ઓપરેશન સિંદૂર પર રાજ ઠાકરે કેમ ખુશ નથી દેખાતા, સરકાર-સેનાને આપી આ સલાહ

પહેલગામ આતંકવાદી હુમલાના જવાબમાં, ભારતે 'ઓપરેશન સિંદૂર' હેઠળ પાકિસ્તાન પર હવાઈ હુમલો કર્યો. ભારતીય સેનાએ પાકિસ્તાન અને POKમાં બનેલા 9 આતંકવાદી તાલીમ શિબિરોને તોડી પાડ્યા. આ હુમલામાં ઘણા આતંકવાદીઓ માર્યા ગયા હોવાના અહેવાલ છે. મહારાષ્ટ્ર નવનિર્માણ સેના (MNS)ના વડા રાજ ઠાકરેએ આ અંગે મોટું નિવેદન આપ્યું છે.

રાજ ઠાકરેએ કહ્યું, 'પહલગામમાં થયેલા હુમલા પછી મેં પહેલી પોસ્ટ કરી હતી. તેમને (પાકિસ્તાનને) પાઠ ભણાવવો જરૂરી હતો. જોકે, યુદ્ધ એ હુમલાનો પર્યાય નથી. પાકિસ્તાન પહેલેથી જ એક બરબાદ દેશ છે. આપણે અત્યાર સુધી હુમલો કરનારાઓને શોધી શક્યા નથી. તેમને શોધવા એ પહેલી જવાબદારી છે.'

જ્યારે મનસેના વડા રાજ ઠાકરેને પૂછવામાં આવ્યું કે, પાકિસ્તાન પર હવાઈ હુમલા વિશે તેમનો શું વિચાર છે? જવાબમાં રાજ ઠાકરેએ કહ્યું, 'જ્યારે હુમલો થયો ત્યારે PM નરેન્દ્ર મોદી સાઉદી અરેબિયામાં હતા. ત્યાંથી તેઓ બિહાર ગયા. મોક ડ્રીલને બદલે કોમ્બિંગ ઓપરેશન કરો. આપણા દેશના પ્રશ્નો ખતમ નથી થઈ રહ્યા. તમે ક્યાં યુદ્ધ કરવા જઈ રહ્યા છો?'

આ હુમલામાં આતંકવાદી મસૂદ અઝહરના પરિવારના 14 સભ્યો માર્યા ગયા હોવાનો પણ દાવો કરવામાં આવી રહ્યો છે. એક તરફ, 'ઓપરેશન સિંદૂર' માટે દેશભરમાં ભારતીય સેના અને PM નરેન્દ્ર મોદીની પ્રશંસા થઈ રહી છે, તો બીજી તરફ, રાજ ઠાકરે છે જે સરકારની ટીકા કરી રહ્યા છે.

રાજ ઠાકરે કહે છે કે, સરકાર હજુ સુધી પહેલગામ હુમલામાં સંડોવાયેલા આતંકવાદીઓને શોધવામાં સફળ થઈ નથી. પાકિસ્તાનને આવો પાઠ ભણાવવો જરૂરી હતો, પરંતુ યુદ્ધ કરવું કે હવાઈ હુમલા કરવા યોગ્ય નથી. રાજ ઠાકરેએ દાવો કર્યો છે કે, જ્યારે અમેરિકામાં 9/11નો ટ્વીન ટાવર હુમલો થયો હતો, ત્યારે અમેરિકાએ તે આતંકવાદીઓને શોધી કાઢ્યા હતા અને તેમને મારી નાખ્યા હતા. આ પછી, યુદ્ધ લડવામાં આવ્યું નહીં કારણ કે યુદ્ધ એ આતંકવાદનો જવાબ નથી.

રાજ ઠાકરેએ વધુમાં કહ્યું કે, સરકારે મોક ડ્રીલને બદલે કોમ્બિંગ ઓપરેશન કરવું જોઈએ. એટલું જ નહીં, રાજ ઠાકરેએ એવો પણ દાવો કર્યો હતો કે, પહેલગામ આતંકવાદી હુમલામાં ગુપ્તચર માહિતીમાં ખામીઓ હતી. તેમણે પ્રશ્ન ઉઠાવ્યો કે, જ્યાં હજારો પ્રવાસીઓ હંમેશા આવે છે ત્યાં સુરક્ષા કેમ નહોતી? તેમણે કહ્યું કે હવાઈ હુમલાઓ દ્વારા કે યુદ્ધ કરીને લોકોનું ધ્યાન ભટકાવવું એ કોઈ વિકલ્પ નથી.