કાનપુરના ચકેરી પોલીસ સ્ટેશન વિસ્તારમાં સ્થિત એક લગ્નના લૉનમાં એ સમયે અફરાતફરી મચી ગઈ, જ્યારે એક વરરાજા તેની પહેલી પત્નીને તલાક આપ્યા વિના બીજા લગ્ન કરવાનો પ્રયાસ કરી રહ્યો હતો, અને પહેલી પત્ની પોલીસ સાથે ત્યાં પહોંચી ગઇ. રાત્રે લગભગ 10:30 વાગ્યાની આસપાસ અચાનક થયેલા ડ્રામાથી સ્થળ પર નાસભાગ જેવી સ્થિતિ સર્જાઈ ગઈ. પહેલી પત્નીની ફરિયાદ બાદ, ચકેરી પોલીસે આરોપી વરરાજાની અટકાયત કરી અને કાનૂની કાર્યવાહી શરૂ કરી દીધી છે.
અહેવાલો અનુસાર, ચમનગંજની રહેવાસી પીડિત મહિલાએ જણાવ્યું હતું કે તેણે 2022માં જુહી લાલ કોલોનીના એક પુરુષ સાથે લગ્ન કર્યા હતા. 2024માં વિદાય પછી, દંપતી વચ્ચે મતભેદો શરૂ થઇ ગયા, અને આ મામલો હાલમાં કાનપુર કોર્ટમાં પેન્ડિંગ છે. તેના જણાવ્યા અનુસાર તેનો પતિ દરરોજ વોટ્સએપ પર તેની સાથે ચેટ કરતો હતો અને તેને મળવા પણ આવતો હતો, પરંતુ તેણે એ બીજા લગ્નની વાત સંપૂર્ણપણે છુપાવી રાખી હતી.
વરરાજાના પાડોશી એક વ્યક્તિ પાસેથી બીજા લગ્ન વિશે ખબર પડી. શંકાસ્પદ જતા તેણે તેના સાસરિયાઓને ફોન કરવાનો પ્રયાસ કર્યો, પરંતુ કોઈ જવાબ મળ્યો નહીં. ત્યારબાદ તે પહેલા સાસરિયાના ઘરે ગઈ અને માહિતી એકત્રિત કર્યા પછી સીધી ચકેરી વિસ્તારમાં આવેલા મેરેજ લૉન પહોંચી ગઈ. જેવી જ પહેલી પત્ની તેની બહેન અને પોલીસ સાથે સ્થળ પર પહોંચી લગ્નની વિધિઓ અટકી ગઈ. પોલીસને જોઈને વરરાજાએ ઘટનાસ્થળેથી ભાગી જવાનો પ્રયાસ કર્યો, જેના કારણે કન્યા અને વરરાજા બંને પક્ષના મહેમાનોમાં અફરાતફરી મચી ગઇ.
ચકેરી પોલીસે બંને પક્ષોને સ્ટેશન લઇ ગઇ, જ્યાં લાંબા સમય સુધી સમાધાનની વાતચીત ચાલી પરંતુ કોઈ ઉકેલ આવ્યો નહીં. ચકેરી પોલીસ સ્ટેશન પ્રભારી અજય પ્રકાશ મિશ્રાએ જણાવ્યું કે પહેલી પત્ની દ્વારા કરવામાં આવેલી ફરિયાદ અને આરોપોના આધારે કેસ નોંધવામાં આવ્યો છે. પહેલી પત્નીએ તેના પતિ પર અંધારામાં રાખીને ફરીથી લગ્ન કરવાનો પ્રયાસ કરવાનો આરોપ લગાવ્યો છે અને પોલીસ પાસે આરોપીઓ સામે શક્ય તેટલી કડક કાર્યવાહી કરવાની માંગ કરી છે.
