ગુજરાતમાં મેઘરાજાનો ત્રીજો રાઉન્ડ શરૂ થશે, અંબાલાલની આગાહી

ગુજરાતમાં વરસાદનું પ્રમાણ ઘટ્યા બાદ ઉકાળા અને બફારાથી અકળાયેલા લોકો માટે રાહતના સમાચાર આવ્યા છે. હવામાન વિભાગ  અને હવામાન નિષ્ણાત અંબાલાલ પટેલની તાજી આગાહી મુજબ, રાજ્યમાં નવી વરસાદી સિસ્ટમ સક્રિય થતાં મેઘ મહેરનો ત્રીજો રાઉન્ડ શરૂ થવા જઈ રહ્યો છે. આગામી 6 દિવસ દરમિયાન રાજ્યના જુદા જુદા ભાગોમાં હળવાથી મધ્યમ વરસાદી ઝાપટાં સાથે 30 થી 40 કિમી/કલાકની ઝડપે પવન ફૂંકાવાની શક્યતા છે.

હવામાન વિભાગના જણાવ્યા અનુસાર, મોન્સૂન ટ્રફ અને વેસ્ટર્ન ડિસ્ટર્બન્સ સહિત કુલ ત્રણ વરસાદી સિસ્ટમ એકસાથે સક્રિય થઈ રહી છે. આના કારણે ઉત્તર અને મધ્ય ગુજરાતના વિસ્તારોમાં વરસાદનું જોર વધશે. આગામી બે દિવસ દરમિયાન ઉત્તર ગુજરાતના 10 જિલ્લાઓમાં વીજળીના કડાકા-ભડાકા અને સુસવાટા મારતા તેજ પવન સાથે વરસાદની ચેતવણી આપવામાં આવી છે.

અસરગ્રસ્ત વિસ્તારો: બનાસકાંઠા (વાવ-થરાદ), પાટણ (સમી-હારીજ), મહેસાણા, સાબરકાંઠા, અરવલ્લી, પંચમહાલ, દાહોદ અને મહીસાગર.

અમદાવાદ અને ગાંધીનગર: બંને શહેરોમાં ગાજવીજ અને વાવાઝોડા જેવા તેજ પવન સાથે વરસાદી ઝાપટાં પડી શકે છે.

સૌરાષ્ટ્ર, કચ્છ અને દક્ષિણ ગુજરાત: વડોદરા સહિત દક્ષિણ ગુજરાતના ભાગો તેમજ સૌરાષ્ટ્ર અને કચ્છના વિવિધ વિસ્તારોમાં છૂટોછવાયો વરસાદ જોવા મળશે.

હવામાન નિષ્ણાત અંબાલાલ પટેલે આગામી દિવસો માટે વિગતવાર પૂર્વાનુમાન વ્યક્ત કર્યું છે. તેમના જણાવ્યા મુજબ 9 થી 12 ઓગસ્ટ દરમિયાન વરસાદનું ભાદરવું જોર જોવા મળશે. મધ્યપ્રદેશમાં ભારે વરસાદના કારણે 15 ઓગસ્ટ સુધીમાં તાપી અને નર્મદા નદીઓના જળસ્તરમાં નોંધપાત્ર વધારો થઈ શકે છે. હાલમાં ચાલી રહેલો મઘા નક્ષત્રનો વરસાદ ખેતરોમાં ઊભા પાક માટે અમૃત સમાન સાબિત થશે.  15 ઓગસ્ટ પછી પણ 17, 18, 19 ઓગસ્ટ અને 23 ઓગસ્ટ બાદ ફરી વરસાદી ઝાપટાં ચાલુ રહેશે.નવેમ્બર મહિના સુધી ગુજરાતમાં વરસાદી વાતાવરણ બનેલું રહેશે.

સપ્ટેમ્બર મહિનામાં અરબ સાગર અને બંગાળની ખાડી સક્રિય થવાથી વાવાઝોડા સાથે મુશળધાર વરસાદની શક્યતા છે. 13 સપ્ટેમ્બર આસપાસ ગરમીનો પ્રકોપ પણ વધશે. સપ્ટેમ્બરનો આ વરસાદ તૈયાર પાકને નુકસાન પહોંચાડી શકે છે અને જીવજંતુઓનો ઉપદ્રવ વધારી શકે છે, તેથી ખેડૂતોને અત્યારથી જ સાવચેત રહેવા જણાવાયું છે.

હવામાન વિભાગે સ્પષ્ટ કર્યું છે કે 14 ઓગસ્ટ સુધીના આગામી 6 દિવસીય પૂર્વાનુમાન દરમિયાન રાજ્યના તમામ જિલ્લાઓમાં છૂટાછવાયા સ્થળોએ હળવાથી મધ્યમ વરસાદી ઝાપટાં ચાલુ રહેશે. આ સમયગાળા દરમિયાન અત્યાર સુધી કોઈ અતિભારે વરસાદનું ઓરેન્જ કે રેડ એલર્ટ આપવામાં આવ્યું નથી. જોકે, વીજળીના કડાકા અને તેજ પવનની શક્યતા હોવાથી નાગરિકોને જરૂરી સાવચેતી રાખવા સલાહ આપવામાં આવી છે.