વેલેન્ટાઈન ડે પર ભત્રિજા સાથે પત્ની પકડાતા પતિએ બંનેના લગ્ન કરાવી દીધા

ઉત્તર પ્રદેશના બાગપત જિલ્લામાંથી સંબંધોની મર્યાદા ભૂલાવી દેતી એક ચોંકાવનારી ઘટના સામે આવી છે. અહીં એક પરિણીત મહિલાને પોતાના જ ભત્રીજા સાથે પ્રેમ થઈ ગયો હતો. છેલ્લા 5 વર્ષથી ચાલી રહેલી આ 'સીક્રેટ લવ સ્ટોરી'નો ખુલાસો વેલેન્ટાઈન ડેની રાત્રે થયો, જેના કારણે સમગ્ર ગામમાં સન્નાટો વ્યાપી ગયો છે.

શું છે સમગ્ર મામલો?

આ ઘટના દોઘટ પોલીસ સ્ટેશન વિસ્તારના ટીકરી ગામની છે. આશરે 8 વર્ષ પહેલા પૂજા નામની મહિલાના લગ્ન પંકજ સાથે થયા હતા. આ દંપતીને બે બાળકો પણ છે અને તેમનો સંસાર સુખેથી ચાલી રહ્યો હતો. જોકે, આ દરમિયાન પૂજાનો પ્રેમ તેના જ જેઠના દીકરા સાથે પાંગર્યો હતો. છેલ્લા 5 વર્ષથી બંને પરિવારની નજર બચાવીને એકબીજાને મળતા હતા.

વેલેન્ટાઈન ડે પર ભાંડો ફૂટ્યો

14 ફેબ્રુઆરી એટલે કે વેલેન્ટાઈન ડેના દિવસે બંને પ્રેમીઓ છુપાઈને મળી રહ્યા હતા ત્યારે પરિવારના સભ્યોએ તેમને રંગેહાથ પકડી પાડ્યા હતા. આ બાબતે પરિવારમાં ભારે હોબાળો થયો હતો. વિવાદ એટલો વધ્યો કે મામલો પોલીસ સ્ટેશન પહોંચ્યો. પોલીસ સ્ટેશનમાં કલાકો સુધી સમજાવટના પ્રયાસો થયા, પરંતુ કોઈ ઉકેલ ન આવતા પતિ પંકજે એવો નિર્ણય લીધો જેની કોઈએ કલ્પના પણ કરી ન હતી.

પોલીસ સ્ટેશનમાં થયા લગ્ન

પોતાની પત્નીને ભત્રીજા પ્રત્યે આટલી આસક્તિ જોઈને પતિએ ઉદારતા (કે મજબૂરી) બતાવીને પોલીસ સ્ટેશન પરિસરમાં જ બંનેના લગ્ન કરાવી દીધા. પત્ની અને ભત્રીજાએ એકબીજાને હાર પહેરાવ્યા અને પતિએ પોતે જ પોતાની પત્નીને પ્રેમી સાથે વિદાય કરી.

પોલીસના જણાવ્યા અનુસાર, આ મામલે કોઈ પણ પક્ષ તરફથી લેખિત ફરિયાદ કરવામાં આવી નથી. પરસ્પર સંમતિથી મામલો ઉકેલી લેવામાં આવ્યો છે.

આ અનોખા લગ્ન અને સંબંધોના આ વળાંકે સામાજિક મર્યાદાઓ અને પારિવારિક બંધનો પર અનેક સવાલો ઉભા કર્યા છે, જેની ચર્ચા હાલ સમગ્ર વિસ્તારમાં થઈ રહી છે.