ICC મેન્સ T20 વર્લ્ડ કપ 2026ની ફાઇનલ રવિવાર (8 માર્ચ)ના રોજ અમદાવાદના નરેન્દ્ર મોદી સ્ટેડિયમમાં રમાશે. ભારત અને ન્યૂઝીલેન્ડ ફાઇનલ મેચમાં એકબીજા સામે ટકરાશે. ન્યૂઝીલેન્ડે પ્રથમ સેમીફાઇનલમાં દક્ષિણ આફ્રિકાને 9 વિકેટથી હરાવ્યું હતું. જ્યારે ભારતે ઇંગ્લેન્ડને 7 રને હરાવીને ફાઇનલ મેચમાં પ્રવેશ કર્યો હતો. ભારતીય ટીમનો પ્રયાસ સતત બીજી વખત T20 વર્લ્ડ કપ જીતવા પર હશે, જ્યારે ન્યૂઝીલેન્ડ હજુ સુધી T20 વર્લ્ડ કપ જીતી શક્યું નથી.
ફાઇનલ મેચ બાદ વિજેતા અને રનર-અપ ટીમો પર પૈસાઓનો વરસાદ થશે. અહેવાલો અનુસાર, T20 વર્લ્ડ કપ 2026ની વિજેતા ટીમને 3 મિલિયન ડૉલર (લગભગ 27.50 કરોડ રૂપિયા) મળશે. હારનાર ટીમ એટલે કે, રનર-અપને 1.6 મિલિયન ડૉલર (લગભગ 14.67 કરોડ રૂપિયા)ની ઇનામી રકમ મળશે. તો સેમીફાઇનલમાં હારનારી ટીમો, ઇંગ્લેન્ડ અને દક્ષિણ આફ્રિકાને સમાન રકમ 0.79 મિલિયન ડૉલર (આશરે 7.24 કરોડ રૂપિયા) મળશે.
ઇન્ટરનેશનલ ક્રિકેટ કાઉન્સિલ (ICC)એ બધી ટીમોને લાભ મળે તે માટે અલગ-અલગ સ્ટેજ અનુસાર ઇનામની રકમ વહેંચી છે. 5 થી 12મા ક્રમે રહેલી ટીમોને સમાન રકમ 0.38 મિલિયન ડૉલર (આશરે 3.48 કરોડ રૂપિયા) મળશે. 13માથી 20મા ક્રમે રહેલી ટીમો માટે સમાન 0.25 મિલિયન ડૉલર (લગભગ 2.29 કરોડ રૂપિયા)ની ઇનામી રકમ નક્કી કરવામાં આવી છે.
ICCએ આ વખતે કુલ ઇનામી રકમ 13.5 મિલિયન ડૉલર (લગભગ 123.77 કરોડ રૂપિયા) નક્કી કરી છે, જે 2024 T20 વર્લ્ડ કપ કરતા લગભગ 20 ટકા વધુ છે. ગત T20 વર્લ્ડ કપમાં ICCએ 11.25 મિલિયન ડૉલરનું વિતરણ કર્યું હતું. વિજેતા ભારતીય ટીમને 2.45 મિલિયન ડૉલર અને રનર-અપ દક્ષિણ આફ્રિકાને 1.28 મિલિયન ડૉલરની જંગી ઇનામી રકમ મળી હતી.
એ સ્પષ્ટ છે કે T20 ક્રિકેટની લોકપ્રિયતા અને આ ટૂર્નામેન્ટની કોમર્શિયલ વેલ્યૂ સતત વધી રહી છે. T20 વર્લ્ડ કપ માત્ર ક્રિકેટના ઉત્સાહ માટેનું પ્લેટફોર્મ નથી, પરંતુ ભાગ લેતી ટીમો માટે એક મુખ્ય આર્થિક પ્લેટફોર્મ પણ બની ગયું છે. વધતી જતી ઇનામી રકમ દર્શાવે છે કે T20 ક્રિકેટનું વૈશ્વિક બજાર સતત મજબૂત થઈ રહ્યું છે, અને આગામી વર્ષોમાં આ ટૂર્નામેન્ટ વધુ ભવ્ય બની શકે છે.
T20 વર્લ્ડ કપ 2026ની ઇનામી રકમ
વિજેતા: લગભગ 27.50 કરોડ રૂપિયા
રનર-અપ: લગભગ 14.67 કરોડ રૂપિયા
સેમી-ફાઇનલમાં હારનારી ટીમો: લગભગ 7.24 કરોડ રૂપિયા
5 થી 12મા ક્રમે રહેલી ટીમો: આશરે 3.48 કરોડ રૂપિયા
13 થી 20મા ક્રમે રહેલી ટીમો: લગભગ 2.29 કરોડ રૂપિયા.
