અમરેલી શહેરમાં 21 સપ્ટેમ્બરની મોડી રાત્રે બનેલી મારામારીની ઘટનાએ રાજકીય વર્તુળોમાં ચર્ચા જગાવી છે. અમરેલી-સાવરકુંડલા બાયપાસ રોડ પર રાજચામુંડા પાનની દુકાન નજીક બે વ્યક્તિઓ વચ્ચે થયેલી રકઝક બાદ એક યુવક પર ચાના કીટલાથી હુમલો કરાયો હોવાની ફરિયાદ સામે આવી છે. દિવ્યભાસ્કરના અહેવાલ મુજબ, કોંગ્રેસ નેતા પરેશ ધાનાણીના કૌટુંબિક ભાઈ અને અમરેલી શહેર કોંગ્રેસ પ્રમુખ સંદીપ ધાનાણીએ એક યુવકને 15 સેકન્ડમાં 5 ઘા મારતા 9 ટાંકા લેવા પડ્યા હતા. આ મામલે અમરેલી શહેર કોંગ્રેસ પ્રમુખ સંદીપ ધાનાણી સામે પોલીસે ગુનો નોંધ્યો હોવાનું જાણવા મળ્યું છે.
પોલીસે સર્તકતા દાખવી આરોપી સંદીપ ધાનાણીની ધરપકડ કરી લેવામાં આવી છે.જ્યારે ઇજાગ્રસ્ત યુવકને પ્રથમ અમરેલી અને ત્યાર બાદ ગંભીર ઈજા થતા વધુ સારવાર માટે રાજકોટ સિવિલ હોસ્પિટલમાં દાખલ કરાયો છે. મારામારીની સમગ્ર ઘટના CCTV કેમેરામાં પણ કેદ થઈ ગઈ છે. રાજચામુંડા પાનની દુકાન નજીક લગાવવામાં આવેલા CCTV કેમેરામાં રકઝક અને ત્યારબાદ બનેલી મારામારીની ઘટનાના દૃશ્યો કેદ થયા હોવાનું સામે આવ્યું છે. પોલીસ દ્વારા CCTV સહિતના પુરાવાઓના આધારે સમગ્ર ઘટનાની તપાસ કરવામાં આવી રહી છે.
https://twitter.com/humdekhengenews/status/2102338519633203663?s=20
ETV ભારતના અહેવાલ અનુસાર, ઘટનાની જાણ થતા જ અમરેલી પોલીસનો કાફલો ઘટનાસ્થળે અને ત્યારબાદ હૉસ્પિટલ પહોંચ્યો હતો. ઇજાગ્રસ્ત યુવકની ફરિયાદ અને તબીબી અહેવાલના આધારે અમરેલી પોલીસ સ્ટેશનમાં શહેર કોંગ્રેસ પ્રમુખ સંદીપ ધાનાણી સામે મારામારી સહિતની વિવિધ કલમો હેઠળ ગુનો દાખલ કરવામાં આવ્યો હતો.
આ ઘટના 21 સપ્ટેમ્બરે સાવરકુંડલા બાયપાસ રોડ પર RTO ઓફિસ પાસે આવેલી રાજચામુંડા દુકાન પાસે બની હતી. ધર્મકુમાર જાગૃતભાઈ જોષીપુરા મોડી રાત્રે માવો-મસાલો લેવા ગયો હતો. તે સમયે સંદીપ ધાનાણી ત્યાં હાજર હતા.
ઈજાગ્રસ્ત ધર્મકુમારની પત્ની લતાબેન જોશીપુરાએ જણાવ્યું હતું કે, હુમલા પડેલા સંદીપ ધાનાણીનો તેની પત્ની સાથે ઝઘડો થતા 112 પોલીસ બોલાવવામાં આવી હતી. ત્યાં પબ્લિક ભેગી થઈ હતી જેમાં મારા પતિ પણ હતા. 112 રવાના થયાના પાંચ જ મિનિટ બાદ પાનના ગલ્લા પર સંદીપ ધાનાણીએ મારા પતિ પર હુમલો કરી દીધો. કોઈ કારણ વગર ધર્મકુમારને ત્યાંથી જતા રહેવાનું કહીને સંદીપ ધાનાણીએ ચાના કાઉન્ટર પરથી કીટલી લીધી હતી. પત્નીએ જણાવ્યું કે ઈજાગ્રસ્તનું સિટી સ્કેન કરાવવાનું કહ્યું છે.
અમરેલી સિટી પોલીસ ઇન્સ્પેક્ટર એમ.એમ. ઝાલાના જણાવ્યા મુજબ, ‘સમગ્ર મામલે ફરિયાદ નોંધાઈ છે અને આરોપીની ધરપકડ કરવાની પ્રક્રિયા હાલ ચાલુ છે. પોલીસ દ્વારા ફરિયાદમાં દર્શાવાયેલા આક્ષેપો તેમજ ઘટનાના CCTV ફૂટેજ સહિતના પુરાવાઓની તપાસ કરવામાં આવી રહી છે.’
આ ઘટના અંગે અમરેલી DySP ચિરાગ દેસાઈએ જણાવ્યું હતું કે, ‘સાવરકુંડલા બાયપાસ પર આવેલા રાજ ચામુંડા પાન પાર્લર પાસે ગઈકાલે ધનકુમાર જાગૃતિભાઈ જોશીપુરા પાન-માવો ખાવા ગયા હતા, જ્યાં અગાઉથી બાંકડા પર બેઠેલા સંદીપભાઈ ધાનાણીએ ધનકુમારને જોઈને અચાનક ગુસ્સામાં આવી જઈ ત્યાંથી નીકળી જવાનું કહી તેમની સાથે બોલાચાલી કરી હતી. ત્યારબાદ સંદીપભાઈએ ચાકુ વડે ધનકુમારના માથા પર ચાર-પાંચ ઘા મારી દેતા તેમને તાત્કાલિક હોસ્પિટલ ખસેડવામાં આવ્યા હતા, જ્યાં સારવાર દરમિયાન માથાના ભાગે ટાંકા આવ્યા હતા અને માઈનોર હેમરેજ હોવાનું સામે આવ્યું હતું. આ બનાવ સંદર્ભે કલમ 109 મુજબ ગુનો દાખલ કરી પોલીસે આરોપી સંદીપભાઈ ધાનાણીની અટકાયત કરી આગળની તપાસ હાથ ધરી છે.’
અમરેલી જિલ્લા કોંગ્રેસ પ્રમુખ પ્રતાપ દુધાતે જણાવ્યું કે, ‘તે વ્યક્તિ લોકઅપમા છે મારે તેની સાથે વાત થઈ નથી ત્યાં સુધી હું શું કહી શકું? જે પ્રકારે CCTV સામે આવ્યા છે અને ઘટના બની છે તે દુ:ખદ છે કાયદાથી ઉપર આપડે કોઈ નથી. કાયદો બધા માટે લાગૂ પડે છે.’
મારામારીની ઘટનામાં આરોપી તરીકે નામ સામે આવેલા સંદીપ ધાનાણી અમરેલી શહેર કોંગ્રેસ પ્રમુખ છે. તેઓ પૂર્વ વિપક્ષ નેતા પરેશ ધાનાણીના પિતરાઈ ભાઈ હોવાની પણ વાત સામે આવી રહી છે. શહેર કોંગ્રેસ પ્રમુખ સામે મારામારીનો ગુનો નોંધાતા ઘટનાએ અમરેલીના રાજકીય વર્તુળોમાં પણ ચર્ચા જગાવી છે.
જાહેર માર્ગો પર રાત્રિ દરમિયાન વધતી અસામાજિક ગતિવિધિઓ અને નાની બાબતોમાં જીવલેણ હુમલાઓ થવાની ઘટનાઓ નાગરિકોની સુરક્ષા સામે ગંભીર સવાલો ઊભા કરે છે. પોલીસ હવે CCTV ફૂટેજના આધારે હુમલા સમયે ત્યાં હાજર રહેલા અન્ય પ્રત્યક્ષદર્શીઓના નિવેદનો નોંધી રહી છે. આગામી દિવસોમાં આરોપીની ધરપકડ અને રિમાન્ડ પ્રક્રિયા બાદ જ વિવાદનું મૂળ કારણ સ્પષ્ટ થઈ શકશે
5.jpg)
