લાકડી વડે ખરાબ રીતે માર મારવાને કારણે પીટબુલ ડોગનું જડબું તૂટી ગયું હતું. આ સાથે તેના 8 દાંત પણ તૂટી ગયા હતા. હુમલાને કારણે તેના મોઢામાંથી લોહીની ધાર વહી હતી. આ ઘટનાનો એક વીડિયો પણ સામે આવ્યો હતો, જેમાં બે યુવકો ઘરમાં ઘૂસીને ખાટલા પર સૂતેલા કૂતરા પર ડંડા વડે હુમલો કરતા જોવા મળ્યા હતા.
વાસ્તવમાં, આ મામલો સોમવારે સાંજે UPના ગાઝિયાબાદમાં બન્યો હતો. દેવેન્દ્રના ઘરમાં એક વર્ષનો પિટબુલ કૂતરો પાળેલો છે. તેનું નામ મોતી છે. હાલમાં દેવેન્દ્રના ઘરમાં બાંધકામનું કામ ચાલી રહ્યું છે. નોમાન અને ઈમરાન તેની પાડોશમાં રહે છે. સોમવારે સાંજે ઈમરાન અને નોમાન હાથમાં જાડી લાકડી (ડંડો) લઈને ઘૂસી ગયા હતા અને ખાટલા પર સુતેલા મોતીને એક પછી એક એમ વારંવાર ડંડા વડે હુમલો કર્યો હતો. કૂતરો પોતાને હુમલાથી બચાવી શક્યો નહીં. થોડી જ વારમાં દેવેન્દ્રના ઘરમાં હોબાળો મચી ગયો.
ઈમરાન અને નોમાન દ્વારા ખુબ માર માર્યા બાદ મોતીના મોઢામાંથી લોહી વહેવા લાગ્યું અને તે બેહોશ થઈને ખાટલા પર જ પડ્યો રહ્યો. અહીં દેવેન્દ્રના પરિવારની મહિલાઓએ ઈમરાન અને નોમાનને રોકવાનો પ્રયાસ કર્યો, બંનેએ તેમને પણ ઈજા પહોંચાડી હતી. આ ઘટનાનો જે વીડિયો સામે આવ્યો છે તેમાં બંને યુવકોના હાથમાં જાડી લાકડીઓ (ડંડા) છે. બીજી તરફ દેવેન્દ્રના પરિવારની મહિલાઓ જોર જોરથી બોલતી અને બૂમો પડતી જોવા મળી રહી છે.
બનાવ બાદ બંને પક્ષે સામસામી પોલીસ મથકમાં ફરિયાદ નોંધાવી હતી. તેમના અહેવાલમાં, હુમલાખોરોએ કહ્યું હતું કે, પીટબુલ તેમની પુત્રી પર ભસતો હતો. જ્યારે, દેવેન્દ્રની પત્ની રાની કહે છે કે, તેમના ઘરનું નિર્માણ કાર્ય ચાલી રહ્યું છે. પાડોશીની દીકરી બાંધકામના સામાન સાથે રમતી હતી. આ દરમિયાન મોતી (પીટબુલ) તેના પર ભસવા લાગ્યો. પણ અમે મોતીને અંદર લઇ લીધો હતો. ત્યાર પછી આ લોકોએ તેના પર હુમલો કર્યો હતો. આ લોકોએ મારી નણંદ પર પણ હુમલો કર્યો હતો.
રાનીએ પોલીસને જણાવ્યું કે, લાકડી વડે ખુબ માર માર્યા બાદ મોતી લોહીથી લથપથ થઈ ગયો હતો. તેના ઉપરના અને નીચેના જડબા તૂટી ગયા છે અને 8 દાંત પણ તૂટી ગયા છે. અમે તેની સારવાર વિશે ખૂબ ચિંતિત હતા. પછી હાઉસ ઓફ સ્ટ્રે એનિમલ ડિસ્પેન્સરી લઈને નોઈડા પહોંચ્યા. અહીં તેણે સર્જરી કરાવી છે. મોતીની સારવારમાં 70 હજાર રૂપિયાનો ખર્ચ થયો છે.
હાઉસ ઓફ સ્ટ્રે એનિમલ ડિસ્પેન્સરીના સંજય મહાપાત્રાએ જણાવ્યું હતું કે, પિટબુલ આક્રમક લાગતો નથી. આ ઘટના બાદથી તે માણસોથી ડરી ગયો છે. હુમલાને કારણે તેનું ઘણું લોહી વહી ગયું હતું. સર્જરી દરમિયાન તેના જડબામાં પ્લેટ મૂકવામાં આવી છે. તેને સાજા થવામાં ઘણો સમય લાગશે.
15.jpg)
