વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય કેબિનેટે અમદાવાદ મેટ્રો રેલ પ્રોજેક્ટના ફેઝ-2(A)ને લીલી ઝંડી આપી દીધી છે. આ નવા ફેઝ અંતર્ગત 6.032 કિલોમીટર લાંબો નવો કોરિડોર બનાવવામાં આવશે, જેમાં કુલ 5 સ્ટેશનો (4 એલિવેટેડ એટલે કે બ્રિજ પર અને 1 અંડરગ્રાઉન્ડ એટલે કે જમીનની અંદર) તૈયાર કરવામાં આવશે. ફેઝ-2(A) કાર્યરત થતાં જ અમદાવાદ-ગાંધીનગર વચ્ચે કુલ 77.63 કિલોમીટરનું સક્રિય મેટ્રો રેલ નેટવર્ક ઉપલબ્ધ બનશે. આ નવા કોરિડોરમાં આશ્રમ રોડ, કોટેશ્વર પ્રાચીન મંદિર, સાબરમતી રિવર, સરદાર નગર અને એરપોર્ટ સ્ટેશનનો સમાવેશ થાય છે.
બાંધકામ સમયગાળા દરમિયાનના વ્યાજ (IDC) સહિત આ સમગ્ર પ્રોજેક્ટનો કુલ અંદાજિત ખર્ચ 2,169.04 કરોડ રૂપિયા થશે.
અમદાવાદ મેટ્રો પ્રોજેક્ટના ફેઝ-2(A) અંતર્ગત આશરે 6.032 કિલોમીટરના નવા મેટ્રો કોરિડોરના વિકાસની પરિકલ્પના કરવામાં આવી છે. તેનો મુખ્ય ઉદ્દેશ્ય લોકોને સીધી એરપોર્ટ સુધીની કનેક્ટિવિટી પૂરી પાડીને જાહેર પરિવહન વ્યવસ્થાને મજબૂત બનાવવાનો છે. આ ઉપરાંત, તે એવા અગ્રણી રહેણાંક અને વ્યાપારિક વિસ્તારોને જોડશે જ્યાં હાલમાં પરિવહનની પૂરતી અને કાર્યક્ષમ સુવિધાઓ નથી.
આ ફેઝ દ્વારા મુખ્ય રહેણાંક અને કોમર્શિયલ હબને હાલના અમદાવાદ-ગાંધીનગર કોરિડોર સાથે જોડી દેવામાં આવશે. વળી, આ વિસ્તારની આસપાસ 'વર્લ્ડ પોલીસ ગેમ્સ 2029' અને 'કોમનવેલ્થ ગેમ્સ 2030' માટે રમતગમતની સુવિધાઓ (સ્પોર્ટ્સ ફેસિલિટીઝ) વિકસાવવામાં આવે તેવી પણ પૂરેપૂરી શક્યતા છે. આ મહત્વના વિસ્તારોને મેટ્રો નેટવર્ક સાથે જોડીને, ફેઝ-2(A) માત્ર કનેક્ટિવિટી જ નહીં સુધારે પરંતુ આર્થિક પ્રવૃત્તિઓ અને પ્રવાસનને પણ વેગ આપશે તેમજ સ્થાનિકો અને મુલાકાતીઓ માટે શહેરી પરિવહન વધુ સરળ બનાવશે.
રોડ ટ્રાન્સપોર્ટના એક સક્ષમ અને શ્રેષ્ઠ વિકલ્પ તરીકે મેટ્રો રેલ ઉભરી આવી છે. ફેઝ-2(A)ના વિસ્તરણ તરીકે મેટ્રો નેટવર્ક સીધું એરપોર્ટ સુધી લંબાવવાના કારણે અમદાવાદ શહેરમાં ટ્રાફિકનું ભારણ નોંધપાત્ર રીતે ઘટશે. રસ્તાઓ પર વાહનોની સંખ્યા ઓછી થતાં વાહનવ્યવહાર વધુ સુગમ બનશે, મુસાફરીના સમયમાં બચત થશે અને માર્ગ સલામતીમાં પણ વધારો થશે.
અમદાવાદ મેટ્રો રેલ પ્રોજેક્ટના ફેઝ-2(A)ના જોડાણ અને અમદાવાદ-ગાંધીનગર શહેરોમાં મેટ્રો નેટવર્કનો વ્યાપ વધવાથી પરંપરાગત અશ્મિભૂત બળતણ (પેટ્રોલ-ડીઝલ) આધારિત વાહનોના વપરાશમાં ઘટાડો થશે, જેનાથી કાર્બન ઉત્સર્જનમાં મોટો ઘટાડો નોંધાશે.
મુસાફરીના સમયમાં ઘટાડો થવાથી અને શહેરના વિવિધ ભાગો જેવા કે એરપોર્ટ, રેલવે સ્ટેશન અને બસ ડેપો સુધીની પહોંચ સરળ બનવાથી લોકો પોતાના કાર્યસ્થળ કે ગંતવ્ય સ્થાને વધુ ઝડપથી પહોંચી શકશે, જે એકંદરે ઉત્પાદકતામાં વધારો કરશે. વધુમાં, આ બહેતર કનેક્ટિવિટીથી સ્થાનિક વેપાર-ધંધાને, ખાસ કરીને નવા મેટ્રો સ્ટેશનોની આસપાસના વિસ્તારોમાં મોટો ફાયદો થશે. તેનાથી અગાઉ જ્યાં પહોંચવું મુશ્કેલ હતું તેવા વિસ્તારોમાં પણ રોકાણ અને વિકાસની નવી તકો ખુલશે.
અમદાવાદમાં ફેઝ-2(A) મેટ્રો રેલ નેટવર્કના વિસ્તરણથી સમાજના દરેક વર્ગના લોકોને સાર્વજનિક પરિવહનનો સમાન લાભ મળશે, જેનાથી પરિવહનની અસમાનતા દૂર થશે. મુસાફરીનો સમય ઘટવાથી અને આવશ્યક સેવાઓ સુધીની પહોંચ સરળ બનવાથી લોકોના જીવનધોરણમાં સુધારો થશે.
આ પ્રોજેક્ટ અમદાવાદ શહેરના ભવિષ્યની સસ્ટેનેબિલિટી (ટકાઉપણું) અને વિકાસની દિશા નક્કી કરવામાં મહત્વની ભૂમિકા ભજવશે. વધુમાં, અમદાવાદ મેટ્રો ફેઝ-2Aના બાંધકામની કામગીરી જ્યારે પૂરજોશમાં હશે (પીક પિરિયડ) ત્યારે આશરે 2,000 લોકોને અને આ સિસ્ટમના ઓપરેશન તથા મેન્ટેનન્સ (સંચાલન અને જાળવણી) દરમિયાન અંદાજે 500 લોકોને રોજગારી મળવાની સંભાવના છે.
6.jpg)
