બીજા દિવસે ભારતે પાકિસ્તાનને કેવી રીતે હંફાવ્યું, વિદેશ સચિવે આપ્યા બધા જવાબ

વિદેશ સચિવ વિક્રમ મિશ્રીએ પ્રેસ બ્રીફિંગ દરમિયાન જણાવ્યું હતું કે, સરહદ પારથી અમારી વિરુદ્ધ ઘણી ખોટી માહિતી આપવામાં આવી છે, કેટલીક બાબતો ધ્યાનમાં રાખવા જેવી છે, જેમ કે તણાવ વધવાનો ઉલ્લેખ કરવામાં આવી રહ્યો છે. પરંતુ પહેલી વાત એ છે કે, પહેલગામમાં થયેલો હુમલો તણાવ વધવાનું પહેલું કારણ છે, ભારતીય સેનાએ ગઈકાલે તેનો જવાબ આપ્યો છે. તેમણે કહ્યું કે 'ધ રેઝિસ્ટન્સ ફ્રન્ટ' (TRF) ગ્રુપ લશ્કર-એ-તૈયબાનું એક જાણીતું મોરચો છે. અમે પહેલગામ હુમલાની જવાબદારી લેનાર વ્યક્તિ વિશેની તમામ માહિતી સંયુક્ત રાષ્ટ્ર સુરક્ષા પરિષદ (UNSC)ને આપી રહ્યા છીએ. TRF વિશે સતત અપડેટ્સ આપવામાં આવી રહ્યા છે. વિક્રમ મિશ્રીએ એક ચોંકાવનારો ખુલાસો કર્યો કે જ્યારે UNSCના નિવેદનમાં TRFનું નામ સામેલ કરવાની વાત આવી ત્યારે ફક્ત પાકિસ્તાને જ તેનો વિરોધ કર્યો અને નામ હટાવી દીધું. આ સ્પષ્ટ સંકેત છે કે, પાકિસ્તાન હજુ પણ આ આતંકવાદી જૂથોને રક્ષણ અને સમર્થન આપી રહ્યું છે.

વિદેશ સચિવ વિક્રમ મિશ્રીએ વધુમાં કહ્યું કે, ભારતની કાર્યવાહી આતંકવાદી માળખાને નષ્ટ કરવા સુધી મર્યાદિત હતી; અમે નાગરિકો કે લશ્કરી મથકો પર હુમલો કર્યો નથી, પરંતુ ફક્ત આતંકવાદીઓના ઠેકાણાઓ પર જ હુમલો કર્યો છે. તેમણે કહ્યું કે, પાકિસ્તાનના માહિતી મંત્રી દ્વારા આપવામાં આવેલું નિવેદન કે અહીં કોઈ આતંકવાદી નથી તે સંપૂર્ણપણે ખોટું અને ભ્રામક છે. પાકિસ્તાન હજુ પણ વૈશ્વિક આતંકવાદનું કેન્દ્ર છે. ઓસામા બિન લાદેન ત્યાં મળી આવ્યો હતો અને પાકિસ્તાને તેને 'શહીદ' ગણાવ્યો હતો. તેમણે કહ્યું કે, પાકિસ્તાન દ્વારા 'સંયુક્ત તપાસ'ની ઓફર સમય પસાર કરવા માટે અને પોતાને બચાવવા માટે બીજી એક યુક્તિ છે. ભારતે 26/11 અને પઠાણકોટ જેવા હુમલાઓની તપાસમાં સહકાર આપ્યો હતો, પરંતુ પાકિસ્તાને કેસોને એક બાજુ પર મૂકી દીધા હતા. મુંબઈ હુમલા અંગે વિગતવાર પુરાવા આપ્યા છતાં, કોઈ નક્કર કાર્યવાહી કરવામાં આવી ન હતી. પઠાણકોટ કેસમાં, પાકિસ્તાની ટીમને DNA વિશ્લેષણ અને આતંકવાદી સંગઠનોના અધિકારીઓની માહિતી પૂરી પાડવામાં આવી હતી, પરંતુ હજુ પણ કોઈ પ્રગતિ થઈ નથી.

વિદેશ સચિવ વિક્રમ મિશ્રીએ વિશ્વ સમુદાયને અપીલ કરતા કહ્યું કે, હવે સમય આવી ગયો છે કે પાકિસ્તાનની છેતરપિંડી અને આતંકવાદની નીતિને ઓળખીને તેની સાથે કડક કાર્યવાહી કરી શકાય. પાકિસ્તાન આતંકવાદનું કેન્દ્ર છે. વિશ્વભરમાં થયેલા ઘણા આતંકવાદી હુમલાઓમાં તેના પુરાવા મળી આવ્યા છે.

વિદેશ સચિવે પાકિસ્તાનની એ દલીલને પણ સ્પષ્ટપણે નકારી કાઢી હતી કે, 7 મેના રોજ ભારતીય હુમલામાં ફક્ત નાગરિકો જ માર્યા ગયા હતા. તેમણે કડક શબ્દોમાં કહ્યું કે, અમે સ્પષ્ટ કર્યું છે કે અમારું લક્ષ્ય ફક્ત આતંકવાદીઓના ઠેકાણા હતા, તે ઠેકાણા જ્યાં આતંકવાદને પોસવામાં આવે છે, ત્યાં સુધી કે તે 'અંતિમયાત્રા' જ્યાં આતંકવાદીઓને સન્માનજનક વિદાય આપવામાં આવે છે. એક તસવીર બતાવતા વિક્રમ મિશ્રીએ કહ્યું કે, જો પાકિસ્તાન દાવો કરે છે કે ફક્ત નિર્દોષ નાગરિકો જ માર્યા ગયા છે, તો આ તસવીર શું કહે છે? તસવીરમાં લશ્કર-એ-તોયબાના કમાન્ડર અબ્દુલ રઉફ દેખાય છે જે આતંકવાદીઓના અંતિમ સંસ્કારમાં હાજરી આપી હતી.

વિદેશ સચિવ વિક્રમ મિશ્રીએ જણાવ્યું હતું કે, નીલમ-જેલમ ડેમ પ્રોજેક્ટને નિશાન બનાવવાના આરોપો ખોટા અને બનાવટી છે. ભારતે ફક્ત આતંકવાદી ઠેકાણાઓને જ નિશાન બનાવ્યા છે. જો આ ભારતીય માળખાગત સુવિધાઓને નિશાન બનાવવાનું આ બહાનું છે, તો ભારતની વળતી પ્રતિક્રિયાના પરિણામો માટે પાકિસ્તાન જવાબદાર રહેશે.

વિદેશ સચિવ વિક્રમ મિશ્રીએ જણાવ્યું હતું કે, પાકિસ્તાને જમ્મુ અને કાશ્મીરના શીખ સમુદાયને ધ્યાનમાં રાખીને હુમલા કર્યા છે. પૂંછમાં એક ગુરુદ્વારા પર હુમલો કરવામાં આવ્યો હતો અને શીખ સમુદાયના સભ્યોને નિશાન બનાવવામાં આવ્યા હતા. તેમણે કહ્યું કે હુમલામાં ત્રણ લોકો માર્યા ગયા હતા, અને ઉમેર્યું કે પૂંછમાં કુલ 16 નાગરિકો માર્યા ગયા હતા અને ઘણા લોકો ઘાયલ થયા હતા.