પાકિસ્તાન ક્રિકેટ ટીમ હોય કે તેમનું બોર્ડ, મોટા ભાગે કોઈક ને કોઈ વિવાદને કારણે ચર્ચામાં બન્યા રહે છે. આવો જ એક વિવાદ વર્ષ 2024માં જોવા મળ્યો હતો, જ્યારે ગેરી કર્સ્ટન અને પછી જેસન ગિલેસ્પીએ થોડા મહિનામાં જ હેડ કોચ પદ પરથી રાજીનામું આપી દીધું હતું. પાકિસ્તાન ક્રિકેટ બોર્ડે ગયા વર્ષે ટેસ્ટ ટીમના હેડ કોચ તરીકે ગિલેસ્પીની નિમણૂક કરી હતી. ત્યારે ગેરી કર્સ્ટનને લિમિટેડ ઓવર્સ ફોર્મેટમાં હેડ કોચની જવાબદારી સોંપવામાં આવી હતી. જોકે, બંનેએ 6 મહિનાની અંદર જ આ પદ છોડી દીધું હતું. તો હવે, કર્સ્ટને હેડ કોચ પદ છોડવાના પોતાના નિર્ણય અંગે પહેલીવાર નિવેદન આપ્યું છે, જેમાં તેમણે PCBની કામ કરવાની રીતનો પૂરો કાચો ચિઠ્ઠો ખોલી દીધો છે.
ગેરી કર્સ્ટને વિઝડન પોડકાસ્ટને આપેલા પોતાના નિવેદનમાં પાકિસ્તાની ટીમના હેડ કોચનું પદ છોડવા પાછળના કારણ અંગે વાત કરતા કહ્યું હતું કે, ‘મને પોતાનું કામ યોગ્ય રીતે કરવા દેવામાં આવતું નહોતું, જેમાં ટીમની અંદર બાહ્ય લોકોની વધારે દખલઅંદાજી હતી. શરૂઆતના કેટલાક મહિના મારા માટે ખૂબ જ તણાવપૂર્ણ હતા, ત્યારબાદ મને સમજાઈ ગયું કે કોચના રૂપમાં મને અહીં વધુ તાકત મળવાની નથી. મને સિલેક્શન પેનલમાંથી હટાવી દેવામાં આવ્યો અને કહેવામાં આવ્યું કે તમારે માત્ર ટીમને કોચિંગ આપવાનું છે, પરંતુ ટીમ પસંદ કરવામાં મારી કોઈ ભૂમિકા નહીં રહે. એક કોચના રૂપમાં, જ્યારે તમારી ટીમ પર કોઈ સકારાત્મક અસર હોતી નથી તો તમારા માટે વસ્તુઓ ખૂબ મુશ્કેલ થઈ જાય છે.’
કર્સ્ટને પોતાના આ નિવેદનમાં પાકિસ્તાન ટીમના ખેલાડીઓનો પણ ઉલ્લેખ કર્યો, જેમાં તેમણે જણાવ્યું કે, પાકિસ્તાનનાં ખેલાડી કદાચ દુનિયાની બીજી કોઈ ટીમની તુલનમાં વધારે પ્રદર્શનનો દબાવ અનુભવે છે. જ્યારે ટીમને હારનો સામનો કરવો પડે છે, તો ત્યાં આખો માહોલ જ એકદમ અલગ જોવા મળે છે. જોકે, કિર્સ્ટને કહ્યું કે તેઓ પાકિસ્તાન ક્રિકેટ ટીમમાં કોચના રૂપમાં પાછા ફરી શકે છે પરંતુ યોગ્ય પરિસ્થિતિઓમાં અને કોઈ પણ બાહ્ય હસ્તક્ષેપ વિના.
