પ્રયાગરાજમાં એક અનોખી અને ચોંકાવનારી વાત સામે આવી છે. અહીં એક મહિલાએ પોતાના પતિને પાઠ ભણાવવા માટે એક એવી પદ્ધતિનો ઉપયોગ કર્યો, જેણે બધાને ચોંકાવી દીધા. પત્નીએ નકલી ઈન્સ્ટાગ્રામ ID બનાવી અને તેને ફ્રેન્ડ રિક્વેસ્ટ મોકલી. પતિએ રિક્વેસ્ટ સ્વીકારી લીધી, અને તેઓ ચેટિંગ કરવા લાગ્યા. તેઓ ઓનલાઈન મિત્રો બન્યા, અને પછી એક દિવસ મળવાનો પ્લાન બનાવવામાં આવ્યો. પછી, જ્યારે તેઓ એકબીજાને મળવા ગયા, સામ-સામે આવ્યા પછી હોબાળો મચી ગયો. અને આખો મામલો પોલીસ સુધી પહોંચી ગયો.
એક સમાચાર એજન્સીના જણાવ્યા અનુસાર, સોની નામની એક મહિલા છેલ્લા ચાર વર્ષથી તેના માતાપિતાના ઘરે રહેતી હતી. એવો આરોપ છે કે તેના પતિ પ્રભુદત્તે તેને ઘરમાંથી કાઢી મૂકી હતી, જેના પછી તેમના સંબંધો બગાડી ગયા. મહિલા તેના માતાપિતાના ઘરે રહેવા લાગી.
આ દરમિયાન, સોનીએ એક યોજના બનાવી. તેણે નકલી ઈન્સ્ટાગ્રામ ID બનાવી અને તેનો ઉપયોગ કરીને તેના પતિને ફ્રેન્ડ રિક્વેસ્ટ મોકલી. મહિલાનો પતિ પ્રભુદત્ત પ્રતાપગઢ જિલ્લાનો રહેવાસી છે. પ્રભુદત્તને એ વાતની બિલકુલ ખબર નહોતી કે, તે જે પ્રોફાઇલ સાથે ચેટ કરી રહ્યો હતો તે તેની પત્ની જ છે.
ધીમે ધીમે બંને વચ્ચે વાતચીત શરૂ થઈ અને પછી તે ચેટમાં ફેરવાઈ ગઈ. વાતચીત દરમિયાન પ્રભુદત્તે તે નકલી પ્રોફાઇલવાળી 'મહિલા' સાથે લગ્નની પણ ચર્ચા કરી.
ઘણા દિવસોની ચેટિંગ પછી, મળવાનું નક્કી કરવામાં આવ્યું. પ્રભુદત્ત વારંવાર એક હોટલમાં મળવાનો પ્રસ્તાવ મૂકતો હતો, પરંતુ સોનીએ તેને ટાળી દીધો. તેણે જાહેર સ્થળે મળવાની વાત કહી. અંતે, 2જી મેના રોજ મુલાકાત માટે નાગવાસુકી મંદિર પસંદ કરવામાં આવ્યું.
પ્રભુદત્ત એક મિત્ર સાથે તે મંદિરમાં પહોંચી ગયો. ત્યાં સોની પહેલેથી જ હાજર હતી, પરંતુ તેણે દુપટ્ટો અને ચશ્માથી પોતાનો ચહેરો ઢાંકી રાખ્યો હતો. તેના પરિવારના સભ્યો પણ થોડા અંતરે હાજર હતા.
પ્રભુદત્ત તેની પત્નીને ઓળખી શક્યો નહીં અને સામાન્ય રીતે વાતચીત કરવા લાગ્યા. પરંતુ જેવો સોનીએ પોતાનો ચહેરો બતાવ્યો, ત્યારે આખી પરિસ્થિતિ જ બદલાઈ ગઈ. પોલીસના જણાવ્યા અનુસાર, પ્રભુદત્તે કથિત રીતે તેના પર હુમલો કર્યો અને તેને મારી નાખવાની ધમકી આપી. પરિસ્થિતિ બગડતી જોઈને મહિલાના પરિવારના સભ્યો ત્યાં પહોંચી ગયા. તેમણે પ્રભુદત્તને પકડી લીધો અને પોલીસને જાણ કરી. થોડીવારમાં પોલીસ ઘટનાસ્થળે પહોંચી અને તેને કસ્ટડીમાં લઈ લીધો.
દારાગંજ પોલીસ સ્ટેશને આ મામલે પ્રભુદત્ત વિરુદ્ધ કેસ નોંધ્યો છે. આરોપોમાં હુમલો, ગુનાહિત ધાકધમકી અને શાંતિ ભંગ કરવાના ઈરાદાથી અપમાન કરવાનો સમાવેશ થાય છે. પોલીસનું કહેવું છે કે, આ મામલાની તપાસ કરવામાં આવી રહી છે અને બંને પક્ષોના નિવેદનો નોંધવામાં આવી રહ્યા છે.
3.jpg)
