એન્જિનિયરોએ બુદ્ધિનું પ્રદર્શન કર્યું! નદી પર નહીં ખેતરોની વચ્ચોવચ પુલ ઊભો કરી દીધો

બિહારના કિશનગંજ જિલ્લામાં એન્જિનિયરો નદી કે નાળાને બદલે ખેતરમાં પુલ બનાવીને બુદ્ધિનું પ્રદર્શન કર્યું છે. જ્યા એક તરફ જનતા પુલ માટે તરસે છે, તો કિશનગંજમાં એન્જિનયરોએ નદીને બદલે ખેતરની વચ્ચે પુલ બનાવીને બુદ્ધિનું પ્રદર્શન કર્યું છે. પરિસ્થિતિ એવી છે કે આ પુલ નીચેથી નદી કે નાળું વહેતું નથી.

અહીંના ખેડૂતો ખુશીથી ખેતી કરી રહ્યા છે. આ અનોખી અજાયબીને જોઈને, લોકો હવે કહી રહ્યા છે કે ‘NASA’વાળાઓએ પણ આ ‘એન્જિનયરિંગ માર્વલ’ને શોધવા માટે ઉપગ્રહ મોકલવો પડશે. આ ઘટના કિશનગંજ જિલ્લાના ટેઉસા પંચાયતની છે. અહીં ધૂમબસ્તી અને ઢેકસરા ગામ વચ્ચે રમઝાન નદી વહે છે. ગ્રામજનોની સુવિધા માટે, મુખ્યમંત્રી ગ્રામ સડક યોજના હેઠળ લાખો રૂપિયાનો ખર્ચ કરીને એક પુલ તો બનાવવામાં આવ્યો, પરંતુ આ પુલ નદીથી ખૂબ દૂર એક ખેડૂતના ખેતરમાં બનીને તૈયાર થઇ ગયો.

આ પુલ નીચેથી તમને કોઈ નદી કે નાળું વહેતું નહીં દેખાય. ખેડૂતો તેની નીચે ખેતી કરતા જોવા મળશે. પુલની તસવીર જોઈને એવું લાગે છે કે આ વિસ્તારમાં ડાંગર, ઘઉં અને મકાઈના પાક ઉપરાંત, પુલની ખેતી પણ થવા લાગી છે. ગ્રામજનો આ પ્રોજેક્ટને લઇને પ્રશ્નો ઉઠાવી રહ્યા છે. તેમનું કહેવું છે કે આ પુલ કોઇ કામનો નથી અને તેના નિર્માણ પાછળનો એકમાત્ર હેતુ સરકારી ભંડોળને લૂંટવાનો છે.

ગ્રામજનોએ જણાવ્યું કે જ્યાં પુલ બનાવવામાં આવ્યો છે ત્યાં કોઈ નદી કે નાળું વહેતું નથી. પરંતુ નદી પુલથી થોડે દૂર છે, જ્યાં ખાલી છે. લોકોનું કહેવું છે કે આ પુલનું શું કામ છે, જ્યારે પુલ ખેતરમાં હશે તો લોકો તેનો ઉપયોગ કેવી રીતે કરશે. જ્યારે આ અંગે કિશનગંજ જિલ્લા મેજિસ્ટ્રેટ વિશાલ રાજને પૂછવામાં આવ્યું, ત્યારે તેમણે કહ્યું કે તપાસ કરવામાં આવશે. આ મામલો તેમના ધ્યાનમાં આવ્યો છે અને તેની તપાસ કરવામાં આવી રહી છે, અને જે કોઈ જવાબદાર હશે તેની સામે કાર્યવાહી કરવામાં આવશે.