શું તમે રેલ્વે સ્ટેશનો, જાહેર પુસ્તકાલયો, ઉદ્યાનો અથવા મોલ જેવા જાહેર સ્થળોએ પબ્લિક વાઇ-ફાઇનો ઉપયોગ કરો છો? જો તમારો જવાબ હા હોય, તો તમે વારંવાર OTP આવવું અને ફરીથી લોગ ઇન કરવાની ઝંઝટથી પરેશાન થઇ ગયા હશો. પરંતુ હવે, આ સમસ્યા ટૂંક સમયમાં કાયમ માટે સમાપ્ત થવાની છે. ભારત સરકાર જનતાની સુવિધા માટે એક હાઇ-ટેક સિસ્ટમ રજૂ કરવાની તૈયારી કરી રહી છે, જ્યાં તમારે દેશભરના 400,000થી વધુ વાઇ-ફાઇ હોટસ્પોટ્સ માટે ફક્ત એક જ વખત પાસવર્ડ દાખલ કરવો પડશે. ફક્ત એક જ વાર લોગ ઇન કરવું પડશે અને કોઈપણ મુશ્કેલી વિના દેશમાં ગમે ત્યાં હાઇ-સ્પીડ વાઇ-ફાઇનો આનંદ માણો.
ભારતીય ટેલિકોમ રેગ્યુલેટરી ઓથોરિટી (TRAI)એ PM-WANIની ખામીઓને દૂર કરવા અને ઇન્ટરનેટ ઍક્સેસને સરળ બનાવવાના હેતુથી એક નવું કન્સલ્ટેશન પેપર બહાર પાડ્યું છે.
ભારતમાં હાલમાં આશરે 400,000 સક્રિય હોટસ્પોટ્સ છે, પરંતુ વપરાશકર્તાઓએ દરેક નવા સ્થાન પર ફરીથી નોંધણી કરાવવી પડતી હોય છે, પરંતુ હવે નવી સિસ્ટમ આવ્યા પછી: તમે ફક્ત એક જ પાસવર્ડ અથવા OTP દાખલ કરીને દેશભરમાં કોઈપણ જાહેર Wi-Fi નેટવર્ક સાથે કનેક્ટ થઈ શકશો.
તે સુરક્ષિત ડિજિટલ ચુકવણીઓ સુનિશ્ચિત કરવા માટે WPA3 (Wi-Fi પ્રોટેક્ટેડ એક્સેસ 3) જેવા નવીનતમ સુરક્ષા ધોરણોનો ઉપયોગ કરશે. આનાથી UPI અને બેંકિંગ વ્યવહારો પુરી રીતે સુરક્ષિત રહેશે. શહેરોમાં હાઇ-સ્પીડ ઇન્ટરનેટ લાગુ કરવામાં આવશે, અને ગામડાઓમાં સમુદાય Wi-Fi મોડેલ લાગુ કરવામાં આવશે.
TRAI માને છે કે, જૂની સિસ્ટમ એટલા માટે નિષ્ફળ ગઈ, કારણ કે તેમાં ઓપરેટરોને કમાણીનું કોઈ મોટું માર્જિન મળતું ન હતું. જ્યારે નવા મોડેલમાં ઓપરેટરો માટે કમાણી કરવાના 3 રસ્તાઓનું સૂચન છે: નાની-નાની જાહેરાતો સાથે મફત ઇન્ટરનેટ, હાઇ-સ્પીડ ડેટા માટે પ્રીમિયમ સબ્સ્ક્રિપ્શન્સ, અને સરકાર તરફથી નાણાકીય સહાય.
મીડિયા અહેવાલો અને આંકડા અનુસાર, ભારતની 140 કરોડની વસ્તીમાંથી ફક્ત 2 ટકા લોકો જ હાલમાં જાહેર Wi-Fiનો ઉપયોગ કરી રહ્યા છે. તેની તુલનામાં, દક્ષિણ કોરિયામાં 80 ટકા લોકો અને યુનાઇટેડ સ્ટેટ્સમાં 70 ટકા લોકો જાહેર Wi-Fiનો ઉપયોગ કરે છે. BSNLના ભૂતપૂર્વ ચેરમેન અરુણ શ્રીવાસ્તવના મતે, આ પગલાથી ન ફક્ત ઇન્ટરનેટ સસ્તું થશે, પરંતુ મોબાઇલ નેટવર્ક પર વધતા ડેટાના બોજને પણ ઘટાડશે.
13.jpg)
28.jpg)
