2026 એશિયન ગેમ્સ માટે ભારતીય ક્રિકેટ ટીમની તૈયારીઓ શરૂ થઈ ગઈ છે. ભારતીય ક્રિકેટ કંટ્રોલ બોર્ડ (BCCI)એ સપ્ટેમ્બર-ઓક્ટોબરમાં જાપાનના આઈચી-નાગોયામાં યોજાનારી રમતો માટે ભારતીય ઓલિમ્પિક એસોસિએશન (IOA)ને 30 ખેલાડીઓની સંભવિત યાદી સુપરત કરી છે. આ યાદીમાં સૌથી મોટી ચર્ચાનો મુદ્દો યુવા બેટ્સમેન વૈભવ સૂર્યવંશીનો સમાવેશ અને વર્તમાન T20 કેપ્ટન સૂર્યકુમાર યાદવને બહાર રાખવાનો છે.
15 વર્ષના વૈભવ સૂર્યવંશીએ IPL 2026માં પોતાની વિસ્ફોટક બેટિંગથી બધાનું ધ્યાન ખેંચ્યું હતું અને હવે તેને પહેલીવાર સંભવિત એશિયન ગેમ્સ ટીમમાં સામેલ કરવામાં આવ્યો છે. બીજી તરફ, સૂર્યકુમાર યાદવ અને ટેસ્ટ અને ODI કેપ્ટન શુભમન ગિલનું નામ આ યાદીમાં નથી.
હકીકતમાં, ભારતનો વેસ્ટ ઇન્ડીઝ પ્રવાસ અને એશિયન ગેમ્સ ક્રિકેટ ટુર્નામેન્ટ લગભગ એકસાથે રમાશે. ભારત અને વેસ્ટ ઈન્ડિઝ 27 સપ્ટેમ્બરથી 17 ઓક્ટોબર સુધી 3 વનડે અને 5 T20 મેચની શ્રેણી રમવાના છે, જ્યારે એશિયન ગેમ્સ મેન્સ ક્રિકેટ ટુર્નામેન્ટ 24 સપ્ટેમ્બરથી 3 ઓક્ટોબર સુધી ચાલશે. પરિણામે, પસંદગીકારોને બે અલગ અલગ T20 ટીમો માટે યોજના બનાવવાની ફરજ પડી રહી છે.
શુભમન ગિલને ODI ટીમની કેપ્ટનશીપ કરવાની શક્યતાને ધ્યાનમાં રાખીને એશિયન ગેમ્સની યાદીમાં સામેલ કરવામાં આવ્યો ન હતો. સૂત્રોએ એક મીડિયા એજન્સીને જણાવ્યું હતું કે, સૂર્યકુમાર યાદવને હવે 2028 ઓલિમ્પિક અને આગામી T20 વર્લ્ડ કપ માટે લાંબા ગાળાની યોજનાઓનો ભાગ માનવામાં આવતો નથી, તેથી તેમને સંભવિત ખેલાડીઓમાં પણ સામેલ કરવામાં આવ્યો નથી.
એશિયન ગેમ્સની કેપ્ટનશીપ માટેના મુખ્ય દાવેદારોમાં શ્રેયસ ઐયર, સંજુ સેમસન અને તિલક વર્માનો સમાવેશ થાય છે. ફાસ્ટ બોલર જસપ્રીત બુમરાહ ચોક્કસપણે યાદીમાં છે, પરંતુ 2027 ODI વર્લ્ડ કપ માટેની તૈયારીઓને જોતાં, તે સમયે તેની પ્રાથમિકતા ODI ક્રિકેટ હોઈ શકે છે. હર્ષિત રાણાને પણ, તે ફિટનેસ ટેસ્ટ પાસ કરીને આવશે તે આશા સાથે સંભવિત ખેલાડીઓમાં સામેલ કરવામાં આવ્યો છે.
સ્પિન વિભાગમાં કુલદીપ યાદવ, અક્ષર પટેલ, વોશિંગ્ટન સુંદર અને હર્ષ દુબેનો સમાવેશ કરવામાં આવ્યો છે. જોકે, આમાંથી ફક્ત બે ખેલાડીઓને એશિયન ગેમ્સની ટીમમાં સામેલ કરવામાં આવે તેવી શક્યતા છે, જ્યારે બાકીના ખેલાડીઓ વેસ્ટ ઇન્ડીઝ શ્રેણીનો ભાગ બની શકે છે.
રસપ્રદ વાત એ છે કે, તાજેતરમાં સારું પ્રદર્શન ન હોવા છતાં, હેંગઝોઉ એશિયન ગેમ્સમાં ભારતને ગોલ્ડ મેડલ અપાવનાર કેપ્ટન રુતુરાજ ગાયકવાડનો પણ આ યાદીમાં સમાવેશ કરાયો છે.
BCCI દ્વારા IOAને મોકલવામાં આવેલી 30 ખેલાડીઓની સંભવિત યાદીમાં, યશસ્વી જયસ્વાલ, અભિષેક શર્મા, વૈભવ સૂર્યવંશી, ઈશાન કિશન, સંજુ સેમસન, શ્રેયસ અય્યર, રિષભ પંત, હાર્દિક પંડ્યા, રિંકુ સિંહ, તિલક વર્મા, જસપ્રિત બુમરાહ, અક્ષર પટેલ, અર્શદીપ સિંહ, કુલદીપ યાદવ, નીતીશ કુમાર રેડ્ડી, પ્રસિદ્ધ કૃષ્ણા, વરુણ ચક્રવર્તી, અનુકુલ રોય, આયુષ બદોની, હર્ષ દુબે, ધ્રુવ જુરેલ, ખલીલ અહેમદ, રુતુરાજ ગાયકવાડ, રવિ બિશ્નોઈ, શાહબાઝ અહેમદ, શિવમ દુબે, વિપરાજ નિગમ, હર્ષિત રાણા, યશ ઠાકુર અને વોશિંગ્ટન સુંદર, વગેરેનો સમાવેશ કરવામાં આવ્યો છે.
