દેશમાં ગેસની દેશવ્યાપી અછત વચ્ચે હવે કિંમતી ઘરેણાંને બદલે ગેસ સિલિન્ડર ચોરોના નિશાના પર આવી ગયા છે. ઉત્તર પ્રદેશના પ્રયાગરાજમાં એક ચોંકાવનારી ઘટના સામે આવી છે, જ્યાં ચોરો એક ઘરમાં ઘૂસી ગયા હતા, પરંતુ તેમણે ઘરેણાં અને અન્ય કિંમતી વસ્તુઓને હાથ પણ ન લગાવ્યો અને માત્ર ગેસ સિલિન્ડર લઈને ફરાર થઈ ગયા.
આ ઘટના દારાગંજ પોલીસ સ્ટેશનના અધિકારક્ષેત્ર હેઠળ આવતા ત્રિવેણી બંધ વિસ્તારમાં બની હતી. આ વિસ્તારના રહેવાસી જ્ઞાનચંદ્ર શનિવારે રાત્રે રાત્રિભોજન કર્યા બાદ તેના પરિવાર સાથે સૂવા જતા રહ્યા હતા. અડધી રાત બાદ ચોરો તેમના ઘરમાં ઘૂસી ગયા અને સીધા રસોડામાં પહોંચીને ગેસ ભરેલું સિલિન્ડર ચોરી ગયા. જ્યારે પરિવારના સભ્યો સવારે ઉઠ્યા, ત્યારે તેઓ રસોડામાં રાખેલ સિલિન્ડર ગાયબ જોઈને આશ્ચર્યચકિત થઈ ગયા. ખાસ વાત એ છે કે, ચોરોએ રસોડામાં રહેલી અન્ય વસ્તુઓ અને બાજુના રૂમમાં રાખેલા દાગીનાને અડક્યા પણ નહોતા. આનાથી સ્પષ્ટ થાય છે કે તેમનો એકમાત્ર ઉદ્દેશ્ય ગેસ સિલિન્ડર ચોરવાનો હતો.
કહેવામાં આવી રહ્યું છે કે જ્ઞાનચંદ્ર બે દિવસ અગાઉ જ ખૂબ જ મુશ્કેલીથી ગેસ એજન્સીમાંથી સિલિન્ડર મેળવવામાં સફળ રહ્યો હતો. તેમણે તેને સુરક્ષિત રાખવા માટે સાંકળથી બાંધીને રાખ્યો હતો. છતાં, ચોરો તેને ચોરી કરવામાં સફળ રહ્યા. આ ઘટનાના સમાચાર આજુબાજુમાં ફેલાતાં રહેવાસીઓ હેરાન રહી ગયા, જેના કારણે વિવિધ ચર્ચાઓ અને અટકળો શરૂ થઈ. કેટલાક લોકોએ આ ઘટનાને ‘આપત્તિમાં અવસર શોધવા’ની ઘટના ગણાવી રહ્યા છે.
આ અગાઉ પણ, પ્રયાગરાજના બહરિયા વિસ્તારમાં આવી જ ઘટના સામે આવી હતી, જ્યાં ચોરોએ જલાલપુર સિકંદરામાં સ્થિતિ પંડિત જવાહરલાલ નહેરુ ઇન્ટર કોલેજના સ્ટોરરૂમનું તાળું તોડીને ગેસ સિલિન્ડર અને અગ્નિશામક યંત્ર સહિત અનેક અન્ય વસ્તુઓની ચોરી કરી હતી. તે કિસ્સામાં પોલીસે રવિવારે સૂરજ ધુરિયા નામના સ્થાનિક ગ્રામીણની ધરપકડ કરી હતી અને ચોરાયેલ સિલિન્ડર અને અન્ય વસ્તુઓ કબજે કરી હતી.
દારાગંજમાં બનેલી ઘટના બાદ, પોલીસે કેસ નોંધીને ચોરોની શોધખોળ શરૂ કરી છે. સતત સામે આવી રહેલી આવી ઘટનાઓથી સ્પષ્ટ છે કે આ સમયે ચોરોના નિશાના પર ગેસ સિલિન્ડર છે, અને લોકોએ સતર્ક રહેવાની જરૂર છે.
