત્રીના નક્કી થયેલા લગ્ન, તેના થનારા જમાઈ... અને પછી તે જ જમાઈ સાથે અચાનક અફેર અને તેનું જમાઈ સાથે ભાગી જવું... હવે, આ વાર્તાએ એક નવો વળાંક લીધો છે. શરૂઆતમાં જે મહિલા તેના જમાઈ સાથે ભાગી ગઈ હતી, તે હવે તેના બનેવી સાથે ભાગી ગઈ છે. પોલીસ રેકોર્ડ, ફરિયાદો અને પરિવારના દાવાઓ વચ્ચે, આ સમગ્ર ઘટના આખા વિસ્તારમાં ચર્ચામાં છવાઈ ગઈ છે.
આ વાત અલીગઢના મડરક વિસ્તારમાં શરૂ થાય છે. ત્યાં રહેતો એક પરિવાર તેમની પુત્રીના લગ્નની તૈયારી કરી રહ્યો હતો. લગ્નની તારીખ 16 એપ્રિલ, 2025 નક્કી કરવામાં આવી હતી... ઘરેણાં, રોકડ અને સંબંધીઓ ઘરમાં આવવા લાગ્યા હતા. પરંતુ લગ્નના માત્ર 12 દિવસ પહેલા, એક એવી ઘટના બની જેના કારણે આખો પરિવાર સ્તબ્ધ થઇ ગયો હતો.
પરિવારના સભ્યોના જણાવ્યા મુજબ, છોકરીની માતા અનિતાનું તેના થનારા જમાઈ રાહુલ સાથે અફેર ચાલુ થયું હતું. બંને ફોન પર ઘણી વાર વાત કરતા હતા. બંને વચ્ચે પ્રેમ કહાની શરૂ થઈ. પરિવાર આ સંબંધથી પરેશાન થવા લાગ્યો હતો. તેઓએ ઘણી વાર વાંધો પણ ઉઠાવ્યો, પરંતુ વાતચીત બંધ ન થઇ અને તે યથાવત રહી.
એવો આરોપ છે કે, એપ્રિલ 2025ની શરૂઆતમાં, અનિતા રાહુલ સાથે ઘરેથી રોકડ અને દાગીના લઈને નીકળી ગઈ. પરિવારે પોલીસ ફરિયાદ નોંધાવી. પોલીસે તેમને શોધી કાઢ્યા અને પોલીસ સ્ટેશન લાવ્યા. બંને પુખ્ત વયના હોવાથી, મહિલાએ જણાવ્યું કે તે પોતાની મરજીથી રાહુલ સાથે ગઈ હતી. આ પછી, તેઓ સાથે રહેવા લાગ્યા.
તેઓ બિહારના સીતામઢી જિલ્લાના એક ગામમાં જઈને રહેવા લાગ્યા, જ્યાં રાહુલ ફેરી લગાવીને કપડાં વેચતો હતો. મામલો ધીમે ધીમે ઠંડો પડી રહ્યો હોય તેવું લાગતું હતું, પરંતુ હવે તેમાં એક નવો અને ચોંકાવનારો વળાંક આવ્યો છે.
રાહુલ તાજેતરમાં અલીગઢ પાછો ફર્યો અને પોલીસમાં ફરિયાદ નોંધાવી, જેમાં જણાવ્યું કે અનિતા તેને છોડીને હવે તેના બનેવી સાથે ભાગી ગઈ છે. તેણે એવો આરોપ લગાવ્યો કે, તે લગભગ બે લાખ રૂપિયા રોકડ અને દાગીના પણ સાથે લઈને ગઈ છે. રાહુલ કહે છે કે, આ ઘટના ત્યારે બની જ્યારે તેઓ બંને સાથે રહેતા હતા.
પોલીસ સ્ટેશનમાં આવીને, મહિલા અનિતા દેવીએ સ્પષ્ટપણે જણાવ્યું કે, તે કોઈની સાથે ભાગી ગઈ નથી. તેના પર લગાવવામાં આવેલા આરોપો સંપૂર્ણપણે ખોટા હતા. તેણે દાવો કર્યો હતો કે, શરૂઆતમાં બધું સામાન્ય હતું, પરંતુ એક મહિના પછી પરિસ્થિતિ બદલાઈ ગઈ. અનિતા દેવીના જણાવ્યા અનુસાર, 'પહેલા મહિના સુધી, તેણે (રાહુલે) તેની સાથે સારો વ્યવહાર કર્યો. તે પછી, તેણે તેને બંધક બનાવવાનું શરૂ કર્યું. તે તેને ક્યાંય જવા દેતો ન હતો. તેણે તેને નશીલી દવાઓ પણ ખવડાવી હતી. તેણે એવો પણ આરોપ લગાવ્યો હતો કે, તેની પર શારીરિક અને માનસિક ત્રાસ પણ ગુજારવામાં આવતો હતો.' સાસુ અનિતા દેવી કહે છે કે, તેના જમાઈએ સાથે લઇ ગયેલા બધા રોકડ અને દાગીના ખર્ચી નાખ્યા. તેણે વધુમાં કહ્યું કે, 'તેણે મારા બધા પૈસા અને દાગીના ખાઈ લીધા. અને હવે તે મારા પર આરોપ લગાવી રહ્યો છે.'
જોકે, પોલીસનું કહેવું છે કે જે વિસ્તારમાંથી મહિલા ગઈ હોવાનો દાવો કરવામાં આવી રહ્યો છે તે વિસ્તાર બિહારમાં આવે છે. આ કારણોસર, સ્થાનિક સ્તરે કોઈ ફરિયાદ દાખલ કરવામાં આવી નથી.
આ સમગ્ર ઘટનામાં ઘણા રહસ્ય છે. અનિતા પહેલા તેની પુત્રીના થનારા પતિ એટલે કે તેના થનારા જમાઈ રાહુલ સાથે તેના લગ્ન પહેલા ભાગી ગઈ હતી. ત્યારપછી, તે તેના બનેવી દેવેન્દ્ર સાથે ભાગી ગઈ હતી. અનિતા પર રોકડ અને દાગીના લઇ જવાનો પણ આરોપ છે. આ વાર્તાનું સત્ય અને કરવામાં આવેલો આરોપ કેટલી હદ સુધી સાચો છે તે તપાસ પછી જ સ્પષ્ટ થશે. જોકે, અલીગઢમાં શરૂ થયેલી સંબંધોની આ જટિલ ગાથા ચર્ચાનો વિષય બની ગઈ છે. આ વાર્તા હવે આરોપો, ફરાર થવા અને નવા સંબંધોના દાવાઓ સુધી પહોંચી ગઈ છે.
9.jpg)
