'કોકરોચ જનતા પાર્ટી'ની સંસદ કૂચ પછી PM નરેન્દ્ર મોદીએ NEET પેપર લીક અંગે પોતાનું પહેલું નિવેદન આપ્યું છે. NDA સંસદીય પક્ષની બેઠકમાં બોલતા વડાપ્રધાન નરેન્દ્ર મોદીએ ભારપૂર્વક જણાવ્યું હતું કે યુવાનોના ભવિષ્ય સાથે કોઈ ચેડા કરવામાં આવશે નહીં અને પેપર લીક માટે જવાબદાર લોકોને શક્ય તેટલી કડક સજા અપાવવામાં આવશે.
વડાપ્રધાન નરેન્દ્ર મોદીએ જણાવ્યું હતું કે પેપર લીક મુદ્દાનું રાજકારણ ન કરવું જોઈએ. વિદ્યાર્થીઓના ભવિષ્યને નુકસાન ન થાય તે માટે પુનઃપરીક્ષા હાથ ધરવામાં આવી હતી અને સફળતાપૂર્વક પૂર્ણ કરવામાં આવી હતી. સરકારે પેપર લીક અંગે તાત્કાલિક પગલાં લીધાં છે અને વિદ્યાર્થીઓને લઇને સરકાર સંવેદનશીલ છે.
વડાપ્રધાન નરેન્દ્ર મોદીએ ટિપ્પણી કરી હતી કે આ ફક્ત કેન્દ્ર સરકારનો મામલો નથી; પેપર લીકના ગુનેગારોને સજા મળે તે સુનિશ્ચિત કરવા માટે બધાએ એક થવું પડશે. આવી ઘટનાઓ ફરીથી ન બને તે માટે પગલાં અમલમાં મૂકવામાં આવશે.
PM મોદીનું નિવેદન 'કોકરોચ જનતા પાર્ટી' દ્વારા સંસદ તરફ કૂચ બાદ આવ્યું છે, જેમાં ઘણા વિપક્ષી સાંસદોએ પણ ભાગ લીધો હતો. આ કૂચ દરમિયાન હિંસાની ઘટનાઓ પણ બની હતી, જેના કારણે દિલ્હી પોલીસ અને RAFએ લાઠીચાર્જ કરવો પડ્યો હતો. જ્યારે પ્રદર્શનકારીઓ સંસદની નજીક પહોંચ્યા, ત્યારે ટીયર ગેસના શેલ છોડવામાં આવ્યા હતા, અને તેમને વિસ્તારમાંથી વિખેરવામાં આવ્યા હતા.
'કોકરોચ જનતા પાર્ટી' (CJP) તરફથી સૌરવ દાસ અને આશુતોષ રાકાંને આરોગ્ય મંત્રી જેપી નડ્ડા સાથે મુલાકાત કરી હતી. સૂત્રોનું કહેવું છે કે, બંને વચ્ચે બે રાઉન્ડની વાતચીત થઈ હતી, પરંતુ સરકારે પ્રદર્શનકારીઓની કોઈપણ માંગણી અંગે કોઈ આશ્વાસન આપ્યું નથી. જો કે, નડ્ડાએ તેમને ધરણા પ્રદર્શન બંધ કરીને સામાન્ય સ્થિતિ પુનઃસ્થાપિત કરવા માટે વહીવટીતંત્રને સહકાર આપવા વિનંતી કરી હતી.
વાતચીત દરમિયાન, જે.પી. નડ્ડાએ પૂછ્યું કે, તેમની માંગણીઓ શું છે, આ પર પ્રતિનિધિઓએ તેમની માંગણીઓની રૂપરેખા આપી હતી. નડ્ડાએ તેમને કહ્યું કે જો તેઓ ઇચ્છે છે કે સરકાર તેમની માંગણીઓ પર વિચાર કરે, તો તેમણે લેખિતમાં આવેદન આપવું જોઈએ. ત્યારબાદ, CJPના પ્રતિનિધિઓએ સાંજે 4 વાગ્યાની આસપાસ કેન્દ્રીય મંત્રીને તેમની માંગણીઓનું લેખિત આવેદન સોંપ્યું હતું.
