બોલીવુડની 'પંગા ગર્લ' અને હિમાચલ પ્રદેશના મંડીથી BJP સાંસદ, કંગના રનૌત ઘણીવાર પોતાના સ્પષ્ટ નિવેદનોથી રાજકીય ગરમી વધારી દે છે. ફિલ્મોમાં નેપોટિઝમની ટીકા અને રિતિક રોશન સાથેના ઝઘડાને કારણે સમાચારમાં રહેતા કંગના રનૌત ફરી એકવાર હેડલાઇન્સમાં છવાઈ ગયા છે, પરંતુ આ વખતનું કારણ ચોંકાવનારું છે. સોશિયલ મીડિયા પર એક દાવો ઝડપથી વાયરલ થઈ રહ્યો છે કે, કંગનાએ કોંગ્રેસ નેતા રાહુલ ગાંધી સાથે લગ્ન કરવાની ઇચ્છા વ્યક્ત કરી છે.
5 રાજ્યોમાં ચૂંટણી પરિણામો વચ્ચે, અભિનેત્રી કંગના રનૌત ફરી એકવાર સમાચારમાં છે. તાજેતરમાં, કંગના રનૌત અને રાહુલ ગાંધી વિશે એક સમાચાર વાયરલ થયા હતા. આ સમાચાર વાંચીને કંગના રનૌત ગુસ્સે થયા હતા. તેમણે પોસ્ટ કરીને પ્રતિક્રિયા આપી, અને આ સમાચારને સંપૂર્ણપણે અફવા ગણાવી છે.
જ્યારે આ દાવાની સંપૂર્ણ તપાસ કરવામાં આવી, ત્યારે સત્ય કંઈક બીજું બહાર આવ્યું. હકીકતમાં, કંગના રનૌતે રાહુલ ગાંધી સાથેના તેના લગ્ન અંગે કોઈ સત્તાવાર નિવેદન આપ્યું જ નથી. આ વાયરલ દાવો સંપૂર્ણપણે બનાવટી છે અને તેને ઉપજાવી કાઢીને ફેલાવવામાં આવ્યો છે. વિરોધી પક્ષો તેને મુખ્ય મુદ્દાઓ પરથી ધ્યાન હટાવવાનું કાવતરું ગણાવી રહ્યા છે.
એક મીમ પેજે રાહુલ ગાંધી અને કંગના રનૌતના નામે એક વાંધાજનક અને નકલી પોસ્ટ શેર કરી હતી. મીમ પેજે કંગના રનૌતનો એક કથિત સ્ક્રીનશોટ શેર કર્યો હતો, જેમાં દાવો કરવામાં આવ્યો હતો કે, કંગનાએ કહ્યું હતું કે, 'જો રાહુલ ગાંધી BJPમાં જોડાય છે, તો હું તેની સાથે લગ્ન કરવા તૈયાર છું.' કંગનાએ તેની ઇન્સ્ટાગ્રામ સ્ટોરી પર આ નકલી પોસ્ટ ફરીથી શેર કરી હતી, જેમાં લખ્યું હતું કે, આ નકલી સમાચાર અત્યંત ખરાબ છે.
કંગના રનૌતે આ અંગે ગુસ્સો વ્યક્ત કર્યો હતો. તેમણે દુ:ખ વ્યક્ત કર્યું હતું કે, 'રાજકારણમાં પણ હવે મહિલાઓ માટે કોઈ ગરિમા બાકી નથી રહી. તેમણે આવા જુઠ્ઠાણા ફેલાવનારાઓને ચેતવણી આપતા કહ્યું હતું કે, તેમને તેમના આવા કાર્યો પર શરમ આવવી જોઈએ. કંગનાએ સ્પષ્ટ કર્યું હતું કે, તે આવી કોઈ પણ પ્રકારની નીચલી કક્ષાની હરકતને માફ કરશે નહીં.'
હકીકતમાં, આ અફવા સોશિયલ મીડિયા પર વ્યંગ અને મજાક તરીકે શરૂ થઈ હતી, જેને કેટલાક લોકોએ પાછળથી સાચું માનીને ફેલાવવાનું શરૂ કર્યું હતું. થોડી જ વારમાં આ દાવો ખુબ વાયરલ થઈ ગયો અને તેના પર મીમ્સ અને ચર્ચાઓ પણ શરૂ થઇ ગઈ હતી.
