ગુજરાતમાં ચાંદીપુરા વાયરસથી સ્થિતિ બગડી, શંકાસ્પદ કેસ 200 પાર, 39 પોઝિટિવ અને 23એ જીવ ગુમાવ્યા

રાજ્યમાં ચાંદીપુરા વાયરસના કેસોમાં સતત થઈ રહેલા વધારાને પગલે આરોગ્ય તંત્ર હરકતમાં આવ્યું છે. 30 જૂનથી 8 ઓગસ્ટ દરમિયાન રાજ્યભરમાં ચાંદીપુરા વાયરસના 217 જેટલા શંકાસ્પદ કેસો નોંધાતા ભારે ચિંતાનો માહોલ સર્જાયો છે.

આરોગ્ય વિભાગના આંકડા અનુસાર, કુલ 217 શંકાસ્પદ કેસોમાંથી 208 દર્દીઓના લેબોરેટરી ટેસ્ટના પરિણામ આવી ગયા છે. આમાંથી 39 કેસ ચાંદીપુરા વાયરસના પોઝિટિવ હોવાની પુષ્ટિ થઈ છે, જ્યારે બાકીના રિપોર્ટ નેગેટિવ આવ્યા છે. વાયરસના ગંભીર સંક્રમણના કારણે અત્યાર સુધીમાં 23 દર્દીઓએ પોતાના જીવ ગુમાવ્યા છે, જે આ રોગની ગંભીરતા દર્શાવે છે. હાલમાં પણ 9 શંકાસ્પદ દર્દીઓના લેબોરેટરી રિપોર્ટ આવવાના બાકી છે, જેના પર તંત્રની નજર છે.

ગુજરાતમાં છેલ્લા કેટલાક સમયથી વધી રહેલા ચાંદીપુરા વાયરસના ઉપદ્રવને કારણે ગ્રામીણ તેમજ શહેરી વિસ્તારોમાં સંક્રમણ અટકાવવા માટેના પ્રયાસો તેજ કરવામાં આવ્યા છે. આ વાયરસ ખાસ કરીને નાના બાળકોને ઝડપથી નિશાન બનાવતો હોવાથી વાલીઓમાં ભારે ફાળ પડી છે.

સંપૂર્ણ આંકડાકીય વિગત

 કુલ શંકાસ્પદ કેસ: 217 (30 જૂનથી 8 ઓગસ્ટ)
 જાહેર થયેલા રિપોર્ટ: 208
 પોઝિટિવ કેસ: 39
 કુલ મૃત્યુ: 23
 પેન્ડિંગ રિપોર્ટ: 09

વાયરસના ઝડપી પ્રસાર અને ગંભીરતાને ધ્યાનમાં રાખીને આરોગ્ય વિભાગ દ્વારા અસરગ્રસ્ત વિસ્તારોમાં સઘન કામગીરી શરૂ કરવામાં આવી છે:

•  સેન્ડફ્લાય નિયંત્રણ: કચ્ચા અને માટીના ઘરોમાં સેન્ડફ્લાય (રેતીની માખી)ના નાશ માટે પાવડરનું કંટ્રોલ સ્પ્રેઇંગ કરવામાં આવી રહ્યું છે.
•  ઘરે-ઘરે સર્વેક્ષણ: ગ્રામીણ અને અસરગ્રસ્ત વિસ્તારોમાં આ વિશિષ્ટ સર્વે કામગીરી તીવ્ર બનાવાઈ છે.
•  આરોગ્ય વિભાગની સલાહ: જો બાળકોમાં તીવ્ર તાવ, ઉલટી કે મગજના સોજા (એન્સેફાલાઇટિસ) જેવાં લક્ષણો જોવા મળે, તો વિલંબ કર્યા વગર તુરંત જ
• નજીકના પ્રાથમિક આરોગ્ય કેન્દ્ર (PHC) કે સરકારી હોસ્પિટલનો સંપર્ક કરવા તબીબોએ અપીલ કરી છે.