ઉત્તર પ્રદેશના કનૌજ જિલ્લાની એક સરકારી પ્રાથમિક શાળાનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે. આ વીડિયોમાં શાળાના પરિસરમાં એક વર્ગખંડમાં એક પુરુષ શિક્ષક અને એક મહિલા શિક્ષિકા એકબીજાને ચૂંબન કરતા જોવા મળે છે. આ વીડિયો સામે આવતા જ શિક્ષણ વિભાગમાં ખળભળાટ મચી ગયો છે. શાળા પ્રશાસને સંબંધિત શિક્ષકને કારણ બતાવો નોટિસ ફટકારી છે અને સમગ્ર મામલાની ઉચ્ચ અધિકારીઓને જાણ કરી છે.
સોશિયલ મીડિયા પ્લેટફોર્મ પર વાયરલ આ વીડિયો કન્નૌજના સૌરીખ બ્લોકના એક પ્રાથમિક શાળાનો હોવાનું કહેવાય છે. વીડિયોમાં પુરુષ શિક્ષક અને મહિલા શિક્ષિકા કથિત રીતે શાળાના પરિસરમાં વર્ગખંડમાં એક આત્મીય ક્ષણ શેર કરતા જોવા મળે છે. વીડિયો સામે આવ્યા પછી તે ઝડપથી વિવિધ સોશિયલ મીડિયા પ્લેટફોર્મ પર શેર કરાવા લાગ્યો, જેનાથી સ્થાનિક ચર્ચાઓ શરૂ થઈ ગઈ હતી.
એવો પણ દાવો થઈ રહ્યો છે કે આ વીડિયો પુરુષ શિક્ષકની પત્ની દ્વારા સોશિયલ મીડિયા પર વાયરલ કરવામાં આવ્યો છે. અહેવાલો અનુસાર, પુરુષ શિક્ષક અને તેની પત્ની વચ્ચે લગભગ ચાર વર્ષથી પારિવારિક ઝઘડા થઇ રહ્યા છે. બંને વચ્ચે ને આ મામલો ફેમિલી કોર્ટમાં હોવાનું કહેવાય છે. આ વચ્ચે, સોશિયલ મીડિયા પર એવો દાવો કરવામાં આવી રહ્યો છે કે પત્નીએ આ જૂનો વીડિયો હવે સાર્વજનિક કર્યો છે.
આ બાબતે કોઈ અધિકારી દ્વારા કોઈ સત્તાવાર નિવેદન જાહેર કરવામાં આવ્યું નથી. સૂત્રો સૂચવે છે કે વાયરલ વીડિયો તાજેતરનો નથી પરંતુ જૂનો છે; એવો દાવો કરવામાં આવી રહ્યો છે કે આ વીડિયો ઘણા સમય પહેલા રેકોર્ડ કરવામાં આવ્યો હતો અને હવે વાયરલ થયો છે. હાલમાં તે સ્પષ્ટ નથી કે આ વીડિયો ક્યારે અથવા કોના દ્વારા રેકોર્ડ કરવામાં આવ્યો હતો, અને તપાસ ચાલી રહી છે. જો કે, khabarchhe.com સ્વતંત્ર રીતે આ વાયરલ વીડિયોની ચકાસણી કરતું નથી.
વીડિયો વાયરલ થયા બાદ શાળા પ્રશાસને આ બાબતની નોંધ લીધી. શાળાના મુખ્ય શિક્ષકે સંબંધિત શિક્ષકને કારણ બતાવો નોટિસ જાહેર કરી છે. સાથે જ, સમગ્ર ઘટનાની વિગતો શિક્ષણ વિભાગના વરિષ્ઠ અધિકારીઓને મોકલવામાં આવી છે. વહીવટીતંત્રએ શિક્ષક પાસેથી વીડિયો અંગે સ્પષ્ટતા માંગી છે. જવાબ અને તપાસ રિપોર્ટના આધારે આગળની વિભાગીય કાર્યવાહી નક્કી કરવામાં આવશે. સરકારી શાળાના પરિસર સાથે જોડાયેલો આ કથિત વીડિયોના પ્રકાશમાં આવ્યા બાદ શિક્ષણ વિભાગે પણ આ બાબતની નોંધ લીધી છે. શાળા પરિસરને બાળકોના શિક્ષણ અને શિસ્તનું કેન્દ્ર ગણવામાં આવે છે; તેથી, જો તપાસમાં વીડિયો અને તેની સાથે સંકળાયેલા દાવાઓની સત્યતાની પુષ્ટિ થાય, તો સંબંધિત અધિકારીઓ વિભાગીય નિયમો અનુસાર કાર્યવાહી શરૂ કરી શકે છે. જો કે, તપાસ પૂર્ણ થાય તે પહેલાં આ મામલે કોઈ નિષ્કર્ષ નહીં કાઢી શકાય.
