મધ્યપ્રદેશમાં IPS એસોસિએશને BJPના ધારાસભ્ય પ્રીતમ લોધી સામે કડક વલણ અપનાવ્યું છે. નારાજગી વ્યક્ત કરતા, IPS એસોસિએશને લોધી સામે કાર્યવાહીની માંગ કરી છે. અહેવાલો અનુસાર, ધારાસભ્ય પ્રીતમ લોધીએ વાંધાજનક ટિપ્પણી કરી હતી અને કરૈરાના SDOP ને ધમકી આપી હતી. આ ઘટનાથી પોલીસ વિભાગમાં રોષ ફેલાયો હતો. IPS એસોસિએશને સત્તાવાર રીતે પ્રતિક્રિયા આપ્યા પછી મામલો વધુ ઉગ્ર બન્યો હતો.
IPS એસોસિએશને પોતાના નિવેદનમાં જણાવ્યું હતું કે, પોલીસ અધિકારીઓ પ્રત્યે કોઈપણ જનપ્રતિનિધિ દ્વારા આવું વર્તન સંપૂર્ણપણે અસ્વીકાર્ય છે. એસોસિએશને તેને માત્ર અધિકારીનું અપમાન જ નહીં, પરંતુ કાયદો અને વ્યવસ્થા માટે ચિંતાનો વિષય પણ ગણાવ્યો હતો. ભવિષ્યમાં આવી ઘટનાઓ અટકાવવા માટે ધારાસભ્ય સામે યોગ્ય અને કડક કાર્યવાહી કરવાની માંગ કરી હતી.
એસોસિએશનનું કહેવું છે કે, પોલીસ અધિકારીઓને એવું વાતાવરણ પૂરું પાડવું જોઈએ જ્યાં તેઓ સ્વતંત્ર અને નિષ્પક્ષ રીતે કામ કરી શકે. જો જનપ્રતિનિધિઓ આ પ્રકારનું દબાણ લાવશે તો તે કાયદો અને વ્યવસ્થાને અસર કરી શકે છે. આ મામલો હવે રાજકીય અને વહીવટી વર્તુળોમાં ચર્ચાનો વિષય બની ગયો છે. સરકાર અને સંબંધિત વિભાગો શું કાર્યવાહી કરે છે અને ધારાસભ્ય સામે કોઈ કાર્યવાહી થાય છે કે નહીં તે જોવાનું બાકી છે.
MP IPS એસોસિએશનના પ્રમુખ ચંચલ શેખરે લખ્યું છે કે, ધારાસભ્ય પ્રીતમ સિંહ લોધીએ શિવપુરી જિલ્લાના કરૈરા SDOP ડૉ. આયુષ જાખર વિશે અભદ્ર ટિપ્પણી કરી છે. આ ખૂબ જ નિંદનીય અને જાહેર જીવનની ગરિમાની વિરુદ્ધ છે. આ વીડિયો સોશિયલ મીડિયા પર પણ વાયરલ થઈ રહ્યો છે. વીડિયોમાં નવનિયુક્ત પોલીસ અધિકારી ડૉ. આયુષ જાખર અને તેમના પરિવાર સામે અપમાનજનક ટિપ્પણીઓ અને ધમકીઓ સંપૂર્ણપણે અભદ્ર અને અશોભનીય છે. આ વર્તન એક જનપ્રતિનિધિના પદની ગરિમાની વિરુદ્ધ છે. તે વહીવટી તંત્ર અને તમામ અધિકારીઓના મનોબળ પર પ્રતિકૂળ અસર કરે છે.
જનપ્રતિનિધિઓ પાસેથી તેમના વર્તન અને ભાષામાં સંયમ અને શિષ્ટાચાર જાળવવાની અપેક્ષા રાખવામાં આવે છે. આવી અભદ્ર ભાષા અને ધમકીભર્યું વર્તન કોઈપણ લોકશાહી વ્યવસ્થામાં અસ્વીકાર્ય છે અને વહીવટી તંત્રની નિષ્પક્ષતાને નબળી પાડે છે. મધ્યપ્રદેશ ભારતીય પોલીસ સેવા સંઘ આ કૃત્યની સખત નિંદા કરે છે અને યોગ્ય કાર્યવાહીની માંગ કરે છે.
મધ્યપ્રદેશમાં શાસક ભારતીય જનતા પાર્ટી (BJP)ના ધારાસભ્ય પ્રીતમ લોધીના પુત્ર પર તેમના થારથી ટક્કર મારીને 5 લોકોને ઘાયલ કરવાનો આરોપ છે. પોલીસે પ્રીતમ લોધીના પુત્ર દિનેશ લોધી સામે કેસ નોંધ્યો છે અને પૂછપરછ માટે કરૈરા પોલીસ સ્ટેશનમાં બોલાવ્યા છે. કરૈરા સબ-ડિવિઝનલ પોલીસ ઓફિસર (SDOP) આયુષ જાખરે જણાવ્યું હતું કે, તપાસના ભાગ રૂપે દિનેશ લોધીની પોલીસ સ્ટેશનમાં પૂછપરછ કરવામાં આવી હતી અને અકસ્માત સ્થળ પર લઈ જવામાં આવ્યો હતો.
IPS અધિકારીએ વધુમાં જણાવ્યું હતું કે, વાહન પરની કાળી ફિલ્મ દૂર કરવામાં આવી હતી અને મોટર વાહન અધિનિયમ હેઠળ ચલણ કાપવામાં આવ્યું હતું. પ્રીતમ લોધીએ પાછળથી દાવો કર્યો હતો કે જાખરે તેમના પુત્રને ભવિષ્યમાં કરૈરામાં ન દેખાવા માટે કહ્યું હતું. સોશિયલ મીડિયા પર ફરતા થયેલા એક વીડિયોમાં, ધારાસભ્ય કથિત રીતે જાખડને કહેતા સાંભળી શકાય છે કે, કરૈરા કોઈના 'બાપની મિલકત' નથી. શાસક પક્ષના ધારાસભ્યને એમ પણ કહેતા સાંભળી શકાય છે કે, તેમનો પુત્ર કરૈરા આવશે અને ત્યાંથી ચૂંટણી લડશે.
