ભારતીય હવામાન વિભાગે (IMD) દેશના દરિયાકાંઠાના વિસ્તારો માટે ગંભીર ચેતવણી જાહેર કરી છે. બંગાળની ખાડીમાં નવો મોસમી તોફાન ઝડપથી આકાર લઈ રહ્યો છે. મલેશિયા નજીક મલક્કા સ્ટ્રેટમાં બનેલું લો પ્રેશર હવે વધુ શક્તિશાળી બની રહ્યું છે અને IMD મુજબ તે 26 નવેમ્બર આસપાસ ‘સેન્યાર’ (Cyclone Senyar) નામના ચક્રવાતમાં ફેરવાઈ શકે છે. આ સિસ્ટમ 25 થી 29 નવેમ્બરની વચ્ચે આંદામાન, ઓડિશા, તમિલનાડુ સહિત દક્ષિણ ભારતના અનેક રાજ્યોમાં ભારેથી અતિભારે વરસાદ લાવી શકે છે.
કેવી રીતે ઊભું થઈ રહ્યું છે વાવાઝોડું ‘સેન્યાર’?
તાજા અપડેટ અનુસાર મલક્કા સ્ટ્રેટમાં રહેલું લો પ્રેશર પશ્ચિમ-ઉત્તર દિશામાં આગળ વધી રહ્યું છે. 25 નવેમ્બરે તે કોમોરિન વિસ્તાર, દક્ષિણ-પશ્ચિમ બંગાળની ખાડી અને શ્રીલંકા નજીક પહોંચશે. આગામી 24 કલાકમાં આ સિસ્ટમ દક્ષિણ આંદામાન સમુદ્ર પર ‘ડિપ્રેશન’નું સ્વરૂપ ધારણ કરવાની શક્યતા છે. ત્યારબાદ 26 નવેમ્બર સુધીમાં તે વધુ સશક્ત બની ચક્રવાતી તોફાનમાં રૂપાંતરિત થઈ શકે છે. ચક્રવાતનું નામ ‘સેન્યાર’ UAE દ્વારા આપવામાં આવ્યું છે, જેનો અર્થ ‘સિંહ’ થાય છે.
વરસાદની આગાહી — કયા રાજ્યોમાં થશે ભારે વરસાદ?
તમિલનાડુમાં 25 થી 27 નવેમ્બર ભારે વરસાદ, 24 તથા 28–30 નવેમ્બર અતિભારે વરસાદની ચેતવણી છે, તો કેરળ અને માહેમાં 24 થી 26 નવેમ્બર: ભારે વરસાદની શક્યતા છે. આંધ્ર પ્રદેશમાં 29–30 નવેમ્બર: કાંઠા અને યનમ વિસ્તારમાં ધોધમાર વરસાદ અને અન્ય વિસ્તારોમાં 24 નવેમ્બરે લક્ષદ્વીપમાં ભારે વરસાદની શક્યતા છે. પવનની ગતિ 65–100 કિમી/કલાક સુધી પહોંચી શકે છે, જે નુકસાનકારક બની શકે છે
વાવાઝોડાની હાલની સ્થિતિ અને શક્ય રસ્તો
હાલમાં સિસ્ટમ દરિયાઈ સપાટીથી લગભગ 1000 કિમી દૂર છે. દક્ષિણ બંગાળની ખાડીમાં બનેલા લો પ્રેશરના પ્રભાવથી 23 નવેમ્બરે કાવેરી ડેલ્ટા તથા તમિલનાડુના કેટલાક વિસ્તારોમાં વરસાદ નોંધાયો હતો. સિસ્ટમ આગળ વધીને 26 નવેમ્બર બાદ તમિલનાડુ–આંધ્ર પ્રદેશના કિનારે અટકી શકે છે અથવા ઉત્તર તરફ વળી ઓડિશા અને બાંગ્લાદેશ તરફ આગળ વધી શકે છે. તેથી આગામી 48 કલાક ચક્રવાતની ચોક્કસ દિશા નક્કી કરવા નિર્ણાયક સાબિત થશે.
માછીમારો માટે સુરક્ષાની ખાસ સૂચનાઓ
સમુદ્રમાં વધતી હલચલને ધ્યાનમાં રાખીને નીચે મુજબ ચેતવણી આપવામાં આવી છે:
27 નવેમ્બર સુધી દક્ષિણ આંદામાન સમુદ્રમાં ન જવું
25–28 નવેમ્બર દક્ષિણ-પૂર્વ બંગાળની ખાડીમાં પ્રવેશ પર પ્રતિબંધ
29 નવેમ્બર સુધી મન્નારની ખાડી, તમિલનાડુ, પુડુચેરી અને શ્રીલંકા દરિયાકાંઠે ન જવાની સલાહ
30 નવેમ્બર સુધી આંધ્ર પ્રદેશ કિનારે માછીમારી ઉપર પ્રતિબંધ
