બાળકોને લાયસન્સ વિના વાહનો ચલાવવા આપશો નહીં

આજના ઝડપી જીવનમાં વાહનો આપણી રોજિંદી જરૂરિયાત બની ગયા છે. પરંતુ જ્યારે આ વાહનો બાળકોના હાથમાં આવે છે ખાસ કરીને લાયસન્સ વિના ત્યારે તે માત્ર તેમના જીવન માટે જ નહીં પરંતુ સમગ્ર સમાજ માટે જોખમ ઊભું કરે છે. બાળકોને લાયસન્સ વિના બાઇક, કાર કે અન્ય વાહનો ચલાવવા આપવું એ એક ગંભીર મુદ્દો છે જેની સામે આપણે સૌએ જાગૃત થવાની અને જવાબદારી લેવાની જરૂર છે.

આપણા બાળકોનું ભવિષ્ય જોખમાય: 

બાળપણ એ જીવનનો સૌથી નાજુક અને મહત્વનો તબક્કો છે. આ વયે બાળકોમાં શારીરિક અને માનસિક પરિપક્વતા હજુ વિકસી રહી હોય છે. રસ્તા પર વાહન ચલાવવું એ માત્ર એક આવડત માત્ર નથી પરંતુ તેમાં જવાબદારી, નિયમોની સમજ અને સ્થિતિને સમજવાની ક્ષમતાની જરૂર હોય છે. જો બાળક લાયસન્સ વિના વાહન ચલાવે અને અકસ્માતનો ભોગ બને તો તેનું આખું ભવિષ્ય અંધકારમાં ડૂબી જાય છે. ઘણી વખત આવા અકસ્માતોમાં ગંભીર ઇજા કે મૃત્યુ પણ થાય છે જે બાળકના સપના અને તેના પરિવારની આશાઓને ખતમ કરી નાખે છે. શું આપણે આપણા બાળકોને આવા જોખમમાં નાખવા માગીએ છીએ?

કોઈક નિર્દોષના જીવનું જોખમ: 

બાળકો દ્વારા લાયસન્સ વિના વાહન ચલાવવાથી માત્ર તેમનું જ નહીં પરંતુ અન્ય લોકોનું જીવન પણ જોખમમાં મુકાય છે. રસ્તા પર ચાલતા રાહદારીઓ, અન્ય વાહનચાલકો કે નાનાં બાળકો પણ આવા અણઘટતા અકસ્માતોનો શિકાર બની શકે છે. એક બેદરકારીભર્યું પગલું કોઈના પરિવારની ખુશીઓ છીનવી શકે છે. ઘણી વખત બાળકો ઝડપના રોમાંચમાં કે મિત્રોની શેખીમાં વાહન ચલાવે છે પરંતુ તેમની પાસે ટ્રાફિક નિયમોની સમજ કે અનુભવ ન હોવાથી તેઓ ભૂલ કરી બેસે છે. આવી ભૂલોની કિંમત નિર્દોષ લોકોને પોતાના જીવ ગુમાવીને ચૂકવવી પડે છે.

આપણે જવાબદાર વાલી બનીએ: 

આ મુદ્દે સૌથી મોટી જવાબદારી વાલીઓની છે. ઘણા વાલીઓ પોતાના બાળકોની ખુશી કે તેમની જીદ પૂરી કરવા માટે તેમને નાની ઉંમરે જ વાહનો આપી દે છે. પરંતુ શું આ ખરેખર તેમના હિતમાં છે? બાળકોને પ્રેમ આપવો એક સારી વાત છે પરંતુ તેમને ખોટી રીતે લાડ લડાવીને જોખમમાં નાખવા એ જવાબદારીની ખોટ દર્શાવે છે. વાલીઓએ બાળકોને નિયમોનું મહત્વ સમજાવવું જોઈએ અને તેમને લાયસન્સ વિના વાહન ચલાવવાથી રોકવા જોઈએ. જો વાલીઓ જ જવાબદારી નહીં લે તો બાળકો પાસેથી શિસ્તની અપેક્ષા કેવી રીતે રાખી શકાય?

નિયમોનું પાલન કરીએ અને કરાવીએ:

દરેક દેશમાં ટ્રાફિક નિયમો અને લાયસન્સની ઉંમરની મર્યાદા નક્કી કરવામાં આવી છે અને તેનું કારણ સ્પષ્ટ છે સલામતી. ભારતમાં પણ મોટર વાહન અધિનિયમ હેઠળ 18 વર્ષથી ઓછી ઉંમરના બાળકોને વાહન ચલાવવાની મંજૂરી નથી. આ નિયમોનું પાલન કરવું એ ફક્ત કાયદાકીય ફરજ નથી પરંતુ નૈતિક જવાબદારી પણ છે. જો આપણે નિયમોની અવગણના કરીશું તો એક અરાજક સ્થિતિ ઊભી થશે જેમાં કોઈનું જીવન સુરક્ષિત નહીં રહે. નિયમોનું પાલન કરવાથી બાળકોને પણ શિસ્ત અને જવાબદારીનું મૂલ્ય શીખવા મળે છે.

ભેગા મળીને જાગૃતિ લાવીને સુસંસ્કૃત સમાજ વ્યવસ્થા બનાવીએ: 

એક સુસંસ્કૃત સમાજની ઓળખ એ છે કે તેના નાગરિકો નિયમોનું પાલન કરે અને એકબીજાની સલામતીનું ધ્યાન રાખે. બાળકોને લાયસન્સ વિના વાહનો આપવાની પ્રથા બંધ થાય તો આપણે એક સુરક્ષિત અને સંસ્કારી સમાજનું નિર્માણ કરી શકીએ. આ માટે સરકારે કડક કાર્યવાહી કરવી જોઈએ, વાલીઓએ જાગૃતિ દાખવવી જોઈએ અને શાળાઓએ બાળકોને ટ્રાફિક નિયમોનું શિક્ષણ આપવું જોઈએ. સમાજના દરેક સભ્યએ પોતાનું યોગદાન આપવું પડશે.

આખરમાં બાળકોને લાયસન્સ વિના વાહનો આપવું એ એક એવી ભૂલ છે જેની કિંમત આપણે બધા ચૂકવીએ છીએ. આપણે જવાબદાર વાલી, નાગરિક અને સમાજના સભ્ય તરીકે એક નાનું પગલું ભરીએ અને આ પ્રથાને રોકીએ. બાળકો આપણું ભવિષ્ય છે અને તેમની સલામતી આપણી હાથમાં છે.