આસામમાં વિધાનસભા ચૂંટણીની તારીખો જાહેર થઈ ગઈ છે. એવામાં, તમામ રાજકીય પક્ષોએ પોતપોતાની ચૂંટણીની તૈયારીઓ શરૂ કરી દીધી છે. આ વખતે આસામમાં મુખ્ય ચૂંટણી જંગ શાસક ભાજપ અને વિપક્ષ કોંગ્રેસ વચ્ચે છે. જોકે, રાજ્યમાં કોંગ્રેસ પાર્ટીને સતત ઝટકો લાગી રહ્યો છે.
ચૂંટણી અગાઉ કોંગ્રેસના ઘણા નેતાઓએ પાર્ટીને અલવિદા કહી દીધી છે. હવે, આસામમાં માર્ગેરિટા વિધાનસભા બેઠક માટે કોંગ્રેસના ઉમેદવાર પ્રતીક બોરદોલોઈએ પણ પોતાની ઉમેદવારી પાછી ખેંચી લીધી છે. ઉલ્લેખનીય છે કે, પ્રતીક બોરદોલોઈના પિતા પ્રદ્યુત બોરદોલોઈ તાજેતરમાં જ ભાજપમાં જોડાયા હતા.
શું છે આખો મામલો
અહેવાલો અનુસાર, માર્ગેરિટા બેઠક માટે કોંગ્રેસના ઉમેદવાર પ્રતીક બોરદોલોઈએ તેમના પિતા પ્રદ્યુત બોરદોલોઈના ભાજપમાં સામેલ થયા બાદ પોતાની ઉમેદવારી પાછી ખેંચી લીધી છે. આને લઈને કોંગ્રેસનાં અધ્યક્ષ મલ્લિકાર્જુન ખડગેને પત્ર પણ મોકલ્યો છે. ઉલ્લેખનીય છે કે આ અગાઉ, પ્રતીક બોરદોલોઈના પિતા અને આસામની નાગાંવ બેઠકના લોકસભા સાંસદ પ્રદ્યુત બોરદોલોઈએ મંગળવારે કોંગ્રેસ પાર્ટીમાંથી રાજીનામું આપ્યું હતું. ત્યારબાદ, તેઓ બુધવારે ભાજપમાં જોડાયા હતા.
પ્રતીક બોરદોલોઈએ મલ્લિકાર્જૂન ખડગેને લખેલા પોતાના પત્રમાં કહ્યું કે, ‘પક્ષ પ્રત્યે આદર અને જવાબદારી સાથે, હું માર્ગેરિટા વિધાનસભા બેઠક પરથી મારી ઉમેદવારી પાછી ખેંચવાના મારા નિર્ણય વિશે જણાવવા માંગુ છું. મારા પિતાના અન્ય રાજકીય પક્ષમાં જોડાવાના નિર્ણય બાદ મને લાગે છે કે મારા માટે ઉમેદવાર તરીકે બન્યા રહેવું યોગ્ય રહેશે નહીં. જો કે, હું પુનરાવર્તન કરવા માંગુ છું કે કોંગ્રેસ પાર્ટીના આદર્શોમાં મારો વિશ્વાસ અટલ રહેશે. નેતૃત્વ જે યોગ્ય સમજાશે, હું પક્ષ માટે અને માર્ગેરિટાના વિકાસ માટે કામ કરવાનું ચાલુ રાખીશ.’
ચૂંટણી પંચે જાહેરાત કરી છે કે આસામ વિધાનસભા ચૂંટણી માટે મતદાન 9 એપ્રિલના રોજ તમામ 126 બેઠકો પર એક જ તબક્કામાં થશે. ચૂંટણી પરિણામો 4 મેના રોજ જાહેર કરવામાં આવશે.
16.jpg)
