હોળીને લઈને હંગામો મચી ગયો છે. 9 માર્ચે ખાસ હોળી કાર્યક્રમ માટે પરવાનગી ન મળવા બદલ અખિલ ભારતીય કરણી સેનાએ અલીગઢ મુસ્લિમ યુનિવર્સિટી (AMU) ખાતે વિરોધ પ્રદર્શન કર્યું. કરણી સેનાનો આરોપ છે કે, AMU પ્રશાસન હિન્દુ વિદ્યાર્થીઓ સાથે ભેદભાવ કરી રહ્યું છે. વિદ્યાર્થીઓએ 'હોળી મિલન' કાર્યક્રમ માટે પરવાનગી માંગી હતી, જેને નકારી કાઢવામાં આવી હતી. કરણી સેનાએ ચેતવણી આપી છે કે, જો પરવાનગી નહીં મળે તો તેઓ 10 માર્ચે AMUમાં પ્રવેશ કરશે અને હોળી ઉજવશે.
અખિલ ભારતીય કરણી સેનાના પ્રમુખ જ્ઞાનેન્દ્ર સિંહ ચૌહાણે AMU પ્રશાસન પર હિન્દુ વિદ્યાર્થીઓ સાથે ભેદભાવ કરવાનો આરોપ લગાવ્યો છે. તેમણે કહ્યું કે, AMUના કેટલાક વિદ્યાર્થીઓએ 'હોળી મિલન' કાર્યક્રમ ઉજવવા માટે AMU વહીવટીતંત્ર પાસેથી પરવાનગી માંગી હતી, પરંતુ યુનિવર્સિટીએ તેને નકારી કાઢી છે. આજે અમે PMને સંબોધિત DMને એક મેમોરેન્ડમ આપ્યું છે, જેમાં કહેવામાં આવ્યું છે કે, AMUમાં હિન્દુ વિદ્યાર્થીઓ સાથે અલગ વર્તન કરવામાં આવી રહ્યું છે. તેમણે વધુમાં કહ્યું કે, જો 'ખાસ' હોળી કાર્યક્રમને મંજૂરી નહીં મળે, તો 10 માર્ચે અમે AMUમાં પ્રવેશ કરીશું અને વિદ્યાર્થીઓ સાથે હોળી ઉજવીશું.
AMUના વિદ્યાર્થી અખિલ કૌશલે પુષ્ટિ આપી કે, આ કાર્યક્રમનું આયોજન કરવા માટે વિનંતી કરવામાં આવી હતી. તેમણે કહ્યું કે, 25 ફેબ્રુઆરીએ વિદ્યાર્થીઓએ AMUના કુલપતિને પત્ર લખીને 9 માર્ચે 'હોળી મિલન' કાર્યક્રમનું આયોજન કરવાની પરવાનગી માંગી હતી. અમને હજુ સુધી આ માટે પરવાનગી મળી નથી.
આ દરમિયાન, AMUના પ્રોક્ટર પ્રોફેસર વસીમ અલી ખાને યુનિવર્સિટીના વલણને સ્પષ્ટ કરતા કહ્યું કે, વિનંતી પર વિચાર કરવામાં આવ્યો હતો, પરંતુ યુનિવર્સિટીની નીતિઓમાં સુસંગતતા જાળવવા માટે આખરે તેને નકારી કાઢવામાં આવી હતી. પ્રોક્ટર ખાને જણાવ્યું હતું કે, 26 ફેબ્રુઆરીના રોજ, પાંચ વિદ્યાર્થીઓએ કુલપતિને સંબોધિત એક સહી કરેલો પત્ર સુપરત કર્યો હતો, જેમાં 9 માર્ચે હોળીની ઉજવણી માટે ખાસ કાર્યક્રમ યોજવા માટે નિયુક્ત સ્થળની વિનંતી કરવામાં આવી હતી. યુનિવર્સિટીએ નિર્ણય લીધો કે. આવી કોઈ ખાસ પરવાનગી પહેલાં ક્યારેય આપવામાં આવી ન હોવાથી, હવે પણ તેનું જ પાલન કરવામાં આવશે. યુનિવર્સિટીમાં વિદ્યાર્થીઓ પોતપોતાના વિભાગો અને છાત્રાલયોમાં હોળી ઉજવે છે. યુનિવર્સિટી કોઈ ખાસ કાર્યક્રમ માટે પરવાનગી આપવાના પક્ષમાં નથી.
-copy40.jpg)
-copy39.jpg)
