તમિળનાડુના CM સી. જોસેફ વિજયે શુક્રવારે પુઝલ સેન્ટ્રલ જેલની અચાનક મુલાકાત લઈ નિરીક્ષણ કર્યું હતું. આ મુલાકાત દરમિયાન તેમણે જેલમાં કેદીઓને અપાતી મૂળભૂત સુવિધાઓ, મેડિકલ કેર, ખોરાકની ગુણવત્તા અને વ્યાવસાયિક તાલીમ કેન્દ્રોની કામગીરીની સમીક્ષા કરી હતી. તેમણે કેદીઓની જરૂરિયાતો અને સમસ્યાઓ જાણવા માટે તેમની સાથે સીધો સંવાદ પણ સાધ્યો હતો.
એક સત્તાવાર યાદી મુજબ, પુઝલ સેન્ટ્રલ જેલ દેશના સૌથી મોટા જેલ સંકુલ પૈકીના એક તરીકે ઓળખાય છે. મુલાકાત દરમિયાન CM વિજયે પુઝલ સેન્ટ્રલ જેલ-1 ની વિવિધ મહત્ત્વપૂર્ણ વ્યવસ્થાઓની તપાસ કરી હતી, જેમાં ક્વોરેન્ટાઇન ઝોન, વિઝિટર્સ હોલ, જેલ હોસ્પિટલ, નશા મુક્તિ પુનર્વસન કેન્દ્ર, મહાત્મા ગાંધી કોમ્યુનિટી કોલેજના વર્ગખંડો, પુસ્તકાલય, એડવાન્સ્ડ કોમ્પ્યુટર ટ્રેનિંગ સેન્ટર, હાઇ-સિક્યોરિટી બ્લોક અને ફાંસી આપવાના વિસ્તારનું નિરીક્ષણ સામેલ હતું.
ત્યારબાદ CMએ જેલના વ્યવસાયિક વર્કશોપની મુલાકાત લીધી હતી, જ્યાં કેદીઓ લોખંડની શાકભાજી રાખવાની રેક, કાગળના કવર અને ઓફિસ ફાઇલ ફોલ્ડર્સનું ઉત્પાદન કરે છે. વિજયે કેદીઓ માટે ધાબળા અને અન્ય કાપડનું ઉત્પાદન કરતા પાવરલૂમ વિભાગ તેમજ સિલાઈ યુનિટની પણ સમીક્ષા કરી હતી. તેમણે કેદીઓને પીરસવામાં આવતા ભોજનની ગુણવત્તા જાતે ચકાસી હતી અને તેમની ચિંતાઓ તેમજ રજૂઆતો સીધી સાંભળવા માટે તેમની સાથે વાતચીત કરી હતી.
જેલની મુલાકાત બાદ CM એમ-3 પુઝલ પોલીસ સ્ટેશને પહોંચ્યા હતા. તેમણે ઇન્સ્પેક્ટર સાથે સ્ટેશનની દૈનિક કામગીરીની સમીક્ષા કરી, સ્ટેશન રજિસ્ટરોની તપાસ કરી અને સબ-ઇન્સ્પેક્ટરનો ખંડ, કોમ્પ્યુટર રૂમ તેમજ લોક-અપ સુવિધાઓનું નિરીક્ષણ કર્યું હતું. આ નિરીક્ષણ દરમિયાન ડાયરેક્ટર જનરલ ઓફ પોલીસ , જેલ અને સુધારાત્મક સેવાઓના ડિરેક્ટર સંદીપ રાય રાઠોડ, જેલ નાયબ પોલીસ મહાનિરીક્ષક ટી. પલાની, જેલ સુપરિન્ટેન્ડેન્ટ કૃષ્ણા રાજ અને અન્ય વરિષ્ઠ સરકારી અધિકારીઓ CMની સાથે ઉપસ્થિત રહ્યા હતા.
3.jpg)
