સંસ્કાર નગરી વડોદરામાં અતિ વ્યસ્ત રહેતા ટ્રાફિક સર્કલ પર મંગળવારે રાત્રે ટ્રાફિક સિગ્નલ બંધ હતું, ત્યારે એક બાઈક ચાલક નશો કરેલી હાલતમાં બાઇક પરથી ઉતર્યો હતો અને લોકોની ભીડ વચ્ચે જાહેરમાં બેશરમની જેમ પેશાબ કરવા લાગ્યો હતો, ત્યારે ટ્રાફીકમાં ઉભેલા વાહન ચાલકો પૈકી એક નાગરિકે પીધેલી હાલતનો વીડિયો મોબાઇલમાં ઉતારીને સોશિયલ મીડિયા પર વાયરલ કરી નાખ્યો હતો.
વાયરલ વીડિયોમાં એક વ્યકિત કહે છે કે, જુઓ આ પેલા ભાઈ અહીંયા ચાલુ ટ્રાફિક છે, એકદમ ચાલુ ટ્રાફિક છે, અહીં લોકો બેસે છે અને આ બાઈકવાળા ભાઈ એટલા વધારે પડતા બેશરમ છે કે બધા લોકોની સામે ત્યાં શું-શું કરવા બેઠા છે! અફકોર્સ આ 99.99% આ પીધેલો છે આ ભાઈ. આ ભાઈ જોઈ લો તમે. જો આ પરફેક્ટ પીધેલા ભાઈ છે આ. આ લાલ સિગ્નલ ઉપર આ વ્યક્તિ... તો હું વડોદરા પોલીસને તો કહેવા માંગુ છું કે 31st ચાલુ થઈ ગઈ છે તો આવા તત્વો પણ દેખાય છે.’ વીડિયોમાં યુવક જેમ-તેમ ચાલી ચાલતો જોવા જોવા મળે છે.
ગોરવા પોલીસ સ્ટેશનની સર્વેલન્સ ટીમને સોશિયલ મીડિયામાં વાયરલ થયેલા એક વીડિયોની જાણ થઈ હતી. ત્યારબાદ તાત્કાલિક પોલીસે એક્શનમાં આવી આ વીડિયો પરથી જાહેર સ્થળે નશાની હાલતમાં શરમજનક હરકત કરતા ગણેશ દિનકર સોનવણે (ઉં.વ. 26 રહે. રાજલક્ષ્મી ટેનામેન્ટ,લક્ષ્મીપુરા, વડોદરા)ને ગણતરીના કલાકોમાં જ ઝડપી પાડ્યો હતો અને તેની બાઇક જપ્ત કરી છે અને તેને કાન પકડાવીને ઉઠક-બેઠક કરાવી હતી. ઉલ્લેખનીય છે કે યુવક વડોદરા શહેરના અલકાપુરી વિસ્તારમાં સલૂન ચલાવતો હોવાનું જાણવા મળ્યું છે.
ગોરવા પોલીસ સ્ટેશનના PI કિરીટ લાઠીયાએ જણાવ્યું હતું કે, યુવકનો વીડિયો વાયરલ થતા અમે તુરંત તેની શોધખોળ શરૂ કરી હતી અને તેને લક્ષ્મીપુરા વિસ્તારમાંથી તેને ઝડપી પાડ્યો છે અને તેની સામે પ્રોહીબિશનનો ગુનો નોંધીને વધુ તપાસ હાથ ધરી છે.
