‘બધા ભારતીયોને USમાંથી કાઢો, નહિતર...' અમેરિકન પત્રકારના ઝેરી બોલ

અમેરિકામાં ભારતીય મૂળના લોકો સામે વધી રહેલી નિવેદનબાજી અને ધમકીઓ વચ્ચે અમેરિકન પત્રકાર અને દક્ષિણપંથી કાર્યકર્તા મેટ ફર્નીએ ચેતવણી આપી છે કે 2026માં આ સમુદાયના લોકો અને હિન્દુ મંદિરોને નિશાન બનાવીને હુમલાઓ થઈ શકે છે. આટલું જ નહીં, ફર્નીએ વધુમાં કહ્યું કે અમેરિકામાં રહેતા ભારતીય મૂળના તમામ લોકોને દેશનિકાલ કરવા જોઈએ. એક સોશિયલ મીડિયા પોસ્ટમાં તેણે દાવો કર્યો હતો કે 2026માં અમેરિકામાં ભારતીયો પ્રત્યે નફરત ચરમસીમાએ પહોંચશે, અને ભારતીય મૂળના લોકો, તેમના ઘરો, વ્યવસાયો અને મંદિરો વ્યાપક હિંસાના શિકાર થશે. જોકે, વિવાદ બાદ તેણે પોસ્ટ કાઢી નાખી હતી.

ફર્નીએ કહ્યું કે ભારતીય-અમેરિકનોના જીવ બચાવવા અને દેશમાં સુમેળ જાળવવા માટે દરેકને ભારત પાછા મોકલવા જોઈએ. ભારતીયને દેશનિકાલ કરવો જોઈએ. ફર્નીએ એવો પણ દાવો કર્યો હતો કે આ હુમલાઓ શ્વેત સમુદાય દ્વારા નહીં, પરંતુ આફ્રિકન-અમેરિકન, હિસ્પેનિક-અમેરિકન અને પાકિસ્તાની મૂળના લોકો દ્વારા કરવામાં આવશે.

તેણે આરોપ લગાવ્યો હતો કે મીડિયા આવા નફરતના ગુનાઓને દબાવવાનો પ્રયાસ કરશે. તેનો માત્ર એક જ ઉકેલ છે- દરેક ભારતીયનો દેશનિકાલ કરો. ફર્ની લાંબા સમયથી અમેરિકામાં ઇમિગ્રન્ટ્સનો વિરોધી રહ્યો છે અને વારંવાર ભારતીય વિરોધી ટિપ્પણીઓ કરતો રહે છે. ભારતીયો વિરુદ્ધ નિવેદનો આપવા બદલ તેને અગાઉ નોકરીમાંથી કાઢી મૂકવામાં આવ્યો છે.

તમને જણાવી દઈએ કે, મેટ ફર્ની એક અમેરિકન કટારલેખક, લેખક અને પત્રકાર છે, જેનો સોશિયલ મીડિયા પ્લેટફોર્મ X પર ભારતીયો વિરુદ્ધ નફરત ફેલાવવાનો અને તેમના દેશનિકાલની માંગણી કરવાનો લાંબો ઇતિહાસ છે. તેને તાજેતરમાં અમેરિકન મીડિયા સંગઠન ધ બ્લેઝમાંથી કાઢી મૂકવામાં આવ્યો હતો, જ્યાં તેને H-1B વિઝા કાર્યક્રમ અને ભારતીય મુદ્દાઓ પર રિપોર્ટિંગ કરવા માટે નિયુક્ત કરવામાં આવ્યો હતો.

ફર્નીએ તાજેતરમાં ભારતીય-અમેરિકન નાગરિક કૃતિ પટેલ ગોયલ વિશે પણ અપમાનજનક ટિપ્પણીઓ કરી હતી, જેમને ઇ-કોમર્સ પ્લેટફોર્મ Etsyના CEO તરીકે નિયુક્ત કરવામાં આવ્યા છે. તેમણે કહ્યું હતું કે વધુ એક અયોગ્ય ભારતીયએ અમેરિકન કંપની સંભાળી લીધી છે, અને હું ગેરંન્ટી આપું છું કે તેમનું પહેલું પગલું દરેક અમેરિકનને કાઢીને તેમની જગ્યાએ ભારતીયોને લાવવાનું હશે. દરેક ભારતીયનો દેશનિકાલ કરો.