ટ્રમ્પે  દુનિયાને આપ્યો બીજો આંચકો, આ બે વસ્તુ પર 50 ટકા ટેરિફ લગાવ્યો, હવે શું થશે?

USના રાષ્ટ્રપતિ ડોનાલ્ડ ટ્રમ્પે સ્ટીલ અને એલ્યુમિનિયમની આયાત પર ટેરિફ 25 ટકાથી વધારીને 50 ટકા (સ્ટીલ-એલ્યુમિનિયમ પર ટેરિફ) કરવાની જાહેરાત કરી દુનિયાને નવો ઝટકો આપ્યો છે. આ નવા દર 4 જૂનથી અમલમાં આવશે. રાષ્ટ્રપતિ ડોનાલ્ડ ટ્રમ્પનો આ નિર્ણય એવા સમયે આવ્યો છે, જ્યારે તેમણે ચીન પર વેપાર કરાર તોડવાનો આરોપ લગાવ્યો છે. ચીન પર નિશાન સાધતા રાષ્ટ્રપતિ ડોનાલ્ડ ટ્રમ્પે કહ્યું કે, અમેરિકાનું ભવિષ્ય 'શાંઘાઈના હલકી ગુણવત્તાવાળા સ્ટીલ' પર નિર્ભર રહેશે નહીં.

એક ન્યૂઝ એજન્સીના અહેવાલ મુજબ, US રાજ્ય પેન્સિલવેનિયામાં એક US સ્ટીલ પ્લાન્ટમાં બોલતા રાષ્ટ્રપતિ ડોનાલ્ડ ટ્રમ્પે કહ્યું કે, આ વધારો સ્થાનિક સ્ટીલ ઉત્પાદકોને સુરક્ષિત કરશે. તેમણે કહ્યું, 'અમે 25 ટકાનો વધારો કરવા જઈ રહ્યા છીએ. અમે યુનાઇટેડ સ્ટેટ્સ(USA)માં સ્ટીલ પર ટેરિફ 25 ટકાથી વધારીને 50 ટકા કરવા જઈ રહ્યા છીએ, જે યુનાઇટેડ સ્ટેટ્સ (USA)માં સ્ટીલ ઉદ્યોગને વધુ સુરક્ષિત બનાવશે.'

https://twitter.com/WhiteHouse/status/1928576869462409317

આ પછી, ટ્રુથ સોશિયલ પર એક પોસ્ટમાં, રાષ્ટ્રપતિ ડોનાલ્ડ ટ્રમ્પે કહ્યું કે, વધેલો ટેરિફ એલ્યુમિનિયમ ઉત્પાદનો પર પણ લાગુ થશે અને તે 4 જૂનથી અમલમાં આવશે. પોસ્ટમાં, તેમણે કહ્યું, 'આપણા સ્ટીલ અને એલ્યુમિનિયમ ઉદ્યોગો પહેલા કરતાં વધુ સારી સ્થિતિમાં આવી રહ્યા છે. અમારા અદ્ભુત સ્ટીલ અને એલ્યુમિનિયમ કામદારો માટે આ બીજા એક સારા સમાચાર હશે.'

સરકારી ડેટા અનુસાર, 2018માં સ્ટીલ પર પ્રથમ ટેરિફ લાદવામાં આવ્યો ત્યારથી, વિશ્વભરમાં સ્ટીલ ઉત્પાદનોના ભાવમાં લગભગ 16 ટકાનો વધારો થયો છે. ટેરિફ વધારા પછી, સ્ટીલ અને એલ્યુમિનિયમ પર મોટા ભાગે આધાર રાખનારા જેવા કે, ઘર, ઓટોમોટિવ અને બાંધકામ ક્ષેત્રો સહિતના ઉદ્યોગોનો ખર્ચ વધી શકે છે.

સ્ટીલ પર ટેરિફ બમણા કર્યા પછી રાષ્ટ્રપતિ ડોનાલ્ડ ટ્રમ્પનું વૈશ્વિક વેપાર યુદ્ધ વધુ તીવ્ર બન્યું છે. આ પગલું એવા સમયે લેવામાં આવ્યું છે, જ્યારે તેમણે ચીન પર US સાથેના કરારનું ઉલ્લંઘન કરવાનો આરોપ લગાવ્યો છે. જેના હેઠળ મહત્વપૂર્ણ ખનિજો પર ટેરિફ અને વેપાર પ્રતિબંધો પરસ્પર પાછા ખેંચવાના હતા.