રાહુલની સુપ્રીમ માર્ચ કોર્ટને ન ગમી, નોટિસ મોકલી CJIએ કહ્યું- અમને કોઈ ધમકાવી ન શકે, અમે...

દિલ્હીના બારાખંભા રોડથી સુપ્રીમ કોર્ટ સુધી માર્ચ કાઢવા બદલ કોંગ્રેસ નેતા રાહુલ ગાંધી અને કોંગ્રેસ પક્ષને સુપ્રીમ કોર્ટે નોટિસ ફટકારી છે. ગુરુવારે સુનાવણી દરમિયાન આકરૂ વલણ અપનાવતા દેશના મુખ્ય ન્યાયાધીશ (CJI) સૂર્યકાંતે સ્પષ્ટપણે જણાવ્યું હતું કે, કોઈ પણ વ્યક્તિ સુપ્રીમ કોર્ટને ડરાવવાનો કે ધમકાવવાનો પ્રયાસ કરી શકે નહીં.

સુપ્રીમ કોર્ટમાં મતદાર યાદીના સ્પેશિયલ ઇન્ટેન્સિવ રિવિઝન (SIR) સામે થયેલા વિરોધ પ્રદર્શન અને માર્ચ સંબંધિત અરજીઓ પર સુનાવણી દરમિયાન મુખ્ય ન્યાયાધીશે આ ટિપ્પણી કરી હતી. રાહુલ ગાંધી અને અન્ય 13 લોકો દ્વારા દાખલ કરાયેલી અરજી પર કોર્ટે કેન્દ્ર સરકાર અને ભારતના ચૂંટણી પંચ (ECI) ને પણ નોટિસ જારી કરીને તમામ સંબંધિત પક્ષો પાસે જવાબ માંગ્યો છે.

આ સાથે જ, સુપ્રીમ કોર્ટે રાહુલ ગાંધીનું નામ લીધા વિના ટિપ્પણી કરી હતી કે, કોર્ટ અરજદારોમાંથી એક વ્યક્તિને તેના આચરણ અને વર્તન અંગે સવાલો પૂછવા માંગે છે અને તેણે આ અંગે ખુલાસો આપવો પડશે. ઉલ્લેખનીય છે કે, કોર્ટમાં અરજી દાખલ કરતા પહેલા 'ઇન્ડિયા'  ગઠબંધને 12 ઓક્ટોબરે સુપ્રીમ કોર્ટ તરફ વિશાળ માર્ચ કાઢી હતી.

સુનાવણી દરમિયાન વકીલ ગૌરવ ભાટિયાએ સુપ્રીમ કોર્ટ પાસે તે સમયના CCTV ફૂટેજ સુરક્ષિત રાખવા માટે વચગાળાના આદેશની માંગ કરી હતી, જ્યારે રાહુલ ગાંધી સુપ્રીમ કોર્ટ પહોંચ્યા હતા. આરોપ છે કે તે સમયે તેમણે એક ગર્ભવતી મહિલા પત્રકારને ધક્કો માર્યો હતો. આના પર જસ્ટિસ બાગચીએ તમામ કાયદાકીય એજન્સીઓને તે સમયના CCTV અને અન્ય તમામ ડિજિટલ ફૂટેજ સુરક્ષિત રાખવાનો નિર્દેશ આપ્યો હતો. કોર્ટે એમ પણ ઉમેર્યું હતું કે આ ફૂટેજ કોઈ પણ વ્યક્તિ આવીને કોર્ટમાં જમા કરાવી શકે છે.

આ ઉપરાંત આંદોલન કે પ્રદર્શનનું આહ્વાન કરનારાઓની જવાબદારી નક્કી કરવાની માંગ કરતી અરજી પર પણ CJI સૂર્યકાંતે નોટિસ જારી કરી છે. આ અરજીમાં માંગ કરવામાં આવી છે કે જે વ્યક્તિ વિરોધ પ્રદર્શનનું આહ્વાન કરે છે, તેણે તેના કારણે અન્ય લોકો પર પડતા પરિણામો અને અસરોની પણ જવાબદારી લેવી જોઈએ.

રાહુલ ગાંધી દ્વારા સુપ્રીમ કોર્ટ પરિસરમાં કાઢવામાં આવેલી માર્ચને પડકારતી અરજીમાં કેરળ કોંગ્રેસની એક સોશિયલ મીડિયા પોસ્ટને કોર્ટની અવમાનના (Contempt of Court) ગણાવીને કાયદાકીય કાર્યવાહી કરવાની માંગ કરવામાં આવી છે. અરજી મુજબ, આ પોસ્ટ CJI વિરુદ્ધ કરવામાં આવી હતી, જેને બાદમાં ડિલીટ કરી દેવામાં આવી હતી.

વિપક્ષ તરફથી આ અરજી ચીફ જસ્ટિસ સૂર્યકાંત દ્વારા મુલાકાત કરવાનો ઇનકાર કર્યા બાદ દાખલ કરવામાં આવી હતી. 11 ઓક્ટોબરે વિપક્ષી સાંસદોએ ભારતના ચીફ જસ્ટિસ સૂર્યકાંતને પત્ર લખીને આવેદનપત્ર સોંપવા માટે સમય માંગ્યો હતો, પરંતુ CJIએ મુલાકાત કરવાની ના પાડી દીધી હતી.

ત્યારબાદ રાહુલ ગાંધી, પ્રિયંકા ગાંધી, મલ્લિકાર્જુન ખડગે અને અન્ય વિપક્ષી સાંસદો 12 ઓક્ટોબરની સાંજે અચાનક સુપ્રીમ કોર્ટની અંદર પહોંચી ગયા હતા. તે પહેલાં તમામ સાંસદોએ દિલ્હીના બારાખંભા રોડથી સુપ્રીમ કોર્ટ સુધી માર્ચ કાઢી હતી.

SIR (સ્પેશિયલ ઇન્ટેન્સિવ રિવિઝન) ને લઈને કોકરોચ પાર્ટી અગાઉથી જ સવાલો ઉઠાવી રહી છે. આ દરમિયાન 'ધ ઇન્ડિયન એક્સપ્રેસ'નો એક અહેવાલ પ્રકાશિત થયો હતો, જે મુજબ ચૂંટણી કમિશનર સુખબીર સિંહ સંધુ અને વિવેક જોશીએ છેલ્લા 10 મહિનામાં SIR સાથે જોડાયેલા નિર્ણયો અને આદેશો પર ઓછામાં ઓછા 14 વખત વાંધો ઉઠાવ્યો હતો. બંને ચૂંટણી કમિશનરોએ મતદાર યાદીમાં નામ ઉમેરવા, હટાવવા અને પુનઃસ્થાપિત કરવાની પ્રક્રિયા તેમજ ચૂંટણી ડેટા અને સોફ્ટવેર સાથે જોડાયેલી બાબતો પર ગંભીર સવાલો ઉઠાવ્યા હતા. એક મામલામાં ફોર્મ-6 માં SIR સાથે જોડાયેલો પ્રશ્ન ઉમેરવા બદલ બંને ચૂંટણી કમિશનરોએ વિરોધ દર્શાવ્યો હતો. બંને કમિશનરોએ ચૂંટણી ડેટા અને સોફ્ટવેર સુધીની પહોંચ (એક્સેસ) અંગે કેબિનેટ સચિવને પત્ર લખ્યો હતો. આ ઉપરાંત, કામની વહેંચણી સાથે જોડાયેલા એક આદેશને પણ તેમણે નિયમોનું ઉલ્લંઘન ગણાવ્યું હતું.