તરબૂચને ફ્રીજમાં રાખતા હોવ તો બંધ કરી દેશો, આ છે કારણ

ઉનાળામાં લોકો મોટાભાગે ફળો ઠંડા ખાતા હોય છે કારણ કે આ સિઝનમાં ઠંડી વસ્તુઓનો સ્વાદ વધુ સારો લાગે છે, પરંતુ જો તમે તરબૂચને ફ્રીજમાં સ્ટોર કરો છો તો આ ભૂલ ન કરો. નિષ્ણાતોના મતે ફ્રિજમાં ઠંડુ કરીને તરબૂચ ખાવાથી તમને નુકસાન થઈ શકે છે. તરબૂચમાં 92 ટકા જેટલું પાણી હોય છે. તે તમને ઉનાળામાં હાઇડ્રેટેડ રાખે છે. આ સિવાય તેમાં વિટામિન અને મિનરલ્સ હોય છે, જે તમારા માટે ખૂબ જ ફાયદાકારક છે. તરબૂચમાં પ્રોટીન, કાર્બોહાઈડ્રેટ, ફેટ અને ફાઈબર હોય છે અને તેથી જ્યારે તમે તેને ખાઓ છો, ત્યારે તમારું પેટ લાંબા સમય સુધી ભરેલું રહે છે અને તમને વારંવાર ભૂખ નથી લાગતી. તે વજન ઘટાડવા માટે પણ સારું માનવામાં આવે છે, પરંતુ જો તમે તરબૂચને ફ્રિજમાં રાખો અને તેને ઠંડુ થયા પછી ખાશો તો તમને તેનું સંપૂર્ણ પોષણ નહીં મળે.

વિશ્વભરમાં થયેલા સંશોધનમાં સામે આવ્યું છે કે તરબૂચને ઠંડુ થયા બાદ ખાવાથી તેના પોષક તત્વોમાં ઘટાડો થાય છે. 2009માં 'જર્નલ ઑફ એગ્રીકલ્ચરલ એન્ડ ફૂડ કેમિસ્ટ્રી'માં પ્રકાશિત થયેલા એક રિસર્ચ અનુસાર, તરબૂચને ઠંડું કરવાથી તેમાં રહેલા લાઇકોપીન અને બીટા-કેરોટીન તત્વોમાં ઘટાડો થાય છે. ઠંડકથી તેમાં હાજર કેરોટીનોઈડનું સ્તર 11 થી 40 ટકા ઓછું થઈ જાય છે.

નિષ્ણાતોના મતે, સામાન્ય તાપમાનમાં પણ, તમે તરબૂચને કાપ્યા વિના થોડા દિવસો સુધી આરામથી રાખી શકો છો, પરંતુ જો તમે તેને કાપી નાખો છો, તો પછી તેને જલદી ખાઓ. તરબૂચને ફ્રીજમાં ન રાખવાનો પ્રયાસ કરો. બીજી બાજુ, જો તેને રાખવાની જરૂર હોય, તો તેને કાપશો નહીં, તેને આખું રાખો અને ખાવાના થોડા સમય પહેલા તાપમાન સામાન્ય થયા પછી તેને કાપી નાખો.

તરબૂચને રેફ્રિજરેટરમાં રાખવાથી તેના પોષક તત્ત્વો નષ્ટ થાય છે, પરંતુ તેનો એક ગેરલાભ એ પણ છે કે ખૂબ ઠંડું તરબૂચ ખાવાથી તમારા ગળામાં દુખાવો થઈ શકે છે. આ સિવાય જો તેને લાંબા સમય સુધી કાપવામાં આવે તો તેનાથી ફૂડ પોઈઝનિંગ પણ થઈ શકે છે.

જો તમે રાત્રે તરબૂચને કાપીને ફ્રિજમાં રાખો અને બીજા દિવસે સવારે તેને ખાશો તો તેનાથી તમને ફાયદો નહીં થાય, નુકસાન થશે. તેથી, હંમેશા તાજા કાપેલા તરબૂચ ખાઓ. બીજી તરફ, જો તમે તેને ફ્રિજમાં રાખ્યું હોય તો પણ તેને ખાવાના થોડા સમય પહેલા ફ્રીજમાંથી બહાર કાઢીને રાખો. જ્યારે તેનું તાપમાન સામાન્ય થઈ જાય ત્યારે જ તેને ખાઓ.