કોંગ્રેસ નેતા રાહુલ ગાંધીએ દેશમાં ભાજપ શાસિત રાજ્યોની 'ડબલ એન્જિન' સરકારો પર આકરા પ્રહાર કર્યા છે. તેમણે આક્ષેપ કર્યો છે કે ભ્રષ્ટાચાર અને સત્તાના દુરુપયોગને કારણે સામાન્ય જનતાનું જીવન તબાહ થઈ ગયું છે. રાહુલ ગાંધીએ સોશિયલ મીડિયા દ્વારા ઉત્તરાખંડની અંકિતા ભંડારી હત્યાકાંડથી લઈને દેશના વિવિધ ભાગોમાં બની રહેલી દુર્ઘટનાઓનો ઉલ્લેખ કરી સરકારને ઘેરી છે.
સત્તાનું સંરક્ષણ અને અંકિતા ભંડારી કેસ
રાહુલ ગાંધીએ ઉત્તરાખંડના ચર્ચિત અંકિતા ભંડારી હત્યાકાંડનો ઉલ્લેખ કરતા સવાલ ઉઠાવ્યો કે, આજે પણ પ્રશ્ન એ જ છે કે સત્તાનું સંરક્ષણ ભાજપના કયા VIP ને બચાવી રહ્યું છે? કાયદો દરેક માટે સમાન ક્યારે બનશે? તેમણે વધુમાં ઉત્તર પ્રદેશના ઉન્નાવ કાંડનો ઉલ્લેખ કરી જણાવ્યું કે કેવી રીતે સત્તાના અહંકારમાં ગુનેગારોને બચાવવામાં આવ્યા હતા.
ભ્રષ્ટાચાર અને સ્વાસ્થ્ય સાથે ચેડા
તેમણે ઇન્દોરમાં ઝેરી પાણી પીવાથી થયેલા મોત અને ગુજરાત, હરિયાણા તેમજ દિલ્હીમાં 'કાળા પાણી'ની સમસ્યા પર ચિંતા વ્યક્ત કરી. સરકારી હોસ્પિટલોમાં નવજાત શિશુઓને મારતા ઉંદરો અને ઉધરસની સિરપ (Cough Syrup) થી થતા બાળકોના મોતને તેમણે ભ્રષ્ટાચારનું સીધું પરિણામ ગણાવ્યું.
રાહુલ ગાંધીએ આરોપ લગાવ્યો કે અબજોપતિઓના સ્વાર્થ માટે કુદરતી સંસાધનોનો નાશ કરવામાં આવી રહ્યો છે. રાજસ્થાનની અરવલ્લી પર્વતમાળા હોય કે અન્ય જંગલો, નિયમોને નેવે મૂકીને પહાડો કાપવામાં આવી રહ્યા છે, જેના બદલે જનતાને માત્ર પ્રદૂષણ અને આપત્તિઓ મળી રહી છે.
વિકાસના દાવાઓ પર કટાક્ષ કરતા તેમણે કહ્યું કે, પુલ ધરાશાયી થાય છે, રસ્તાઓ બેસી જાય છે અને ટ્રેન અકસ્માતોમાં પરિવારો નાશ પામે છે, પરંતુ ભાજપ સરકાર માત્ર ફોટો-ઓપ અને ટ્વિટમાં વ્યસ્ત છે.
https://twitter.com/RahulGandhi/status/2009480632335053271
તેમણે અંતમાં ઉમેર્યું કે મોદીજીનું 'ડબલ એન્જિન' માત્ર અબજોપતિઓ માટે ચાલી રહ્યું છે. સામાન્ય ભારતીય માટે આ ભ્રષ્ટાચારની સરકાર વિકાસ નહીં, પરંતુ તબાહીની રફ્તાર છે, જે દરરોજ કોઈને કોઈનું જીવન કચડી રહી છે.
8.jpg)
