પશ્ચિમ બંગાળમાં રચાયેલી પ્રથમ ભાજપ સરકારમાં શુક્રવારે એક મહત્વનો વળાંક જોવા મળ્યો હતો. મુખ્યમંત્રી સુવેન્દુ અધિકારીની સાથે શપથ લેનારા મંત્રીઓમાં 51 વર્ષીય અગ્નિમિત્રા પોલ એકમાત્ર મહિલા ચહેરો છે. ફેશન ડિઝાઇનરમાંથી નેતા બનેલા અગ્નિમિત્રા અત્યારે બંગાળ કેબિનેટમાં નારી શક્તિનું પ્રતિનિધિત્વ કરી રહ્યા છે.
અગ્નિમિત્રા પોલે દિલીપ ઘોષ, અશોક કીર્તનીયા, ક્ષુદીરામ ટુડુ અને નિસિથ પ્રામાણિક જેવા વરિષ્ઠ નેતાઓ સાથે મંત્રી પદના શપથ લીધા હતા. તેમની પસંદગી પાછળ ભાજપની મોટી રણનીતિ માનવામાં આવે છે. ભાજપ હંમેશા મહિલા અનામત અને પ્રતિનિધિત્વની વાત કરતું રહ્યું છે, ત્યારે મમતા બેનર્જીના ગઢમાં એક મજબૂત મહિલા નેતાને આગળ કરી ભાજપે રાજકીય સંદેશ આપ્યો છે. તેઓ આસનસોલ દક્ષિણ બેઠક પરથી સતત બીજી વાર ધારાસભ્ય બન્યા છે. 2026ની ચૂંટણીમાં તેમણે તૃણમૂલ કોંગ્રેસના તાપસ બેનર્જીને 40,000થી વધુ મતોથી હરાવીને પોતાની લોકપ્રિયતા સાબિત કરી હતી.
રાજકારણમાં પ્રવેશતા પહેલા અગ્નિમિત્રા પોલ કોલકાતા અને બોલીવુડના ફેશન જગતનું જાણીતું નામ હતા. તેમણે વર્ષ 2019માં ભાજપમાં પ્રવેશ કર્યો હતો. તે પહેલા તેઓ પોતાનું ફેશન લેબલ Inga ચલાવતા હતા. તેમણે શ્રીદેવી અને હેમા માલિની જેવી દિગ્ગજ અભિનેત્રીઓ માટે પોશાક ડિઝાઇન કર્યા છે. બંગાળની પરંપરાગત 'કાંથા' કળાને લેક્મે ફેશન વીક જેવા મોટા પ્લેટફોર્મ પર લઈ જવામાં તેમનું મોટું યોગદાન રહ્યું છે.
અગ્નિમિત્રાનો જન્મ અને ઉછેર આસનસોલના એક મધ્યમ વર્ગીય પરિવારમાં થયો હતો. તેમણે બોટની (વનસ્પતિશાસ્ત્ર) માં અભ્યાસ કર્યા બાદ ફેશન ટેકનોલોજી અને મેનેજમેન્ટનો અભ્યાસ કર્યો હતો. ભાજપમાં તેઓ મહિલા મોરચાથી જોડાયા અને ટૂંક સમયમાં બંગાળ ભાજપના ઉપાધ્યક્ષ પદ સુધી પહોંચ્યા. તેમની લોકપ્રિયતા જોતા મુખ્યમંત્રી પદની રેસમાં પણ તેમનું નામ ચર્ચામાં હતું.
સફળતાની સાથે અગ્નિમિત્રા વિવાદોથી પણ ઘેરાયેલા રહ્યા છે. તેમના ચૂંટણી સોગંદનામા મુજબ તેમની સામે કુલ 23 ફોજદારી કેસો પેન્ડિંગ છે. આ કેસો મુખ્યત્વે ગેરકાયદેસર મંડળી જમાવવી, રમખાણો અને વિરોધ પ્રદર્શન દરમિયાન થયેલી હિંસા સાથે સંબંધિત છે. જોકે, હજુ સુધી કોઈ પણ કેસમાં તેઓ દોષિત ઠર્યા નથી.
બંગાળમાં જ્યારે 'મહિલા કેન્દ્રિત રાજકારણ'નો પ્રભાવ રહ્યો છે, ત્યારે અગ્નિમિત્રા પોલ ભાજપ માટે એક એવો ચહેરો બનીને ઉભર્યા છે જે જમીની સ્તરના કાર્યકર હોવાની સાથે આધુનિક વિચારધારા પણ ધરાવે છે.
