‘RCBની મેચ બેંગલુરુમાં જ થવી જોઈતી હતી. અમારી સાથે અન્યાય થયો છે. રાજકારણને કારણે મેચને બીજી જગ્યાએ ખસેડવામાં આવી.’ આ નિવેદન કર્ણાટકના નાયબ મુખ્યમંત્રી ડી.કે. શિવકુમારે આપ્યું છે. તેમના મતે, IPL 2026ની ફાઇનલ મેચ બેંગલુરુમાં જ થવી જોઈતી હતી. તેમણે અન્ય ઘણી વાતો કહી છે, પરંતુ તેમાં ઊંડા ઉતરતા પહેલા, મેચ બાબતે જાએ લઈએ.
31 મેના રોજ રોયલ ચેલેન્જર્સ બેંગલુરુએ IPL 2026ની ફાઇનલમાં ગુજરાત ટાઇટન્સને 5 વિકેટથી હરાવીને ટાઇટલ પર કબજો કર્યો. ટ્રોફી માટે 17 વર્ષ રાહ જોયા પછી બેંગલુરુ સતત બીજી વખત ચેમ્પિયન બની. અમદાવાદના નરેન્દ્ર મોદી સ્ટેડિયમમાં રમાયેલી મેચમાં, RCBના બોલરોએ ગુજરાત ટાઇટન્સને આઠ વિકેટ પર માત્ર 155 રન પર રોકી દીધી હતી. ત્યારબાદ ટીમે 18 ઓવરમાં 5 વિકેટ ગુમાવીને 161 રન બનાવીને આ લક્ષ્યનો સફળતાપૂર્વક હાંસલ કરી દીધું હતું.
ડી.કે. શિવકુમારે શું કહ્યું?
મેચ સમાપ્ત થયા પછી કર્ણાટકના નાયબ મુખ્યમંત્રી ડી.કે. શિવકુમારે IPL ફાઇનલના સ્થળ અંગે તીખી પ્રતિક્રિયા આપી છે. તેમણે કહ્યું કે જો ફાઇનલ બેંગલુરુમાં રમાઈ હોત, તો RCB ચાહકો માટે એક મોટી અને શાનદાર ક્ષણ હોત. રાજકારણને કારણે, મેચ બેંગલુરુથી ખસેડીને અમદાવાદ કરી દેવામાં આવી હતી. હું આ બાબતે વધુ કંઈ કહીશ નહીં. RCBના ખેલાડીઓ અને સમગ્ર ટીમને અભિનંદન. ગત વખતે પણ શાનદાર રમત બતાવી હતી, અને આ વર્ષે પણ ખૂબ શાનદાર પ્રદર્શન કર્યું છે. કર્ણાટકના લોકો, RCBના ચાહકો, કર્ણાટક રાજ્ય અને સરકાર વતી હું તેમને મારી હાર્દિક શુભેચ્છાઓ પાઠવું છું.’
આમ તો, IPL 2026ની ફાઇનલ મૂળ બેંગલુરુના એમ. ચિન્નાસ્વામી સ્ટેડિયમમાં યોજાવાની હતી કારણ કે RCB ડિફેન્ડિંગ ચેમ્પિયન હતી. જોકે, જ્યારે BCCIએ પ્લેઓફનું શેડ્યૂલ જાહેર કર્યું, ત્યારે તેણે ફક્ત એટલું જ કહ્યું કે કર્ણાટક સ્ટેટ ક્રિકેટ એસોસિએશન (KSCA) અને તેના અધિકારીઓએ કેટલીક માંગણીઓ કરી હતી જે બોર્ડના સ્થાપિત નિયમો અને પ્રોટોકોલની બહાર હતી. એટલે, ફાઇનલનું સ્થળ બદલવામાં આવ્યું. ત્યારબાદ 8 મેના રોજ, BCCI સચિવ દેવજીત સૈકિયાએ આ નિર્ણય પાછળનું કારણ સ્પષ્ટ કર્યું. તેમણે જાણાવ્યું કે, IPL નિયમો અનુસાર, યજમાન ક્રિકેટ એસોસિએશનને સ્ટેડિયમની કુલ બેઠક ક્ષમતાના માત્ર 15 ટકા કોમ્પ્લિમેન્ટરી ટિકિટના રૂપમાં ફાળવવામાં આવે છે. જોકે, KSCAએ આ ક્વોટા કરતા ખૂબ વધુ ટિકિટ માંગી હતી.
સૈકિયાના જણાવ્યા મુજબ, KSCAએ 2 મેના રોજ જવાબ આપ્યો, જેમાં કહેવામાં આવ્યું હતું કે 15 ટકા કોમ્પ્લિમેન્ટરી ટિકિટ (મફત ટિકિટ) ઉપરાંત તેમને તેમના સભ્યો, સંલગ્ન ક્લબો અને અન્ય લોકો માટે વધારાની ટિકિટની પણ જરૂર છે. ત્યારબાદ, BCCIએ ફાઇનલ મેચ અમદાવાદ ખસેડવાનો નિર્ણય લીધો.
અમદાવાદનું નરેન્દ્ર મોદી સ્ટેડિયમ વિશ્વના સૌથી મોટા ક્રિકેટ સ્ટેડિયમોમાંનું એક છે, જેમાં લગભગ 120,000 દર્શકોની બેસાવી ક્ષમતા છે. આ પહેલા આ સ્થળે 2022, 2023 અને 2025માં IPL ફાઇનલ રમાઈ ચૂકી છે. ગયા વર્ષે આ જ મેદાન પર, RCBએ પંજાબ કિંગ્સને 6 રને હરાવીને પોતાનું પહેલું IPL ટાઇટલ જીત્યું હતું.
