મહારાષ્ટ્રના છત્રપતિ સંભાજીનગર જિલ્લામાં એક 'નકલી' બાબાનો પર્દાફાશ થયો છે. તે સારવાર અને ધાર્મિક વિધિઓના બહાને ગામલોકોની સાથે ગેરવર્તન કરતો અને તેમને માર મારતો હતો. ક્યારેક તે તેમને તેના બુટને સૂંઘાડતો, તો ક્યારેક તે તેમને લાકડીઓથી માર મારતો હતો. ઘટનાનો વીડિયો સામે આવ્યા પછી પોલીસે બાબા વિરુદ્ધ કેસ નોંધ્યો છે.
મીડિયા સૂત્રોના અહેવાલ મુજબ, આખો મામલો છત્રપતિ સંભાજીનગર જિલ્લાના વૈજાપુરના શિયુર ગામનો છે. બાબાની ઓળખ સંજય પાગરે તરીકે થઈ છે. આરોપ છે કે, તે છેલ્લા બે વર્ષથી અંધશ્રદ્ધા અને દંભનો ખેલ રમી રહ્યો હતો. સંજય પાગરેએ ગામલોકોની સામે દાવો કર્યો હતો કે, તેની પાસે અલૌકિક શક્તિઓ છે અને તે ભૂત પ્રેતને ભગાડી શકે છે. બાબાના જણાવ્યા મુજબ, તે પોતાની ધાર્મિક વિધિઓથી અપરિણીત લોકોના લગ્ન કરાવી શકે છે અને નિઃસંતાન યુગલોને બાળકો મેળવવામાં મદદ કરી શકે છે.
આ ધાર્મિક વિધિના બહાને, તે ગામલોકોને ત્રાસ આપતો હતો. પીડિતોને લાકડીઓથી મારવામાં આવતા હતા. પછી ભલે તે પુરુષો હોય કે સ્ત્રી હોય. ઘણા કિસ્સાઓમાં, તેમને ઝાડના પાંદડા ખવડાવવામાં આવતા હતા. અહેવાલ મુજબ, ઘણી વખત બાબા તેમના અનુયાયીઓને તેનો પેશાબ પીવા માટે દબાણ કરતા હતા, એમ કહેતો હતો કે આ સારવારનો એક ભાગ છે.
આખો મામલો ત્યારે પ્રકાશમાં આવ્યો, જ્યારે મહારાષ્ટ્ર અંધશ્રદ્ધા ઉન્મૂલન સમિતિ (MANS)ના કાર્યકરોએ સ્ટિંગ ઓપરેશન હાથ ધર્યું. તેમણે સમગ્ર ઘટનાને છુપાયેલા કેમેરા દ્વારા કેદ કરી. એક વીડિયોમાં, એક માણસ બાબાની સામે અર્ધબેભાન અવસ્થામાં બેઠો જોવા મળે છે. બે લોકો ભેગા થઈને તેને ઉભા કરવાનો પ્રયાસ કરે છે. જ્યારે બાબા બળજબરીથી તેને તેના બુટને સૂંઘાડતો જોવા મળે છે.
બીજા વીડિયોમાં, બાબા પુરુષો અને સ્ત્રીઓને લાકડીથી મારતા જોઈ શકાય છે. અહેવાલ મુજબ, સંજય પાગરે માટે લોકોને લાકડીથી માર મારવો સામાન્ય હતો. કાર્યકરોની ફરિયાદ પછી, પોલીસે તેમની સામે કેસ નોંધ્યો છે. અધિકારીઓએ સંજય પાગરે વિરુદ્ધ છેતરપિંડી, માર મારવો અને અંધશ્રદ્ધાને પ્રોત્સાહન આપવા બદલ અનેક કાનૂની કલમો હેઠળ FIR નોંધી છે.
15.jpg)
