આટલું કર્યા પછી પણ BCCI વૈભવ સૂર્યવંશીને ટીમમાં તક નહીં આપી શકે! નડશે ICCનો આ નિયમ

હરારે સ્પોર્ટ્સ ક્લબ ખાતે અંડર-19 વર્લ્ડ કપ ફાઇનલ રમાઈ ગયા પછી ભલે સમય વીતી ગયો હોય, તેમ છતાં વૈભવ સૂર્યવંશીની વિસ્ફોટક ઇનિંગ્સના પડઘા હજુ પણ સમગ્ર ક્રિકેટ જગતમાં ગુંજી રહ્યા છે. ઈંગ્લેન્ડ સામેની ફાઇનલમાં વૈભવે 80 બોલમાં 175 રન બનાવ્યા. આ માત્ર એક ઇનિંગ્સ જ નહીં, પણ તેણે એક રેકોર્ડબુક જ કબ્જે કરી લીધી હતી. 15 છગ્ગા, જબરદસ્ત સ્ટ્રાઇક રેટ અને એક એવી રમત જેણે ફાઇનલ જેવી મોટી મેચને પણ એકતરફી મેચમાં ફેરવી દીધી.

બિહારના આ 14 વર્ષના બેટ્સમેનને જોનારા દરેક ચાહકના મનમાં એક જ પ્રશ્ન છે, જો વૈભવ ઈંગ્લેન્ડના શ્રેષ્ઠ યુવા બોલરોને નષ્ટ કરી શકે છે અને IPLમાં સદી પણ ફટકારી શકે છે, તો તે સિનિયર ભારતીય ટીમમાં કેમ નથી? આ પ્રશ્નનો એક જ જવાબ છે, ICCના અમુક નિયમો.

વૈભવ સૂર્યવંશી સામે સૌથી મોટો અવરોધ છે ICCનો લઘુત્તમ વય (ઓછામાં ઓછી ઉંમરનો) નિયમ. 2020માં લાગુ કરવામાં આવેલા આ નિયમ હેઠળ, કોઈપણ ખેલાડી આંતરરાષ્ટ્રીય ક્રિકેટ રમવા માટે ઓછામાં ઓછું ૧૫ વર્ષનો હોવો જોઈએ. આ નિયમ ખેલાડીઓની શારીરિક અને માનસિક સલામતીને ધ્યાનમાં રાખીને બનાવવામાં આવ્યો હતો.

વૈભવનો જન્મ 27 માર્ચ, 2011ના રોજ થયો હતો. ફેબ્રુઆરી 2026માં તેણે અંડર-19 વર્લ્ડ કપ જીત્યો ત્યારે તે ટેકનિકલી હજુ 14 વર્ષનો જ હતો.

આનો અર્થ એ થયો કે, ભલે તે બિહાર માટે 36 બોલમાં સદી ફટકારે કે IPLમાં રાજસ્થાન રોયલ્સ માટે બોલરોની ખરાબ રીતે ધોલાઈ કરે, 27 માર્ચ, 2026 પહેલા સિનિયર ટીમમાં પસંદગી શક્ય નથી.

અહીં એક રસપ્રદ મુદ્દો એ પણ છે કે વૈભવ હજુ સિનિયર ટીમ માટે ખૂબ નાનો છે, પરંતુ તે હવે અંડર-19 ટીમ માટે પણ ફરી વખત નહીં રમી શકે.

BCCIનો કડક નિયમ છે કે, ખેલાડી અંડર-19 વર્લ્ડ કપમાં ફક્ત એક જ વાર રમી શકે છે. આ નિયમનો હેતુ એ સુનિશ્ચિત કરવાનો છે કે, દરેક ટુર્નામેન્ટમાં નવા ખેલાડીઓને તક મળે અને કોઈપણ ખેલાડી તેમના વય જૂથ માટે 'સ્પેશિયલ' ન બની જાય.

2026ના અંડર-19 વર્લ્ડ કપમાં પ્લેયર ઓફ ધ ટુર્નામેન્ટ તરીકે નામાંકિત થયા પછી, વૈભવ 2028 કે 2030ના અંડર-19 વર્લ્ડ કપમાં રમી શકશે નહીં, પછી ભલે તે ઉંમર પ્રમાણે હજુ પણ અંડર-19 ખેલાડી હોય.

વૈભવ સૂર્યવંશીએ છેલ્લા 12 મહિનામાં બનાવેલા રેકોર્ડ તેના ધ્યાનનું વાસ્તવિક કારણ છે: અંડર-19 વર્લ્ડ કપ ફાઇનલમાં 80 બોલમાં 175 રન. 2026ના વર્લ્ડ કપમાં 30 છગ્ગા- એક નવો ટુર્નામેન્ટ રેકોર્ડ. 14 વર્ષ અને 272 દિવસની ઉંમરે લિસ્ટ-A સદી, વિશ્વનો સૌથી યુવા ખેલાડી. વિજય હજારે ટ્રોફીમાં 59 બોલમાં 150 રન, AB De વિલિયર્સનો રેકોર્ડ તૂટ્યો. IPLમાં 35 બોલમાં સદી, સૌથી નાની ઉંમરમાં IPLમાં સદી. ઈન્ડિયા A માટે T20 સદી ફટકારનાર પ્રથમ ખેલાડી. ઈંગ્લેન્ડ અંડર-19 સામે 52 બોલમાં સદી, સૌથી ઝડપી યુવા ODI સદી. 58 બોલમાં યુવા ટેસ્ટ સદી, ભારત માટે સૌથી ઝડપી. સૈયદ મુશ્તાક અલી ટ્રોફીમાં 108 અણનમ, સૌથી નાની ઉંમરે સદી.