એક એવુ ગામ, જ્યાં માત્ર મહિલાઓ જ રહે છે, પુરુષોને ઘૂસવાની પણ પરવાનગી નથી

દુનિયાના લગભગ તમામ દેશોમાં પિતૃસત્તાક સમાજ છે અને આપણે પણ તેને સહજ સ્વીકારી લીધો છે કે પછી સ્વીકારવો પડ્યો છે અને આજે પણ મહિલાઓને સેકન્ડ જેન્ડર ગણવામાં આવે છે. મહિલાઓએ આજે પણ પોતાના હક માટે લડવું પડે છે. આ છે 21મી સદીનું કડવું સત્ય. પિતૃસત્તાક સમાજમાં રહેવા માટે ટેવાયેલા આપણે સૌ માતૃસત્તાક સમાજ વિશે ક્યારેય કલ્પના પણ નહીં કરી શકીએ. પરંતુ, કેન્યામાં એક એવુ ગામ છે, જ્યાં રહેતી મહિલાઓએ આ પિતૃસત્તાક સમાજની પરંપરાને તોડી નાંખી છે અને માત્ર ને માત્ર મહિલાઓ માટે એક ગામ વસાવ્યું છે. કદાચ આ વાત તમારી કલ્પનાશક્તિની પણ બહારની વાત છે, પરંતુ એ સત્ય છે. કેન્યામાં એક એવુ ગામ આવેલું છે, ્જ્યાં માત્ર મહિલાઓ જ રહે છે. પુરુષોના અત્યાચારોથી દૂર પોતાની મરજીથી પોતાનું જીવન વ્યતિત કરે છે અને હાં, અહીં કોઈ પુરુષના પ્રવેશ પર પણ પ્રતિબંધ છે.

ઉત્તરી કેન્યાના સાંબરુમાં આશરે 500 વર્ષોથી પિતૃસત્તાક સમાજ હતો. પરંતુ 3 દાયકા પહેલા આ સ્થિતિ બદલાઈ ગઈ. તેને બદલનારી મહિલાનું નામ રેબેકા લોલોસોલી છે. તેમણે પોતાના દુઃખની સાથે અન્ય મહિલાઓના દુઃખને પણ સમજ્યું અને મહિલાઓનું જ એક ગામ બનાવી દીધુ.

આ ગામનું નામ ઉમોજા છે. 30 વર્ષ પહેલા 1990માં 15 પીડિત મહિલાઓ માટે રેબેકાએ આ ગામ વસાવ્યું હતું. આ એ મહિલાઓ હતી, જે બ્રિટિશ સૈનિકો દ્વારા યૌન ઉત્પીડન અને બળાત્કારનો ભોગ બની હતી. આ તમામ મહિલાઓને તેમનો હક અપાવવા માટે લડી રહેલી રેબેકાની સાથે કેટલાક પુરુષોએ મારપીટ કરી હતી. આ ગામને વસાવવા પર રેબેકાએ ઘણા પ્રકારની ધમકીઓનો સામનો કરવો પડ્યો હતો.

મીડિયા રિપોર્ટ અનુસાર, ઉમોજામાં હવે ઘરેલૂં હિંસા, Genital Mutilation અને બાળવિવાહ જેવી યાતનાઓનો શિકાર બનેલી મહિલાઓને પણ આશરો આપવામાં આવે છે.

આ ગામમાં એક પણ પુરુષ નથી અને મહિલાઓ એ વાતથી ખુશ છે. તેઓ પિતૃસત્તાક સમાજમાં રહેવા નથી માગતા. તેમના દ્વારા અપાતી યાતનાઓને સહન કરવા નથી માગતા.

અહીં, બધા જ કામો મહિલાઓ પોતે કરે છે. પોતાની આજીવિકા માટે તેઓ પર્યટકોને સસ્તા દરે ઉમોજાનું ભ્રમણ કરાવે છે. આ ગામે આસપાસના ગામની મહિલાઓને પિતૃસત્તાક સમાજનો બહિષ્કાર કરવા માટે પ્રોત્સાહિત કરી અને એક મહિલા હોવાના નાતે પોતાના અધિકારો અને હકોને સમજવા પર ભાર આપ્યો.

જણાવી દઈએ કે, વર્ષ 2015માં આ ગામમાં 47 મહિલાઓ હતી.