યુવા નેતૃત્વ અલ્પેશ ઠાકોર કેમ નિષ્ક્રિય કે મૌન જણાઈ રહ્યા છે?

ગુજરાતના રાજકીય અને સામાજિક પટલ પર એક સમયે અલ્પેશ ઠાકોર યુવા નેતૃત્વનું પ્રતીક હતા. ઠાકોર સમુદાયના અધિકારો, ઓબીસી અનામત અને દારૂબંધી જેવા મુદ્દાઓ પર તેમની આક્રમક ઝુંબેશે લાખો યુવાનોને પ્રેરણા આપી. 2017ની વિધાનસભા ચૂંટણીમાં તેમની રાધનપુર બેઠક પરની જીતે ગુજરાતના રાજકારણમાં નવો અધ્યાય ઉમેર્યો. પરંતુ આજે, જ્યારે ગુજરાતમાં બેરોજગારી, ખેડૂતોની સમસ્યાઓ અને સામાજિક અસમાનતા જેવા મુદ્દાઓ ચર્ચામાં છે ત્યારે અલ્પેશ ઠાકોરનું મૌન અને નિષ્ક્રિયતા ચોંકાવનારી છે. આ નિષ્ક્રિયતા શા માટે? અને તે સમાજની અપેક્ષાઓ પર કેટલા ખરા ઉતર્યા?

અલ્પેશ ઠાકોરે 2011માં ગુજરાત ક્ષત્રિય ઠાકોર સેના અને OSS એકતા મંચની સ્થાપના કરી જેના દ્વારા તેમણે ઓબીસી, SC અને ST સમુદાયોના હક માટે લડત આપી. દારૂબંધીની ઝુંબેશે સરકારને કડક કાયદા લાગુ કરવા દબાણ કર્યું જે તેમની સૌથી મોટી સફળતા હતી. પરંતુ 2019માં કોંગ્રેસ છોડી ભાજપમાં જોડાયા બાદ તેમનું રાજકીય વલણ બદલાયું. રાધનપુરની પેટાચૂંટણીમાં હાર અને ભાજપમાં જોડાયા બાદની નિષ્ક્રિયતાએ તેમની લોકપ્રિયતા પર પ્રશ્નો ઉભા કર્યા. 2022માં ગાંધીનગર દક્ષિણથી જીત મળી હોવા છતાં તેઓ સામાજિક મુદ્દાઓ પર પહેલા જેવી આક્રમકતા દેખાડતા નથી.

ગુજરાતમાં યુવા નેતાઓ જેમ કે હાર્દિક પટેલ, ગોપાલ ઈટાલિયા, જિગ્નેશ મેવાણીએ સામાજિક મુદ્દાઓ પર અવાજ ઉઠાવ્યો પરંતુ અલ્પેશનું મૌન ચર્ચાનો વિષય બન્યું છે. 2018માં તેમના પર પરપ્રાંતીઓ વિરુદ્ધ હિંસા ભડકાવવાના આરોપો લાગ્યા જેનાથી તેમની છબીને નુકસાન થયું. ભાજપમાં જોડાયા બાદ તેમની ભૂમિકા મર્યાદિત થઈ અને તેઓ પક્ષની રણનીતિના ભાગરૂપે વધુ સક્રિય દેખાયા નથી. 

સમાજની અપેક્ષાઓના સંદર્ભે અલ્પેશે શરૂઆતમાં ઠાકોર સમુદાયના ઉત્કર્ષ માટે નોંધપાત્ર કામ કર્યું પરંતુ રાજકીય પક્ષપલટા અને હારથી તેમની વિશ્વસનીયતા પર અસર થઈ. આજે બેરોજગારી, શિક્ષણ અને ખેડૂતોની સમસ્યાઓ જેવા મુદ્દાઓ પર તેમનો અવાજ નબળો પડ્યો છે જેનાથી સમાજના લોકોમાં નિરાશા વ્યાપી છે. ગુજરાતના યુવાનો અને ઠાકોર સમુદાયને હજુ પણ આશા છે કે અલ્પેશ ફરીથી સામાજિક ન્યાય માટે સક્રિય થશે પરંતુ તેમની નિષ્ક્રિયતા એક મોટો પ્રશ્ન છે.

અલ્પેશ ઠાકોરની રાજકીય સફર એ દર્શાવે છે કે યુવા નેતૃત્વ માટે સતત સામાજિક પ્રતિબદ્ધતા અને વિશ્વસનીયતા જરૂરી છે. ભાજપમાં જોડાયા બાદ તેમની ભૂમિકા નિર્ણાયક બનવાને બદલે પક્ષની રણનીતિનો ભાગ બની જેનાથી તેમની સામાજિક લડતનો ઝણઝણાટ ઘટ્યો. સમાજની અપેક્ષાઓ પૂરી કરવા માટે અલ્પેશ ઠાકોરે ફરીથી જનતા વચ્ચે જવું પડશે અને સામાજિક મુદ્દાઓ પર સક્રિય પડશે.