સુરતના જાણીતા એડવોકેટ શ્રેયસ દેસાઇ અને તેમના પરિવાર દ્વારા શુદ્વ ચાંદીનો ગોલ્ડ પ્લેટેડ હાર કે જેના મોટા ગોળ પેન્ડન્ટમાં ભગવાન શ્રીકૃષ્ણની ટચલી આંગળી પર ગોવર્ધન પર્વતને ધારણે કરી ગ્રામ્યજનો અને ગાય વગેરેને આશ્રય આપે છે એ દ્વશ્ય સુક્ષ્મ શિલ્પકામ કરીને કંડારવામાં આવ્યું છે. તેવો હાર ડાકોરના શ્રીરણછોડ રાયજીને સાદર અર્પણ કરાયો છે.
આ અદ્વિતીય કલાત્મક આભુષણની વિશેષતાઓમાં શ્રીકૃષ્ણ લીલાની સુક્ષ્મ અને કલાત્મક કોતરણી ઉપરાંત દિવ્યતેજનું પ્રતિક એવા પ્રીમિયમ કુંદન સ્ટોનની બોર્ડર છે. તેમજ મોતી અને પન્નાના મણકાથી સજ્જ આકર્ષક લટકણ બનાવવામાં આવી છે. આ શાહી ટેમ્પલ જ્વેલરી માત્ર એક આભૂષણ નથી પણ ભક્તિ, સુક્ષ્મ કલા અને અવિનાશી સૌન્દર્યથી ઓપતી કલાકૃતિ છે. આ હાર શ્રેયસ દેસાઇના અનુરોધ પર સુરતના વી.એન. મલજી જ્વેલર્સ દ્વારા તૈયાર કરાયો છે. આ હારનું મુલ્ય રૂ. 1.85 લાખ છે.
