દેશની સૌથી મોટી કાર ઉત્પાદક મારુતિ સુઝુકીએ આજે એટલે કે 3 સપ્ટેમ્બરના રોજ ભારતીય બજારમાં તેની પાંચમી SUV તરીકે મારુતિ વિક્ટોરિસને સત્તાવાર રીતે રજૂ કરી છે. હાલમાં, આ SUV ફક્ત પ્રદર્શિત કરવામાં આવી છે, તેની કિંમતો હજુ સુધી જાહેર કરવામાં આવી નથી. આ SUV 6 અલગ અલગ ટ્રીમ વેરિઅન્ટમાં વેચાણ માટે ઉપલબ્ધ રહેશે.
મારુતિ વિક્ટોરિસ કંપનીના એરેના ડીલરશીપનું ફ્લેગશિપ મોડેલ છે અને કંપનીના એરેના ડીલરશીપ દ્વારા વેચવામાં આવશે, જે દેશભરના અધિકૃત ડીલરશીપ પર વેચાણ માટે ઉપલબ્ધ રહેશે. મારુતિ સુઝુકી દ્વારા રજૂ કરાયેલી આ બીજી મધ્યમ કદની SUV છે.
મારુતિ સુઝુકીના કુલ વેચાણમાં SUV વાહનો વિશે વાત કરતા, મારુતિ સુઝુકીના MD અને CEO હિસાશી તાકેઉચીએ જણાવ્યું હતું કે, 'નાણાકીય વર્ષ 20-21માં, મારુતિ સુઝુકીના કુલ વાહન વેચાણમાં SUV વાહનોનું યોગદાન લગભગ 8.9 ટકા હતું, જે નાણાકીય વર્ષ 2024-25માં વધીને 28 ટકા થયું છે. હવે અમે અમારી નવી SUV મારુતિ વિક્ટોરિસ રજૂ કરી રહ્યા છીએ, જે આ સેગમેન્ટમાં મારુતિ સુઝુકીની હાજરીને વધુ મજબૂત બનાવશે.'
હિસાશી તાકેઉચીનું કહેવું છે કે, નવી મારુતિ વિક્ટોરિસને વૈશ્વિક મોડેલ તરીકે રજૂ કરવામાં આવી રહી છે. જે ફક્ત ભારતીય બજારમાં વેચાણ માટે ઉપલબ્ધ રહેશે નહીં. પરંતુ કંપની ભારતમાં બનેલી મારુતિ વિક્ટોરિસને 100થી વધુ દેશોમાં નિકાસ કરશે. અહીં તમને જણાવી દઈએ કે, તાજેતરમાં મારુતિ સુઝુકીએ ગુજરાતના હાંસલપુર પ્લાન્ટમાં તેની પ્રથમ ઇલેક્ટ્રિક કારનું ઉત્પાદન શરૂ કર્યું છે. તેની પ્રથમ બેચના લગભગ 2,900 યુનિટ 12 દેશોમાં નિકાસ કરવામાં આવ્યા છે.
મારુતિ સુઝુકીના માર્કેટિંગ અને સેલ્સ વિભાગના સિનિયર એક્ઝિક્યુટિવ ઓફિસર પાર્થો બેનર્જી કહે છે કે, 'મારુતિ વિક્ટોરિસને ખાસ કરીને યુવા પેઢીને ધ્યાનમાં રાખીને ડિઝાઇન કરવામાં આવી છે. આ SUV સંપૂર્ણપણે નવી અને અદ્યતન ટેકનોલોજીથી સજ્જ છે, જેનો ઉપયોગ યુવા ખરીદદારો તેમના રોજિંદા જીવનને સરળ બનાવવા માટે કરી શકે છે.'
વિક્ટોરિસ નવી ડિઝાઇન ભાષા સાથે આવે છે. જે મોટાભાગે મારુતિની આગામી પ્રથમ ઇલેક્ટ્રિક કાર e-Vitara ઇલેક્ટ્રિક SUVથી પ્રેરિત છે. આગળના ભાગમાં, વિક્ટોરિસમાં ક્રોમ સ્ટ્રીપ, જાડા પ્લાસ્ટિક ક્લેડીંગ અને સિલ્વર સ્કિડ પ્લેટ સાથે પાતળા ગ્રિલ કવર સાથે જોડાયેલ મોટી LED હેડલાઇટ્સ છે.
બાજુમાં, SUVમાં 17-ઇંચના એલોય વ્હીલ્સ, કાળા રંગના થાંભલા, સિલ્વર રૂફ રેલ્સ અને ચોરસ બોડી ક્લેડીંગ છે, જે તેને સ્પોર્ટી લુક આપે છે. પાછળના ભાગમાં, એક સેગમેન્ટેડ LED લાઇટ બાર અને 'VICTORIS' શબ્દ જોવા મળે છે.
https://twitter.com/Maruti_Corp/status/1963127036979077286
વિક્ટોરિસના કેબિનમાં વાયરલેસ એપલ કારપ્લે અને એન્ડ્રોઇડ ઓટો, ડોલ્બી એટમોસ્ટ સાથે 8-સ્પીકર સાઉન્ડ સિસ્ટમ, વેન્ટિલેટેડ ફ્રન્ટ સીટ્સ, એમ્બિયન્ટ લાઇટિંગ, કનેક્ટેડ કાર ટેક, લેધરેટ અપહોલ્સ્ટરી, ઓટોમેટિક ક્લાઇમેટ કંટ્રોલ, પેનોરેમિક સનરૂફ, વાયરલેસ ચાર્જર, 8-વે ઇલેક્ટ્રિકલી એડજસ્ટેબલ ડ્રાઇવર સીટ, હેડ-અપ ડિસ્પ્લે, કેબિન એર ફિલ્ટર જેવા ફીચર્સ આપવામાં આવ્યા છે.
મારુતિ વિક્ટોરિસ લગભગ ગ્રાન્ડ વિટારા જેવી જ છે. તેમાં ત્રણ અલગ અલગ એન્જિન વિકલ્પો છે. જેમાં 103 હોર્સપાવર 1.5-લિટર, 4-સિલિન્ડર માઇલ્ડ હાઇબ્રિડ પેટ્રોલ એન્જિન, 116 હોર્સપાવર 1.5-લિટર, 3-સિલિન્ડર મજબૂત હાઇબ્રિડ સેટઅપ અને 89 હોર્સપાવર 1.5-લિટર પેટ્રોલ-CNG વિકલ્પનો સમાવેશ થાય છે. ગિયરબોક્સ વિકલ્પોમાં પેટ્રોલ એન્જિન માટે 5-સ્પીડ મેન્યુઅલ અને 6-સ્પીડ ટોર્ક કન્વર્ટર ઓટો, મજબૂત હાઇબ્રિડ માટે e-CVT અને CNG વેરિઅન્ટ માટે 5-સ્પીડ મેન્યુઅલનો સમાવેશ થાય છે. વિક્ટોરિસ ખરીદદારો પાસે પેટ્રોલ-ઓટો કન્ફિગરેશન સાથે ઓલ-વ્હીલ ડ્રાઇવનો વિકલ્પ પણ હશે.
પાર્થો બેનર્જીએ જણાવ્યું હતું કે, આ SUVમાં 26.03 Cm (10.25-ઇંચ) ફુલ્લી ડિજિટલ ઇન્સ્ટ્રુમેન્ટ ક્લસ્ટર પણ મળશે, જેમાં ડોલ્બી એટમોસ સરાઉન્ડ સાઉન્ડ સિસ્ટમ, સેગમેન્ટ-ફર્સ્ટ સ્માર્ટ પાવર્ડ ટેલગેટ (જેસ્ચર કંટ્રોલ સાથે), 64-કલર એમ્બિયન્ટ લાઇટિંગ અને એલેક્સા વોઇસ આસિસ્ટન્ટ સપોર્ટની સુવિધા પણ મળશે. આ SUVમાં અંડરબોડી CNG ટાંકી પણ છે, જેનાથી બૂટ સ્પેસમાં વધારો થયો છે. કંપનીનું કહેવું છે કે, આ SUVમાં 60થી વધુ કનેક્ટેડ ફીચર્સ આપવામાં આવ્યા છે. જેની મદદથી યુઝર્સ પોતાના સ્માર્ટફોનને કાર સાથે કનેક્ટ કરી શકે છે.
મારુતિ સુઝુકીનો દાવો છે કે, નવી મારુતિ વિક્ટોરિસ રસ્તા પર ચાલતી થિયેટર છે. તેમાં ડોલ્બી એટમોસ સરાઉન્ડ સાઉન્ડ સિસ્ટમ છે. જે યુઝર્સ પોતાના મૂડ અને પસંદગી અનુસાર સંગીતને નિયંત્રિત અને સેટ કરી શકે છે. કંપની એમ પણ કહી રહી છે કે, આ મ્યુઝિક સિસ્ટમ ગીતના દરેક નોટને ખૂબ જ સચોટ રીતે અવાજમાં રૂપાંતરિત કરે છે.
કંપનીએ મારુતિ વિક્ટોરિસને કુલ 10 રંગોમાં રજૂ કરી છે. જેમાં આર્ક્ટિક વ્હાઇટ, સ્પ્લેન્ડિડ સિલ્વર, ઇટરનલ બ્લુ, સિઝલિંગ રેડ, મેગ્મા ગ્રે, બ્લુઇશ બ્લેક અને મિસ્ટિક ગ્રીન તેમજ ત્રણ સ્ટાઇલિશ ડ્યુઅલ-ટોન વિકલ્પોનો સમાવેશ થાય છે, જેમાં ઇટરનલ બ્લુ વિથ બ્લેક રૂફ, સિઝલિંગ રેડ વિથ બ્લેક રૂફ અને સ્પ્લેન્ડિડ સિલ્વર વિથ બ્લેક રૂફનો સમાવેશ થાય છે.
મારુતિ સુઝુકીએ નવી વિક્ટોરિસમાં સલામતીનું પણ સંપૂર્ણ ધ્યાન રાખ્યું છે. આ મારુતિ સુઝુકીની પહેલી કાર છે, જેમાં લેવલ-2 એડવાન્સ્ડ ડ્રાઇવર આસિસ્ટન્ટ સિસ્ટમ (ADAS) ફીચર આપવામાં આવી રહ્યું છે. જેમાં ઓટો ઇમરજન્સી બ્રેકિંગ, એડેપ્ટિવ ક્રૂઝ કંટ્રોલ, લેન કીપ આસિસ્ટ, લેન ચેન્જ એલર્ટ સાથે બ્લાઇન્ડ સ્પોટ મોનિટરિંગ સિસ્ટમ, ફોરવર્ડ કોલિઝન વોર્નિંગ અને ફ્રન્ટ પાસ આસિસ્ટ સિસ્ટમ જેવી અત્યાધુનિક સુવિધાઓ આપવામાં આવી રહી છે.
મારુતિ સુઝુકી કહે છે કે, વિક્ટોરિસમાં 6 એરબેગ્સ સ્ટાન્ડર્ડ તરીકે આપવામાં આવી રહી છે. લોન્ચ પહેલા જ, આ SUVનું ભારત ન્યૂ કાર એસેસમેન્ટ પ્રોગ્રામ (ભારત NCAP) દ્વારા ક્રેશ ટેસ્ટ કરવામાં આવ્યું છે. જેમાં તેને 5-સ્ટાર સેફ્ટી રેટિંગ આપવામાં આવ્યું છે. આ ક્રેશ ટેસ્ટમાં, મારુતિ સુઝુકી વિક્ટોરિસને પુખ્ત મુસાફરોની સલામતીમાં 32માંથી 31.66 ગુણ અને બાળ મુસાફરોની સલામતીમાં 49માંથી 43.00 ગુણ મળ્યા છે.
