ભારત અને દક્ષિણ આફ્રિકા વચ્ચે T20 વર્લ્ડ કપની સુપર-8 મેચ રવિવારે અમદાવાદના નરેન્દ્ર મોદી સ્ટેડિયમ ખાતે રમાઈ હતી. આ મેચમાં ટીમ ઈન્ડિયાને 76 રનથી કારમી હારનો સામનો કરવો પડ્યો. આ હારથી ટીમ ઈન્ડિયાના નેટ રન રેટ પર ભારે અસર પડી, જેના કારણે ભારતની સેમીફાઇનલમાં પહોંચવાની આશાઓને ધક્કો લાગ્યો છે. એવામાં, આ કારમી હાર પાછળના કારણોને જાણવા જરૂરી છે.
ભારતીય બોલરોએ દબાણ જાળવી ન રાખ્યું
આ મેચમાં દક્ષિણ આફ્રિકાની શરૂઆત પણ નબળી રહી હતી. દક્ષિણ 20 રનના સ્કોર પર આફ્રિકાના 3 ટોચના બેટ્સમેન આઉટ થઈ ગયા હતા. એવી અપેક્ષા રાખવામાં આવી રહી હતી કે ભારતીય બોલરો આ દબાણ જાળવી રાખશે. જોકે, મિલર અને બ્રેવિસે બધું દબાણ રીલિઝ કરી દીધું અને આક્રમક બેટિંગ કરી. બંને વચ્ચે 97 રનની ભાગીદારી થઈ.
સ્પિનર્સનો ફ્લોપ શૉ
આ મેચમાં દક્ષિણ આફ્રિકાએ ભારતીય સ્પિનરોને આડે હાથ લીધા. વરુણ ચક્રવર્તીએ પોતાની 4 ઓવરમાં 47 રન આપ્યા અને સુંદરે પોતાની 2 ઓવરમાં 17 રન આપ્યા. સ્પિનરોએ માત્ર 1 જ વિકેટ લીધી.
હાર્દિકની છેલ્લી ઓવર
હાર્દિકે છેલ્લી ઓવરમાં 20 રન આપ્યા. એક સમયે એવું લાગતું હતું કે ભારત દક્ષિણ આફ્રિકાને 175 રન સુધી રોકી દેશે. પરંતુ હાર્દિકની ઓવરથી લક્ષ્ય 188 રન સુધી પહોંચી ગયું, જેણે ભારતીય બેટ્સમેનો પર માનસિક દબાણ બનાવ્યું.
અભિષેકનો ફરી ફ્લોપ શૉ, ઓપનર્સ નિષ્ફળ ગયા
આ મેચમાં ભારતીય ઓપનર્સે ફરી એકવાર ફેન્સને નિરાશ કર્યા. પહેલી જ ઓવરમાં ઇશાન ખાતું ખોલ્યા વિના આઉટ થઈ ગયો. ત્યારબાદ તિલક પણ સસ્તામાં આઉટ થઇ ગયો. અભિષેક પાસેથી મોટી ઇનિંગ રમવાની અપેક્ષા હતી, પરંતુ તે પણ 15 રન બનાવ્યા બાદ આઉટ થઇ ગયો.
બેટ્સમેનોના ઇન્ટેન્ટ પર સવાલ વાજબી
દરેક ભારતીય બેટ્સમેન પહેલા બોલથી જ સિક્સર ફટકારવાનો પ્રયાસ કરી રહ્યા હતા. કોઈએ પીચ સમજવાની પણ તસ્દી પણ ન લીધી. બોલ અભિષેકના બેટ પર આવી રહ્યો નહોતો. એટલે તેણે પોતાને સમય આપવો જોઈતો હતો, ભાગીદારી બનાવવી જોઈતી હતી અને સિંગલ્સ અને ડબલ્સ પર ધ્યાન કેન્દ્રિત કરવું જોઈતું હતું. પરંતુ તે દરેક બોલ પર મોટા શૉટથી રમવાનો પ્રયાસ કરતો હતો, આમ તે વિકેટ ગુમાવી બેઠો. સૂર્યા, તિલક અને સુંદરની પણ આજ પરિસ્થિતી રહી.
સુંદરના પ્રયોગ અંગે સવાલ
ભારતે આ મેચમાં અક્ષરની જગ્યાએ સુંદરને તક આપી હતી. જોકે, તે બેટિંગ અને બોલિંગ બંનેમાં નિષ્ફળ ગયો. જ્યારે અક્ષર બેટિંગ, બોલિંગ અને ફિલ્ડિંગ ત્રણેયમાં અસરકારક દેખાય છે. સુંદર પાસે માત્ર 2 ઓવર કરવવામાં આવી હતી, એટલે આ પ્રયોગ પણ ખરાબ રીતે નિષ્ફળ ગયો.
