ગુજરાત એન્ટી કરપ્શન બ્યુરો (ACB) દ્વારા લાંચિયા અધિકારીઓ સામે લાલ આંખ કરવામાં આવી છે. જામનગર જિલ્લાના સપર સબ ડિવિઝનની PGVCL કચેરીના ડેપ્યુટી એન્જિનિયર અને આસિસ્ટન્ટ લાઇનમેનને નવા વીજ કનેક્શન માટે ₹80,000ની લાંચ લેતા ACBની ટીમે રંગેહાથ ઝડપી પાડ્યા છે. ACBએ ભ્રષ્ટાચાર નિવારણ અધિનિયમ (Prevention of Corruption Act) હેઠળ બંને આરોપીઓ સામે ગુનો નોંધી આગળની તપાસ હાથ ધરી છે.
ACBના જણાવ્યા અનુસાર, આ કેસના ફરિયાદીએ પોતાના ગેસ્ટ હાઉસ માટે વીજ લોડ વધારવા અને નવું વીજ કનેક્શન મેળવવા માટે સપર સબ ડિવિઝન PGVCL કચેરીમાં અરજી કરી હતી. જો કે, લાંબા સમય સુધી આ અરજી પર કોઈ પણ પ્રકારની કાર્યવાહી કરવામાં આવી ન હતી. ત્યારબાદ નવું ટ્રાન્સફોર્મર મૂકવા, મીટર ફિટ કરવા અને વીજ જોડાણ આપવાના બદલામાં ડેપ્યુટી એન્જિનિયર ઋષિ દિનેશચંદ્ર પરમારે કથિત રીતે ₹1 લાખની લાંચની માંગણી કરી હતી.
ફરિયાદી સાથેની રકઝક અને વાટાઘાટોના અંતે, આરોપી ડેપ્યુટી એન્જિનિયરે લાંચની રકમ ઘટાડીને ₹80,000 નક્કી કરી હતી. પરંતુ ફરિયાદી આ લાંચના પૈસા આપવા માંગતા ન હોવાથી, તેમણે સીધો ACBનો સંપર્ક કર્યો હતો. ફરિયાદીની અરજીના આધારે ACBની ટીમે લાંચનું છટકું ગોઠવ્યું હતું.
https://twitter.com/DeshGujarat/status/2067288142919663899
ગોઠવાયેલા છટકા દરમિયાન, ડેપ્યુટી એન્જિનિયર ઋષિ પરમાર વતી આસિસ્ટન્ટ લાઇનમેન મનોજભાઈ ડુંગરામ પ્રજાપતિ ફરિયાદીને મળ્યો હતો અને તેણે લાંચની ₹80,000ની રકમ સ્વીકારી હતી. લાઇનમેને પૈસા લેતાની સાથે જ ત્યાં વોચમાં ઉભેલી ACBની ટીમે તેને રંગેહાથ પકડી લીધો હતો. આ સફળ ટ્રેપ બાદ કચેરીમાં જ હાજર મુખ્ય આરોપી ડેપ્યુટી એન્જિનિયર ઋષિ પરમારની પણ ACBએ અટકાયત કરી લીધી છે.
