'ભાજપને મત આપવાના વિકલ્પને ટેપથી બ્લોક કરી દેવાયો,' અમિત માલવિયાનો આરોપ; ચૂંટણી પંચે આપ્યો જવાબ

પશ્ચિમ બંગાળમાં આજે મતદાનનો બીજો અને અંતિમ તબક્કો ચાલી રહ્યો છે. આ પ્રક્રિયા દરમિયાન વિવિધ મુદ્દાઓ અને ગેરરીતિઓના અહેવાલો આવવા લાગ્યા છે. ભારતીય જનતા પાર્ટી (BJP)ના નેતા અમિત માલવિયએ આરોપ લગાવ્યો છે કે ઘણા મતદાન મથકો પર ટેપનો ઉપયોગ કરીને ભાજપને મત આપવાનો વિકલ્પ અવરોધિત કરવામાં આવ્યો છે, જેના કારણે મતદારોને તેમનો વિકલ્પ પસંદગી કરતાં રોકવામાં આવી રહ્યા છે.

માલવિયાએ 'X' (અગાઉ ટ્વીટર) પર એક પોસ્ટમાં  કહ્યું કે, ‘આ તથાકથિત 'ડાયમંડ હાર્બર મોડેલ' છે, તે જ મોડેલ જેણે મમતા બેનર્જીના ભત્રીજા, અભિષેક બેનર્જીને તેમની લોકસભા બેઠક જીતવામાં મદદ કરી. મમતા બેનર્જીએ જહાંગીર ખાનનો બચાવ કરતા આ જ વાત કહી હતી, જે ડાયમંડ હાર્બર મતવિસ્તારમાં ફાલ્ટાથી TMCની ટિકિટ પર ચૂંટણી લડી રહેલો ગુનેગાર છે. અમે ફાલ્ટાના તમામ અસરગ્રસ્ત બૂથ પર તાત્કાલિક પુનઃ મતદાન કરાવવાની માંગ કરીએ છીએ જ્યાં આવી ઘટનાઓ બની છે. આમાંના કેટલાક બૂથની વિગતો, સહાયક પુરાવાઓ સાથે, નીચે આપેલ છે:

ફાલ્ટા 144, ભાગ 170, રૂમ નં. 2- હરિંદાંગા હાઇ સ્કૂલ.

બૂથ 189 પણ આ પ્રકારે પ્રભાવિત થયો છે, સાથે જ ઘણા અન્ય બૂથ પણ છે.’

https://twitter.com/amitmalviya/status/2049360397107617827?s=20

દરમિયાન, ચૂંટણી પંચ (EC)એ આ બાબતની નોંધ લીધી છે. પશ્ચિમ બંગાળના ચૂંટણી કમિશનરે જણાવ્યું હતું કે ,જો કોઈ બટન ટેપ કરવામાં આવ્યા હોવાના અહેવાલો પ્રાપ્ત થાય છે, તો તેની પુષ્ટિ કરવી કરવી જોઈએ અને યોગ્ય રીતે નોટ કરવી જોઈએ. જો આ અહેવાલો સાચા હોવાનું જાણવા મળે છે, તો અસરગ્રસ્ત બૂથ પર પુનઃ મતદાન કરવામાં આવશે.

આ દરમિયાન પશ્ચિમ બંગાળ વિધાનસભા ચૂંટણી 2026ના બીજા તબક્કા માટે આજે સવારે 7:00 વાગ્યાથી મતદાન ચાલી રહ્યું છે. આજે 142 બેઠકો પર મતદાન થઈ રહ્યું છે; સૌથી હાઇ-પ્રોફાઇલ સ્પર્ધાઓમાં ભવાનીપુરનો સમાવેશ થાય છે, જ્યાં મુખ્યમંત્રી મમતા બેનર્જી વિરોધ પક્ષના નેતા સુવેન્દુ અધિકારી સામે ચૂંટણી લડી રહ્યા છે. સુવેન્દુ અધિકારી નંદીગ્રામથી પણ ચૂંટણી લડી રહ્યા છે, જ્યાંથી તેઓ હાલમાં ભાજપના ધારાસભ્ય છે. ચૂંટણીના પ્રથમ તબક્કા માટે 152 બેઠકો પર 23 એપ્રિલે મતદાન થયું હતું, જેમાં રેકોર્ડ 93.19 ટકા મતદારોએ તેમના મતાધિકારનો ઉપયોગ કર્યો હતો.

બંગાળ વિધાનસભા ચૂંટણીમાં બીજા તબક્કાના મતદાન દરમિયાન સવારના કલાકો દરમિયાન વિવિધ સ્થળોએથી હિંસા અને તોડફોડની ઘટનાઓ નોંધાઈ હતી. પોલીસના જણાવ્યા અનુસાર, ચપરા, શાંતિપુર, નિમતલા અને ભાંગર સહિત અનેક વિસ્તારોમાંથી આવી ઘટનાઓના અહેવાલો પ્રાપ્ત થયા છે.