T20 વર્લ્ડ કપ 2026ની સુપર-8 સ્ટેજમાં ભારત અને વેસ્ટ ઇન્ડીઝ વચ્ચે થનારી મેચ હવે કરો યા મરો જેવી બની ચૂકી છે. 1 માર્ચ, 2026ના રોજ કોલકાતાના ઇડન ગાર્ડન્સ સ્ટેડિયમમાં રમાનારી આ મેચ વર્ચ્યૂઅલ ક્વાર્ટર ફાઇનલ જેવી છે. આ મેચ ગ્રુપ-1માંથી બીજી સેમીફાઇનાલિસ્ટમાં કોણ છે તે નક્કી કરશે. પરંતુ સૌથી મોટો પ્રશ્ન એ છે કે, જો આ મેચ કોઇપણ કારણોસર રદ થાય છે તો શું થશે? ભારત અને વેસ્ટ ઇન્ડીઝ વચ્ચેની કઇ ટીમ સેમીફાઇનલમાં આગળ પહોંચશે?
મેચ રદ થઇ તો સેમીફાઇનલમાં કોને ટિકિટ મળશે?
હાલમાં, ગ્રુપ-1 પોઇન્ટ ટેબલમાં ભારત અને વેસ્ટ ઇન્ડીઝના બરાબર પોઇન્ટ છે. વેસ્ટ ઇન્ડીઝ 2 પોઇન્ટ સાથે બીજા સ્થાને છે. તો ભારતના પણ 2 પોઇન્ટ છે, પરંતુ નેટ રન રેટને કારણે તે ત્રીજા સ્થાને છે. આ મેચ જીતનાર ટીમ, 4 પોઇન્ટ સાથે સીધી સેમીફાઇનલમાં પહોંચી જશે. પરંતુ જો ભારત અને વેસ્ટ ઇન્ડીઝ વચ્ચેની મેચ વરસાદને કારણે ધોવાઇ જાય અથવા પરિણામ ન આવે, તો ICCના નિયમો મુજબ બંને ટીમોને 1-1 પોઇન્ટ મળશે.
આ સ્થિતિમાં, બંને ટીમોના કુલ પોઇન્ટ 3-3 રહેશે. સેમીફાઇનલમાં પહોંચનારી ટીમ નેટ રન રેટ (NRR) દ્વારા નક્કી કરવામાં આવશે. વેસ્ટ ઇન્ડીઝની NRR +1.791 છે, જે ભારતના -0.100 કરતા ખૂબ સારી છે. એટલે, જો વરસાદ કે અન્ય કોઇ કારણોસર મેચ રદ કરવામાં આવે છે, તો વેસ્ટ ઇન્ડીઝ સેમીફાઇનલમાં પહોંચી જશે, અને ભારત ટૂર્નામેન્ટમાંથી બહાર થઇ જશે. આ ભારતીય ફેન્સ માટે મોટો ઝટકો હશે.
મેચના દિવસે કોલકાતામાં હવામાન કેવું રહેશે?
હવામાન અહેવાલો અનુસાર, 1 માર્ચે કોલકાતામાં વરસાદની કોઇ શક્યતા નથી. મેચ દરમિયાન હવામાન સંપૂર્ણપણે સ્વચ્છ રહેવાની અપેક્ષા છે. મતલબ કે ફેન્સને આખી મેચ જોવા મળશે, અને ટીમો તેમના પ્રદર્શનના આધારે સેમીફાઇનલમાં સ્થાન મેળવશે. બંને ટીમો 10 વર્ષ બાદ T20 વર્લ્ડ કપમાં એકબીજાની સામસામે હશે. છેલ્લી વખત, ભારતીય ટીમને હાર મળી હતી. એવામાં, ભારતની નજર હિસાબ બરાબર કરવા પર પણ રહેશે.
10.jpg)
