તાજેતરમાં, મોદી સરકારે કારના ટોલ સેટેલાઇટ આધારિત બનાવવાની વાત કરી હતી. આ અંતર્ગત, ટોલ પ્લાઝા પર વાહન રોકવાની જરૂર રહેશે નહીં અને તમારો ટોલ સેટેલાઇટમાંથી આપમેળે કાપવામાં આવશે. કેટલાક ટોલ પ્લાઝા પર આ સુવિધા ટ્રાયલ ધોરણે શરૂ પણ કરી દેવામાં આવી છે. હવે મોદી સરકાર રાષ્ટ્રીય ધોરીમાર્ગ પર લગભગ દરરોજ મુસાફરી કરતા લોકો માટે ટોલ ઓછો ચૂકવવો પડે તેવી યોજના બનાવી રહી છે.
માર્ગ પરિવહન અને રાજમાર્ગ મંત્રી નીતિન ગડકરીએ જાહેરાત કરી કે, રાષ્ટ્રીય રાજમાર્ગો પર ટોલ ચાર્જ માટે ટૂંક સમયમાં નવી નીતિ રજૂ કરવામાં આવશે. આ હેઠળ, વપરાશકર્તાઓને ડિસ્કાઉન્ટ આપવામાં આવશે. માર્ગ પરિવહન અને રાજમાર્ગ મંત્રાલય રાષ્ટ્રીય રાજમાર્ગો માટે વાર્ષિક અને આજીવન ટોલ ચાર્જ પર કામ કરી રહ્યું છે. આમાં, એક વર્ષ માટે 3000 રૂપિયાનો ચાર્જ અને 15 વર્ષ માટે 30,000 રૂપિયાનો એકસામટો ચાર્જ પ્રસ્તાવિત કરવામાં આવ્યો છે.
રાજ્યસભામાં પૂછાયેલા પ્રશ્નોના જવાબમાં ગડકરીએ કહ્યું કે, સમિતિઓએ સેટેલાઇટ આધારિત ટોલિંગ પર વધુ ચર્ચા કરવાનું સૂચન કર્યું છે. આમાં, સુરક્ષા, ગોપનીયતા, ભંગનું જોખમ અને સંચાલન નિયંત્રણ જેવા પાસાઓ પર ધ્યાન કેન્દ્રિત કરવામાં આવશે. કેન્દ્રીય મંત્રીએ ભાર મૂક્યો કે માળખાગત સુવિધાઓમાં રોકાણને કારણે ટોલ ચાર્જ જરૂરી છે. તેમણે કહ્યું, 'વિભાગની નીતિ એવી છે કે, જો તમારે સારા રસ્તાઓ જોઈતા હોય, તો તમારે તેના માટે પૈસા ચૂકવવા પડશે.'
2008ના નિયમો અનુસાર, એક જ રાષ્ટ્રીય ધોરીમાર્ગના વિવિધ ભાગો અને દિશાઓ પર સ્થિત ટોલ પ્લાઝા વચ્ચે ઓછામાં ઓછું 60 Kmનું અંતર હોવું જોઈએ. તેમણે કહ્યું કે, સત્ર પછી નવી ટોલ નીતિની જાહેરાત કરવામાં આવશે. આનાથી હાલના મુદ્દાઓ ઉકેલાશે અને વપરાશકર્તાઓને યોગ્ય રાહત મળશે અને સંબંધિત વિવાદોનું નિરાકરણ આવશે.
રાષ્ટ્રીય ધોરીમાર્ગો પરના ટોલ પ્લાઝા રાષ્ટ્રીય ધોરીમાર્ગ ફી નિયમો, 2008 અને સંબંધિત કન્સેશન કરારો અનુસાર કાર્ય કરે છે. વર્ષ 2023-24માં કુલ ટોલ વસૂલાત રૂ. 64,809.86 કરોડ પર પહોંચી ગઈ. આ ગયા વર્ષ કરતાં 35 ટકા વધુ છે. સેટેલાઇટ આધારિત ટોલિંગ વિશે માહિતી આપતાં ગડકરીએ કહ્યું કે, NavICને સચોટ સ્થાન પ્રદાન કરવા માટે વધુ સેટેલાઇટ નેટવર્ક અને રીસીવરો વિકસાવવાની જરૂર છે.
રાહુલ ગાંધીના નિવેદનો જ કોંગ્રેસ પક્ષને હરાવે ડૂબાડે છે 
