રેસ્ટોરાંમાં ટેબલ ન મળતા મંત્રી થયા ગુસ્સે, રાત્રે જ ફૂડ સેફ્ટી ટીમની પાસે સેમ્પલિંગ કરાવ્યું

મધ્યપ્રદેશના જાહેર આરોગ્ય રાજ્યમંત્રી નરેન્દ્ર શિવાજી પટેલને ગ્વાલિયરના ક્વોલિટી રેસ્ટોરન્ટમાં ટેબલ ન મળતાં તેમણે હોબાળો મચાવ્યો હતો. રવિવારે રાત્રે સિટી સેન્ટર વિસ્તારમાં આવેલા રેસ્ટોરન્ટમાં બનેલી આ ઘટનાનો CCTV ફૂટેજ પણ વાયરલ થયો છે, જેમાં મંત્રીના PSO સ્ટાફને ધક્કા મુક્કી કરતા જોવા મળ્યા હતા. મંત્રીએ ફૂડ સેફ્ટી ટીમને બોલાવી અને રાત્રે સેમ્પલિંગ કરાવ્યું, ત્યાર પછી પોલીસે રેસ્ટોરન્ટ માલિકને કસ્ટડીમાં લીધો. જોકે, વેપારીઓના વિરોધ પછી તેમને છોડી દેવામાં આવ્યા હતા.

વિધાનસભા અધ્યક્ષ નરેન્દ્ર સિંહ તોમરના નાના પુત્રના સ્વાગત સમારોહમાં હાજરી આપવા માટે મંત્રી નરેન્દ્ર શિવાજી પટેલ ગ્વાલિયર આવ્યા હતા. રવિવારે રાત્રે, તેઓ તેમના પરિવાર સાથે ક્વોલિટી રેસ્ટોરન્ટમાં રાત્રિભોજન કરવા ગયા હતા. રવિવારે ભીડ હોવાથી, રેસ્ટોરન્ટના બધા ટેબલ બુક થઈ ગયા હતા, જેના કારણે મંત્રીને રાહ જોવી પડી. રેસ્ટોરન્ટ સ્ટાફે જણાવ્યું કે, બે ફૂડ સેફ્ટી ઓફિસર, લોકેન્દ્ર સિંહ અને બુંદેલાએ 5 અને 10 લોકો માટે અલગ-અલગ ટેબલ બુક કરાવ્યા હતા. જ્યારે સ્ટાફે પૂછ્યું કે બુકિંગ કોના નામે કરવામાં આવ્યું છે, ત્યારે મંત્રી ગુસ્સે થઈ ગયા.

આ પછી, મંત્રી અને તેમના PSO રેસ્ટોરન્ટના રસોડામાં પ્રવેશ્યા અને સ્ટાફ સાથે ઉગ્ર દલીલ કરી. મંત્રીએ તાત્કાલિક ફૂડ સેફ્ટી ટીમને બોલાવી અને નમૂના લેવાનું શરૂ કર્યું, જે રાત્રે 11:15 વાગ્યા સુધી ચાલુ રહ્યું. એક તેલનો નમૂનો તાત્કાલિક પરીક્ષણમાં પણ નિષ્ફળ ગયો. આ દરમિયાન પોલીસે રેસ્ટોરન્ટના માલિક કમલ અરોરાની અટકાયત કરી હતી, પરંતુ ચેમ્બર ઓફ કોમર્સ અને વેપારીઓના વિરોધ પછી તેમને છોડી દેવામાં આવ્યા હતા.

ફોન પર મીડિયા સાથે વાત કરતા મંત્રી નરેન્દ્ર શિવાજી પટેલે કહ્યું, 'આ એક નિયમિત તપાસ હતી. હું જ્યાં પણ જાઉં છું, હું મારા વિભાગને લગતી ઓફિસો અને સંસ્થાઓનું નિરીક્ષણ કરું છું. રેસ્ટોરન્ટમાં કેટલાક નમૂનાઓ તે જ સમયે નિષ્ફળ ગયા, જેના પછી સ્ટાફે ગેરવર્તન કરવાનું શરૂ કર્યું. આશ્ચર્યજનક છે કે જો સ્ટાફ મંત્રી સાથે આ રીતે વર્તન કરી શકે છે, તો તેઓ સામાન્ય અધિકારીઓ અને કર્મચારીઓ પર કેટલું ગેરવર્તન કરતા હશે.'

https://twitter.com/INCMP/status/1919251230024462399

રાજ્યના મોહન યાદવ સરકારના મંત્રીએ એમ પણ કહ્યું કે, તેમણે ગ્વાલિયરમાં અન્ય સ્થળોએ પણ તપાસ કરી હતી અને એક દિવસ પહેલા, ભિંડથી ગ્વાલિયર આવી રહેલી એક એમ્બ્યુલન્સ મુસાફરોને લઈ જતી પકડાઈ ગઈ હતી અને તેને પોલીસ સ્ટેશનમાં જપ્ત કરી રાખવામાં આવી હતી.

મંત્રીએ આરોપોને નકારી કાઢ્યા અને કહ્યું, 'મારા વિરુદ્ધ બળજબરીથી ખોટી અફવાઓ ફેલાવવામાં આવી રહી છે. મેં મારી હાજરીમાં આ મામલાની તપાસ કરાવી. જો કોઈ કંઈ ખોટું કરશે તો તેને બક્ષવામાં આવશે નહીં.' તેમણે એમ પણ કહ્યું કે, રેસ્ટોરન્ટનો તેમના પર નશો કરેલી હાલતમાં હોવાનો આરોપ ખોટો છે અને તેમના ફેલ થયેલા નમૂનાનો વીડિયો પણ વાયરલ થવો જોઈએ.

રાજ્યના વિપક્ષી નેતા ઉમંગ સિંઘારે 'X' પર આ બનેલી ઘટના પર તીવ્ર પ્રતિક્રિયા આપી. તેમણે લખ્યું, 'રાજ્યના ખેડૂતો ખાતર માટે કલાકો સુધી લાઇનમાં ઉભા રહે છે, પણ સરકારને કોઈ પરવા નથી. પરંતુ જ્યારે એક મંત્રીને હોટલમાં ટેબલ ન મળ્યું, ત્યારે આખું વહીવટીતંત્ર દોડી આવ્યું. હોટલ સંચાલકને માર મારવામાં આવ્યો, ખાદ્ય સુરક્ષા અધિકારીઓને પણ બોલાવવામાં આવ્યા. શું આ 'જનસેવા' છે? AJP સરકારના મંત્રીઓ સત્તાના નશામાં એટલા મશગુલ છે કે તેમને જનતાની સમસ્યાઓ દેખાતી નથી.'

મધ્યપ્રદેશ ચેમ્બર ઓફ કોમર્સના પ્રમુખ પ્રવીણ અગ્રવાલે આ ઘટનાની નિંદા કરી અને કહ્યું, 'આ ખોટું છે. અમે તેની ફરિયાદ કરીશું અને મંત્રીને બરતરફ કરવાની માંગ કરીશું.' રેસ્ટોરન્ટના માલિક અને સ્ટાફે એવો પણ આરોપ લગાવ્યો હતો કે મંત્રીએ તેમની સાથે ગેરવર્તન કર્યું અને ધક્કા મુક્કી કરી હતી.

મહિલા ખાદ્ય સુરક્ષા અધિકારીએ જણાવ્યું હતું કે, નમૂના લેવાની પ્રક્રિયા પૂર્ણ થયા પછી જ અંતિમ પરિણામો બહાર આવશે. CCTV ફૂટેજમાં, મંત્રીના PSO એક સ્ટાફ સભ્યને ધક્કો મારતા જોવા મળ્યા હતા અને ત્યાર પછી તે જ સ્ટાફ સભ્ય મંત્રી સમક્ષ હાથ જોડીને માફી માંગતા જોવા મળ્યા હતા. ઘટનાની સત્યતા જાણવા માટે તપાસ ચાલી રહી છે.